Jotich Jehova “Nyaka Pogre gi Richo”

BE ISEGANENO ka ondik nying Jehova kamoro e lela kata ka ondike e gik mokan e musiam? Nyaka bed ni wachno nomako pachi ahinya. Mano en nikech nying Nyasaye en gima duong’ ahinya e lamo marwa nikech wan Joneno mag Jehova! E piny mangima sani, onge oganda moro amora matiyo gi nying Nyasaye moloyowa. Kata kamano bedo joma iluongo gi nying Nyasaye miyowa ting’ maduong’ ahinya.

² Tiyo gi nying Jehova ok nyis ni koro obiro yie ayieya kodwa nyalodia. Nyaka wadag kaluwore gi chikene makare. Mano e momiyo Muma paronwa ni jotich Jehova nyaka “a kuom rach.” (Zab. 34:14) Jaote Paulo nowacho mano maler ka nondiko kama: “Ng’ato ka ng’ato ma hulo nying Ruoth, nyaka pogre gi richo.” (Som 2 Timotheo 2:19.) Kaka Joneno mag Jehova, ong’ewa kaka joma tiyo gi nying Jehova seche te. To kare ere kaka wanyalo pogore gi richo?

“AURU” KUOM RICHO

3, 4. En Ndiko mane mosechando pach josomo mang’eny ma nono Muma, to nikech ang’o?

³ E ndiko mar 2 Timotheo 2:19, Paulo wacho ni “Nyasaye oseketo mise motegno.” Kae to nitiere weche moko ariyo mondik e miseno. Mokwongo en ni, “Ruoth ong’eyo joge,” to mano nenore maler ni ogol e Kwan 16:5. (Ne sula mokalo.) Wach mar ariyo mondik e miseno en ni, “Ng’ato ka ng’ato ma hulo nying Ruoth, nyaka pogre gi richo.” Wach mar ariyoni osechando ahinya josomo ma nono Muma. Nikwop ang’o?

⁴ Weche ma Paulo nowachogo nyiso ni ne onwoyo weche moko ma nosendik kamoro. Kata kamano, nenore ni e Ndiko mag Dho-Hibrania, onge weche machal gi ma Paulo nowacho ni “Ng’ato ka ng’ato ma hulo nying Ruoth, nyaka pogre gi richo.” To kare Paulo nogolo wechego kanye? Kane pok owacho wechego, noyudo osewacho weche mayudore e Kwan sula 16, manyiso kaka Kora nong’anyo. Be dibed ni wach mar ariyo ma Paulo nowuoyoeno otudore gi ng’anyo ma notimore ndalo Kora?

5-7. Gin gik mage ma notimore e kinde Musa motudore gi weche ma Paulo nowuoyoe e 2 Timotheo 2:19? (Ne picha manie chak sulani.)

⁵ Muma wacho ni Dathan gi Abiram, ma ne gin yawuot Eliab noriwore gi Kora mondo gitel ne joma nong’anyo ne Musa gi Harun. (Kwan 16:1-5) Ne gichayo Musa e lela kendo ne gikwedo migawo ma Nyasaye nomiye. Jong’anyogo pod ne odhi nyime bedo e kind oganda Jehova, ka gimiyo Jo-Israel mamoko tich matek ahinya e rito winjruokgi gi Nyasaye. Ka nochopo kinde ma Jehova ne dwaro nyisoe ayanga pogruok e kind joma lame kod joma oweyo lame, nogolo chik ma achiel kachiel.

⁶ Muma wacho niya: “Kendo Jehova nowuoyo ni Musa kokone ni, Wuo ni oganda, kiwacho, Auru e kar hemb Kora, Dathan gi Abiram. Mi Musa noa malo, nodhiyo kuom Dathan gi Abiram; kendo jodongo mag Israel noluwe. Nowuoyo ni oganda kowacho, Auru, asayou, kuom hembe mag jo marichogi, kata kik umul girgi moro, mondo kik tieku kuom richo duto margi. Mit ne gia kuom hema mar Kora, Dathan gi Abiram, kwonde duto.” (Kwan 16:23-27) Kae to Jehova notieko jong’anyogo te. Joma nomakore gi Jehova e lamo madier ne otony nikech ne gipogore gi richo kuom bedo mabor gi jong’anyogo.

