“Ruoth Noweyonu Richou”

“Ng’at maok dwar weyo ne jomoko kethogi chalo ng’at mamuko olalo kata daraja ma onego okalie en owuon.” Jasomo ma ne wuok Britain ma ne odak e higni mag 1600, miluongo ni Edward Herbert ema ne owacho wechego. Wechenego nyiso gimomiyo dwarore ahinya ni wawe ne jomoko kethogi nikech wan be biro dwarore ni giwenwa kethowa. (Mathayo 7:12) Kata kamano, nitie gima duong’ moloyo momiyo onego wawe ne jomoko kethogi. Ne ane weche mag jaote Paulo mayudore e bug Jo Kolosai 3:13.—Som.

Nikech wan dhano morem, kinde mang’eny wachwanyo jowetewe kata watimonegi marach, kendo gin bende ginyalo timonwa kamano. (Jo Rumi 3:23) Ang’o mwanyalo timo mondo wabed gi kuwe gi dhano wetewa ma bende orem kaka wan? Nyasaye ne otelo ne Paulo e chiwo puonj ni wahore gi jowetewa kendo wawenegi kethogi. Mana kaka puonjno ne okonyo ji chiegni higni alufu ariyo mokalo, e kaka pod okonyo e kindegi. We wanon ane adimba weche ma ne Paulo owachogo.

“Ng’wonreuru.” Wach ma nolok ni “ng’wonreuru” kowuok e dho-Grik tiende en bedo ng’ama hore. Buk moro wacho ni Jokristo nyiso kidoni kuom “bedo moikore hore sama nyawo jomoko kata kido moko ma gin-go chwanyogi.” Weche motigo ni “ng’ato gi ng’ato” nyiso ni ji ariyogo duto onego onyisre kidono. Tiende ni, ka waketo e paro ni wan be wan gi kido machwanyo jomoko, ok wabi weyo mondo gik maok wahero kuom jogo oketh kuwe me kindwa kodgi. To nade ka jomoko okethonwa?

“Weyoreuru richo ng’ato gi ng’ato.” Kaluwore gi jasomo moro, wach ma ne otigo e dho-Grik molok ni “weyoreuru” “ok en wach mitiyogo pile e nyiso weyo ne ng’ato richo. . . to onyiso chuny mang’won ma ng’ato weyonego nyawadgi kethone.” Buk machielo wacho ni tiend wachno en “timo gima moro ng’ato gadier, kecho ng’ato, kata konye.” Wanyiso ni wang’won ka waweyo ne ng’ato richone kata ‘ka wan gi wach kode.’ Kata kamano, ang’o momiyo onego wabed moikore weyo ne jomoko kethogi? Achiel kuom gimomiyo watimo kamano en nikech mapiyo nono wanyalo yudo ni wakethone kendo dwarore ni en ema koro ong’wonwa.

“Kaka Ruoth noweyonu richou, un bende onego utim kamano.” Gima duong’ momiyo onego wawe ne jomoko kethogi en ni Jehova Nyasaye weyonwa kethowa. (Mika 7:18) Par ane kaka Jehova kecho e yo malach jogo moloko chunygi gadier. Mopogore kodwa, Jehova ok tim richo. Kata kamano, oikore weyo ne joma oloko chunygi gadier kethogi chuth kata obedo ni ong’eyo ni onge kinde ma en be biro dwarore ni joricho moweyonegi richogi owene ketho moro amora. Kuom adier, Jehova ema keto ranyisi maberie moloyo mar weyo ne joricho moloko chunygi kethogi.

Kido mar Jehova mar kecho ji chwalowa sudo machiegni kode kendo luwo ranyisine. (Jo Efeso 4:32–5:1) Ng’ato ka ng’ato kuomwa onego openjre niya, ‘Ka Jehova weyona richona e yo mang’won kamano, ang’o ma dimona weyo ne jaricho wadwa mokethona richone koloko chunye gadier?’—Luka 17:3, 4.