Be Ijawacho ni “Ee” To Bang’e Ilokori ni “Ooyo”?

Par ane wach machieloni bende: Owadwa moro gi jaode nogwelo nyaminwa moro ma nigi nyithindo ariyo mondo obi olimgi chieng’ moro godhiambo. Sama nyaminwano nonyiso nyithindego wachno, ne gimor miwuoro. Giserito limbeno gi siso ahinya. Kata kamano, kodong’ ndalo achiel, owadwa gi jaodecha nyiso nyaminwano ni wach moro oyudogi apoya machunogi ni nyaka koro giwe wach limbeno. Bang’e nyaminwano nofwenyo gimomiyo limbeno nobare. Nofwenyo ni e odiechieng’ sie ma ne ogwelgieno, ema bende owadwa gi nyaminwano nogwel bende kamachielo ma giyie dhi.

Wan kaka Jokristo onego watim mana kaka wasewacho. Ok onego wabed joma wacho ni, ‘ee’ kae to bang’e wawacho ni ‘ooyo.’ (2 Kor. 1:18) Kata kamano, mana kaka ranyisi ariyo moket malo kae nyiso, chal mar ji opogore. Chopo seche moko manyalo nenore ni nyaka wang’ad chenro moro ma ne wasechano. Kinde moro gima kamano noyudo jaote Paulo.

IJARO PAULO NI OBAGNI

E higa mar 55 E Ndalowa, kane Paulo nie dala mar Efeso e wuodhe mar adek kaka misonari, nochano ng’ado Nam mar Aegea mondo odhi Korintho eka bang’e odhi Makedonia. Ka nodok Jerusalem, nochano limo kanyakla mar Korintho kendo, mondo okaw chiwo maggi oter ne owete man Jerusalem. (1 Kor. 16:3) Mani nenore maler e 2 Jo Korintho 1:15, 16, mawacho niya: “Ka an gi genono, nadwaro biro iru mokwongo, mondo uyudi gueth diriyo; nadwaro limou e wuodha madhigo Makedonia, kendo duogo iru kaa Makedonia, mondo ukowa e yo kadhi Judea.”

Nenore ni Paulo noyudo osenyiso kanyakla mar Korintho e barua ni ne odhi limogi kendo. (1 Kor. 5:9) Kata kamano mapiyo bang’ ndiko baruano, jood Kloe nonyiso Paulo ni ne nitie pogruok gi kwedruok mapek e kanyaklano. (1 Kor. 1:10, 11) Paulo nong’ado mar weyo dhi Korintho kaka nochano e kindeno, kae to ondikonegi barua ma waluongo ni 1 Jo Korintho. Ei baruano, Paulo nochiwo siem kendo norieyogi e yo mamuol. Nonyisogi bende ni koro ne odhi kwongo dhi Makedonia eka bang’e olimgi.—1 Kor. 16:5, 6.a

Nenore ni kane owete ma Korintho oyudo barua mareno, moko kuom “joote madongo” e kanyaklano ne hango ni Paulo ok en ng’at migeno. Kokwedo pach joote ma ne paro ni gidongogo, Paulo nopenjogi niya: ‘To kane adwaro timo kamano, nabagni koso? Koso aloso yorena kaka dhand ringruok, mondo Ee gi Ooyo okikre e parona?’—2 Kor. 1:17; 11:5.

Wanyalo penjore ni, kaluwore gi wechego, be mano nyiso ni jaote Paulo ne en ng’at ma ‘bagni’ adier? Ok en kamano! Wach molok ni ‘bagni’ inyalo tigo kuom ng’at maok nyal gen kata ng’at maok tim kaka osingore. Penjo ma Paulo nopenjo ni “koso aloso yorena kaka dhand ringruok”? nonego okony Jokristo man Korintho ong’e ni kata obedo ni Paulo noloko chenrone, mano ok onyiso ni koro ne en ng’at maok nyal gen.

Paulo nodwoko joma ne jarego kowachonegi kama: “Chutho, kaka Nyasaye en adier, wachwa ok obedonu Ee gi Ooyo.” (2 Kor. 1:18) Ka kuom adier, Paulo noloko chenrone nikech nodewo owete gi nyimine man Korintho. E 2 Jo Korintho 1:23, Paulo wacho ni noloko chenrone ma ok odhi Korintho nikech ‘nokecho’ owete gi nyiminego. Mano en adier nikech nomiyo owete gi nyiminego thuolo mar timo lokruok kapok odhi limogi. Kane pod Paulo ni Makedonia, Tito nokelone wach ni barua ma nondiko ne Jo-Korintho nomulo chunygi ahinya ma gitimo lokruok, to mano nomiyo Paulo obedo mamor.—2 Kor. 6:11; 7:5-7.