⁷ Jehova nonoga chuny dhano. Ong’eyo maber ahinya joma omakore kode. Kata kamano, pod ne dwarore ni jotichne mohere okaw okang’ mar bedo mabor gi jong’anyo. Omiyo en gima nyalore ni Paulo ne wuoyo kuom weche mayudore e Kwan 16:5, 23-27 ka nondiko niya: “Ng’ato ka ng’ato ma hulo nying Ruoth, nyaka pogre gi richo.” Wanyalo wacho ni wechego otudore gi weche ma Paulo nosewacho ni “Ruoth ong’eyo joge.”—2 Tim. 2:19.

TAMRI ‘MBEKNI MOFUWO MAONGE RIEKO’

8. Ang’o momiyo tiyo gi nying Jehova kata bedo jakanyo e kanyakla mar Jokristo ok oromo?

⁸ Kuom wuoyo e wi gik ma notimore e kinde Musa, Paulo ne paro ne Timotheo gimomiyo ne dwarore ni okaw okang’ mapiyo mar rito winjruokne gi Jehova. Bedo abeda e kanyakla mar Jokristo ne ok oromo, mana kaka luongo aluonga nying Jehova e ndalo Musa ok noromo. Joma lamo Jehova gadier nyaka pogre gi richo. Timotheo nonego okaw wechego nade? To gin puonj mage ma jotich Jehova ma kindegi nyalo yudo kuom siem ma Paulo nochiwo kotelne gi roho maler?

9. Ere kaka “mbekni mofuwo, ma onge rieko” ne kelo pek e kanyakla mar Jokristo mokwongo?

⁹ Wach Nyasaye nyiso ayanga timbe maok kare ma Jokristo onego okwedi. Kuom ranyisi, e weche molworo ndiko mar 2 Timotheo 2:19, waneno kaka Paulo nyiso Timotheo ni ‘kik omin wach’ kendo ‘opogre oa e weche manono mag oyuma.’ (Som 2 Timotheo 2:14, 16, 23.) Moko kuom joma ne nie kanyakla nosechako ng’anyo ka gipuonjo miriambo. Nenore bende ni jomoko nosechako sieko gi weche moko makelo ywaruok. Kata obedo ni Muma ne ok kwed achiel kachiel wechegigo, wechego pod ne kelo pogruok e kanyakla. Mano nomiyo dhawo obedo e kindgi ka gimino wach kendo mano ne miyo lamo Jehova obed matek. Kuom mano, Paulo nojiwo ahinya gimomiyo ne dwarore gitamre “mbekni mofuwo, ma onge rieko.”

10. Ang’o monego watim sama waromo gi puonj mag joma ong’anyo?

¹⁰ E kindegi, ok yot yudo jo mong’anyo ne adiera to pod nie kanyakla. Kata kamano, pod wanyalo romo gi puonj moko maok osir gi Muma. Kata bed ni puonjgo oa kanye, nyaka wakwedgi. Ok en gima nyiso rieko kata matin chako yware gi joma nong’anyo, bed ni wawuoyo kodgi achiel kachiel, watudore kodgi e Intanet, kata watiyo gi yore mamoko. Kata bed ni wagalo ni wadwaro konyogi, goyo kodgi mbaka ok bi luwore gi siem ma wanono e Muma sani. Kar mano, kaka oganda Jehova wakwedo kendo wapogore gi puonj mag joma ong’anyo.

11. En ang’o manyalo miyo “mbekni mofuwo” ochakre e kanyakla, to ere kaka jodong-kanyakla nyalo keto ranyisi maber?

¹¹ Mopogore gi puonj mag miriambo mag joma ong’anyo, nitie gik mamoko mapod nyalo ketho kuwe e kanyakla. Kuom ranyisi, bedo gi paro mopogore opogore e wi yore mag manyo mor seche moko nyalo kelo ywaruok kod “mbekni mofuwo, ma onge rieko.” En adier ni seche ma jomoko ochako jiwo jowadgi e kanyakla mondo oluw yore moko mag manyo mor maketho chike Jehova, jodong-kanyakla ok bi ling’ aling’a ni nikech ok gidwar ywaruok kodgi. (Zab. 11:5; Efe. 5:3-5) Kata kamano, jodongo onego otang’ kik giket ne ji chike ma maggi giwegi. Kinde duto giluwo puonj mayudore e Muma ma jiwogi niya: “Rituru kuedh Nyasaye manie lwetu, . . . ok kutimoru ruodhi e tich moketue, to kudoko ranyisi ni kueth.”—1 Pet. 5:2, 3; som 2 Jo Korintho 1:24.

