Gimomiyo Luwo Chike mag Muma Konyo

BE EN adier ni puonj mag Muma e wi wach nindruok gin puonj ma kindegi osekalo kendo ma ridonwa ngima nono? Ooyo. Mopogore gi mano, puonj mag Muma e wi wach nindruok nyalo konyowa geng’o:

▪ Tuoche mag nyach

▪ Mako ich oko mar kend

▪ Lit mapek mabedoe nikech ketho kend chuth

▪ Chuny machandore

▪ Charuok ma ng’ato bedogo kuome owuon nikech owe dende mondo jomoko otigo e chopo gombogi giwegi

Jachwechwa, Jehova Nyasaye,a dwaro ni wayud mor kendo wayud ber kuom mich momiyowa. Nyasaye e jalno “mapuonji mondo iyud konyruok.” (Isaiah 48:17) Ng’atno maluwo chike mag Muma e wi wach nindruok yudo ber kaka:

▪ Winjruok maber gi Nyasaye

▪ Chuny mokuwe

▪ Winjruok maber mar joot

▪ Nying maber

▪ Luor ma ng’ato miyore owuon

To nade kapo ni gie sani ngimani ok luwre gi chike mag Muma? Be loko kit ngimani en gima nyalore? Be Nyasaye nyalo weyoni richoni machon?

Par ane wachni: Moko kuom Jokristo machon ne gin joma ne olokore moweyo timbe mag terruok koda mag nindruok e kind chwo gi chwo. Ne giyiero loko kit ngimagi, kendo ne giyudo ber mang’eny. (1 Jo Korintho 6:9-11) E kindewagi, ji gana gi gana e piny mangima osetimo yiero machalo gi mano. Gisewuok e tuech mar dak e ngima mar anjawo kendo giseyudo ber mar loko ngimagi mondo oluwre gi chike mag Muma. Ne ane kuom ranyisi gima ne otimore e ngima Sarah, ma ne owuo kuome e sula mokwongo.

“Mapiyo Nono Nawinjo ka Chunya Oyueyo”

Sarah nofwenyo ni dak e ngima mar anjawo ok ne kelne mor kaka ne oparo. Owacho niya: “Nawinjo ka gima chunya maiye otho. Wiya ne kuot kendo ne aluor ni anyalo mako ich kata yudo tuwo moro marach ahinya. Kindego duto pod ne an gi yie ni Nyasaye nitie, kendo nang’eyo ni ngimana ne miyo chunye bedo malit. Ne awinjo ni an ng’at mochido, kendo mano ne chamo denda.”

Gikone, Sarah noyudo teko mar loko kit ngimane. Nomanyo kony kuom jonyuolne, ma gin Joneno mag Jehova. Bende nokwayo jodong-kanyakla manie alworane mondo okonye. Sarah wacho niya: “Ng’wono koda hera ma nonyisa gi jonyuolna koda jodong-kanyakla ne omora kendo nokawa gi wuoro. Mapiyo nono nawinjo ka chunya oyueyo.”

Gie sani, Sarah pidho nyithinde ariyo. Owacho niya: “Ajawuoyo gi nyithinda ayanga kuom yiero ma ne atimo. Adwaro ni ging’e kaka chayo chike Nyasaye ne ohinyo ngimana. Gima adwaro chopo en konyogi ng’eyo ber mabedoe e ringruok, e paro, koda e chuny ka ng’ato oluwo chike mag Nyasaye e wi wach nindruok. An gadier chuth ni Nyasaye miyowa chike nikech ok odwar ni wahinyre.”

In bende inyalo yudo ber mabedoe ka iluwo chike mag Nyasaye. Muma singo niya: “Weche ma Jehova puonjo, tir, ma miyo chuny yil ahinya: Wach ma Jehova chiko, oler, ma miyo wang’ ler. . . . Nitie pok maduong’ kuom ritogi.”—Zaburi 19:8, 11.b

[Weche moler piny]

[Weche manie ite mar 8]

Jogo machayo puonj mag Muma bedo gi lit mar chuny

[Weche manie ite mar 9]

Jogo maluwo chike mag Muma bedo gi chuny maler kendo gibedo gi winjruok maber mar joot