DWOKO PENJO MAG MUMA
Ang’o momiyo ji mang’eny neno ni nitie Jachuech?
Donge ngima en gima iwuoro?
Higni 3,000 mokalo, jandik-zaburi moro nowacho kama: “Ne ochweya malich ma miya wuoro.” (Zaburi 139:14) Ka iparo kaka nyathi dongo e i min mare, donge mano en wach ma kawi gi wuoro? Mano miyo ji mang’eny neno ni nitie Jachuech ma ne ochueyo gik moko duto.—Som Zaburi 139:13-17; Jo-Hibrania 3:4.
Ng’at ma ne ochueyo polo kendo oloso piny e yo ma ngima nyalo betie ema bende nochueyo gik mangima. (Zaburi 36:9) Osewuoyo gi dhano kendo tiyo gi Wachne mondo ofwenyrenegi.—Som Isaiah 45:18.
Be ne wawuok kuom le?
Dendwa chalo gi dend le e yore mopogore opogore. Mae en nikech dhano kod le nochue gi Jachuech mondo giduto gidag e piny. Ne ochueyo dhano kotiyo gi lowo, to ok kowuok kuom le.—Som Chakruok 1:24; 2:7.
Dhano opogore gi le e yore ariyo madongo. Mokwongo, dhano nigi nyalo mar ng’eyo Jachuech, here, kendo miye luor. Mar ariyo, dhano ema nochue mondo odag nyaka chieng’, to ok le. To koro, dhano duto tho nikech dhano mokwongo notamre winjo wach Jachuech.—Som Chakruok 1:27; 2:15-17.