12, 13. (a) Joneno mag Jehova neno nade yore mag manyo mor, to gin puonj mage mag Muma matayogi? (b) Puonj mowuo kuomgi e paragraf mar 12 inyalo tigo nade e weche mamulo ngima ng’ato owuon?

¹² Kuom wach manyo mor, riwruok mar oganda Jehova ok ndikga nyinge vidio, wende, buge, kod tuke kompyuta mowinjore koda maok owinjore. Nikech ang’o? Muma jiwo Jakristo ka Jakristo mondo otieg pache mondo ong’e “pogo e kind gik mabeyo kod gik maricho.” (Hib. 5:14) Muma miyowa puonj mwanyalo tiyogo e timo yiero. E yore duto mag ngimawa, onego ‘wayang gima long’o ne Ruoth.’ (Efe. 5:10) Muma bende nyisowa ni wiye udi omi ting’ mar tayo joodgi. Omiyo ginyalo tamo joodgi kik luw yore moko mag manyo mor.—1 Kor. 11:3; Efe. 6:1-4.

¹³ Puonj mag Muma mowuo kuomgi motelego, ok tigo e wach manyo mor kende. Gik mamoko ma bende nyalo kelo ywaruok oriwo wach rwakruok gi bidhruok, yore mag manyo thieth kod kit chiemo mwachamo, kaachiel gi yore mamoko matindo tindo ma ng’ato owuon onego otimie yiero. Jomoko nyalo dwaro chiko ngima jowetegi mondo oluw pachgi. Kata kamano, kapo ni onge chik kata puonj mayudore e Muma mokethi, onge tiende bedo gi ywaruok e weche machalo kamago nimar Muma wacho niya: “Jatich Ruoth ok owinjore otim miero, to onego obed mang’won gi ji duto.”—2 Tim. 2:24.

KWED OSIEPE MARICHO!

14. En ranyisi mane ma Paulo notiyo manyiso gimomiyo dwarore ni wakwed osiepe maricho?

¹⁴ En yo mane machielo ma ‘ng’ato ka ng’ato ma hulo nying Ruoth, nyaka pogrego gi richo’? En kuom tamore mako osiep gi jogo matimo timbe maok kare. Bang’ Paulo wacho ni “Nyasaye oseketo mise motegno,” nitie ranyisi machielo ma notiyogo ma bende puonjowa. Nondiko niya: “E ot maduong’ nitie agulini mopogore; moko olos gi dhahabu kod fedha, to moko bende olos kod bao kod lowo. Moko gin mag tich mogen, to moko mag tich aticha.” (2 Tim. 2:20, 21) Kae to nojiwo Jokristo mondo “opwodhre oa” kuom agulini mag “tich aticha.”

15, 16. Ranyisi ma Paulo notiyogo mar “ot maduong’”puonjowa ang’o?

¹⁵ Ranyisi ma Paulo notiyogono tiende en ang’o? E ranyisi ma notiyogono, noporo kanyakla mar Jokristo gi “ot maduong’,” to ng’ato ka ng’ato e kanyakla nopimo gi “agulini,” kata gige ot. Nitie gige ot moko kaka sende manyalo bedo mochido kata ting’o chilo manyalo hinyo ng’ato. Wuon ot ok bi riwo sendego gi mamoko maler kaka mag tedo.

¹⁶ E yo machalo kamano, jotich Jehova e kindegi ma temo mondo ngimagi obed maler, ok onego omak osiep gi jogo manie kanyakla ma kinde duto ketho chike Jehova gi wang’ teko. (Som 1 Jo Korintho 15:33.) Ka dwarore ni watang’ gi joma kamago ei kanyakla, donge mano nyiso ni onego ‘wa a’ kata kik wamak osiep gi joma ni oko mar kanyakla ma thothgi gin ‘joma ohero mwandu, joma ok winj jonywolgi, joma ok luor Nyasaye, jojig wach, jo mager, joma ok ohero gik mabeyo, jo andhoga, kendo jo mohero mor mar piny moloyo hero Nyasaye’?—2 Tim. 3:1-5.