YESU E “AMINA”

Kane joote ma ne kawore ni ‘gidongo’ owacho ni Paulo ok en ng’at marito singo, nyaka bed ni ne gitemo wacho bende ni Paulo ok en ng’at minyalo gen e tij lendo. Kata kamano Paulo noparo ne Jo-Korinthogo ni noyalonegi wach Yesu Kristo. Nowachonegi kama: “Wuod Nyasaye, Yesu Kristo, ma an gi Silvano gi Timotheo ne wayalo e dieru, ne ok en Ee gi Ooyo: to Ee ni kuom en.” (2 Kor. 1:19) Be dibed ni Yesu ne en ng’at ma ok nyal gen e yo moro amora? Ooyo! E ngimane duto kane otiyo ne Nyasaye e pinyka, Yesu ne wacho adiera kinde duto. (Joh. 14:6; 18:37) Ka weche ma Yesu ne yalo ne gin adier chuth kendo migeno, to Paulo bende ne yalo mana wechego, mano nyiso ni Paulo bende ne en ng’at migeno.

Jehova en ‘Nyasach adiera.’ (Zab. 31:5) Mano en adier kaluwore gi weche ma Paulo nodhi nyime wacho niya: “E singruok duto mag Nyasaye, Ee ni kuom Kristo.” Nikech Yesu nomakore gi Nyasaye chuth kane en e pinyka, wabedo gadier ni singo duto mag Jehova gin migeno. Paulo medo wacho kama: “E momiyo kuom [Yesu] bende wawacho Amina ni Nyasaye nikech duong’ mare.” (2 Kor. 1:20) Wacho ni Yesu e “Amina” tiende en ang’o? Tiende en ni kokalo kuom Yesu, singo duto mag Nyasaye biro chopo kare.

Mana kaka Jehova gi Yesu jowacho adiera kinde duto, Paulo bende ne jatimo kaka owacho. (2 Kor. 1:19) Ne en ng’at migeno maok bagni e wach “kaka dhand ringruok.” (2 Kor. 1:17) Kar mano, ‘nowuotho kuom roho.’ (Gal. 5:16) E gik moko duto ma notimo, nonyiso ni nodewo ahinya owete gi nyimine. Ee mare kinde duto nosiko mana Ee!

BE EE MARI SIKO MANA EE?

Ndalowagi, yot mondo joma ok luw chike Muma, osingre ni gibiro timo gimoro to bang’e giketh singono kapo ni wach moro matin oriwore e nyimgi kata ka gimoro machielo maber oneno. E weche mag ohala kinde mang’eny “ee” ok sikga ka en “ee,” kata obedo ni winjruok ma ne otim ne ondik piny ma ji oketoe sei. Ji mathoth bende tinde ok ne kend kaka singruok ma ne otim e kind ji ariyo kendo monego osiki. Kar mano, kwan mar joma ketho kend medore e okang’ mamalo miwuoro, to mano nyiso ni ji neno kend kaka gima inyalo keth sa asaya ka ng’ato ohero.—2 Tim. 3:1, 2.

To nade in? Be Ee mari en Ee? En adier ni mana kaka osenyis e chak sulani, seche moko nyalo chuno ni iketh chenro moro, ok ni nikech in ng’at ma bagni, to nikech chal moro maok inyal geng’o oyudi. Kata kamano, kaka Jakristo, kapo ni isingori timo gimoro, onego itim duto minyalo mondo ichop singono. (Zab. 15:4; Math. 5:37) Kitimo kamano, to ibiro bedo ng’at migeno, ng’at ma timo kaka osewacho, kendo ng’at mawacho adier kinde duto. (Efe. 4:15, 25; Jak. 5:12) Sama ji osefwenyo ni in ng’at minyalo gen wechene, ginyalo chikoni itgi sama iteronegi wach Pinyruodh Nyasaye. Omiyo, weuru watimuru duto mwanyalo mondo Ee marwa osik mana Ee!