DWOKO PENJO MAG MUMA
Be dhano nyalo dak nyaka chieng’?
En chenro mane ma Nyasaye oseketo mondo ogonywa e twech mar tho?
Adam, dhano ma ne okwong chwe ne odak kuom higni miche. Kata kamano, ne obedo moti ma otho. A kindeno, ji osetimo gik mogwaro mondo kik gibed moti. Kata kamano, pod ji tho. Nikech ang’o? Adam nobedo moti mi gikone otho nikech ne otamore winjo Nyasaye. Wabedo moti kendo watho nikech ne onyuolwa gi richo, to gima richo kelo en tho.—Som Chakruok 5:5; Jo Rumi 5:12.
Mondo wadag nyaka chieng’, nyaka chul rawar mondo oreswa. (Ayub 33:24, 25) Rawar en gima ichulo mondo ogony ng’ato. Nikech wan e twech mar tho, dwarore ni ochul rawar mondo ogonywa. (Wuok 21:29, 30) Yesu ne ochulonwa rawarno kane othonwa.—Som Johana 3:16.
Ere kaka wanyalo yudo ngima manyaka chieng’?
Ok ji duto mibiro gony oa e twech mar tuwo kod bedo moti. Kendo joma chalo gi Adam ma ne ok owinjo Nyasaye, ok bi yudo ngima manyaka chieng’. Joma biro dak nyaka chieng’, gin mana joma owenegi richogi kata kethogi.—Som Isaiah 33:24; 35:3-6.
Mondo owenwa richowa, nitie okang’ ma nyaka wakaw. Nyaka wang’e Nyasaye kuom puonjruok Wachne, ma en Muma. Muma puonjowa kaka wanyalo bedo gi ngima maber kendo nyisowa kaka wanyalo moro Nyasaye mondo wayud ngima manyaka chieng’.—Som Johana 17:3; Tich Joote 3:19.