JEHOVA GUEDHOWA SAMA WAKAWO OKANG’ MAPIYO

17. Jo-Israel ma nomakore gi Jehova nokawo okang’ mane mondo ginyis ayanga ni gikwedo richo?

¹⁷ Muma nyisowa kaka Jo-Israel mamoko nokawo okang’ mapiyo ka nonyisgi niya: “Auru e kar hemb Kora, Dathan gi Abiram.” Ndikono dhi nyime wacho ni ‘mit ne gia’ kanyo. (Kwan 16:24, 27) Ne ok gigalore kata digni. Ndikono bende nyiso ni ‘ne gia kwonde duto,’ tiende ni ne gichorore mabor gi jogo kaka nyalore. Ne ok gidwar timo gimoro amora ma ne nyalo miyo kik gitony. Ne ok giluwo chik Jehova gi chuny ma nusnus. Ne ginyiso ayanga ni gin kor Jehova kendo ne gikwedo richo. Gin gik mage ma ranyisini puonjowa?

18. En paro mane ma Paulo ne nigo ka nonyiso Timotheo niya, “ringi ia e gombo mag yawuowi”?

¹⁸ Kodok korka rito osiep me kindwa gi Jehova, onego wabed joma kawo okang’ mapiyo. Mano e paro ma ne Paulo nigo ka nonyiso Timotheo mondo ‘oring oa e gombo mag yawuowi.’ (2 Tim. 2:22) Gie kindeno, Timotheo ne en ng’ama ng’ongo ma hike ne nyalo bedo 30 gi wiye. Kata kamano, “gombo mag yawuowi” ok odewo ni ng’ato jahigini adi. Ka nonyalo romo gi gombo ma kamago, Timotheo nonego ‘oringi’ oa kuomgi. Mano tiende ni Timotheo ne nyaka “pogre gi richo.” Yesu nowuoyo e gima chalo kamano ka nowacho niya: “Ka wang’i chwanyi, gole oko, iwite oa kuomi.” (Math. 18:9) Kindegi bende, Jokristo maluwo chikni, kawo okang’ mapiyo maok gigalore kata digni kapo ni gimoro manyalo ketho winjruokgi gi Nyasaye oriwo e nyimgi.

19. Jomoko osetimo ang’o e kindegi mondo giritre kik giketh winjruokgi gi Nyasaye?

¹⁹ Moko kuom Joneno mag Jehova ma chon ne gin wasumbni mag kong’o, oseng’ado mar weyo chuth madho kong’o. Joneno moko to oseweyo luwo kit yore moko mag manyo mor kata obedo ni yorego ok richo, to giweyogi nikech yorego nyalo chiero nyawo moko ma gin-go. (Zab. 101:3) Kuom ranyisi, kane owadwa moro pok obedo Janeno, nohero kuonde mitimoe pati kod mimieloe miende mochido. Kata kamano bang’ puonjore adiera, nowere chuth gi wach miel kata sama en gi Joneno wetene e nyasi moro, nikech noluor ni mano ne nyalo chiero gombo kod paro maricho ma ne en-go chon. En adier ni ok otam Jokristo ni kik gibil kong’o, kata ni kik gimiel, kata ni kik gitim gik mamoko maok gin richo. Kata kamano, onego wakaw okang’ mapiyo mondo watamre gimoro amora manyalo ketho winjruokwa gi Nyasaye.

20. Kata obedo ni seche moko ok yot ‘pogore gi richo,’ en ang’o ma hoyowa kendo miyowa chir?

²⁰ Bedo ni iluongowa gi nying Nyasaye miyowa ting’ maduong’ ahinya. Nyaka wabed joma ‘pogore gi richo’ kendo ma “a kuom rach.” (Zab. 34:14) En adier ni timo kamano ok yot kinde duto. To gima hoyo chunywa en ni kinde duto Jehova ohero kendo “ong’eyo joge” maluwo yorene makare.—2 Tim. 2:19; som 2 Weche mag Ndalo 16:9a.