Be Le Dhiga e Polo Bang’ Tho?

Dwoko ma Muma Chiwo

Muma puonjo ni kuom chuech duto manie piny, dhano manok kende e ma biro dhi e polo. (Fweny 14:1, 3) Gidhi e polo mondo giloch gi Yesu kaka ruodhi kendo kaka jodolo. (Luka 22:28-30; Fweny 5:9, 10) Thoth ji ibiro chier mondo gidag e Paradiso e pinyka.—Zaburi 37:11, 29.

Onge kamoro amora e Muma miwuoye kuom le modak e polo, to nitie gimomiyo. Le ok nyal timo gik madwarore mondo giyud “luong mar polo.” (Jo-Hibrania 3:1) Gigo oriwo ng’eyo Nyasaye e yo matut, bedo gi yie, kendo luwo chike Nyasaye. (Mathayo 19:17; Johana 3:16; 17:3) Dhano kende e ma nochue gi gombo mar dak nyaka chieng’.—Chakruok 2:16, 17; 3:22, 23.

Mondo chuech moro modak e piny odhi e polo, nyaka kwong chiere. (1 Jo-Korintho 15:42) Muma wuoyo kuom chier mopogore opogore. (1 Ruodhi 17:17-24; 2 Ruodhi 4:32-37; 13:20, 21; Luka 7:11-15; 8:41, 42, 49-56; Johana 11:38-44; Tich Joote 9:36-42; 20:7-12) Dhano e ma ne ochier to ok le.

Be le nigi gimoro ma ok nyal tho?

Muma puonjo ni dhano kod le gin chuech “mangima.” Omiyo, ngima mar le kod dhano chalre. Gik moko ariyo ma loso chuny gin: “lowo” kod “much ngima.”—Chakruok 1:24; 2:7; Kwan 31:28.

Muma bende wacho ni dhano kod le nyalo tho. (Wuok 19:13) Sama githo, giduto gidok e lowo. (Eklesiastes 3:19, 20) Mano tiende ni koro gionge.a

Be le timoga richo?

Ooyo. Richo en gimoro amora ma waparo, wawinjo, kata ma watimo ma ok luwre gi chike mag Nyasaye. Ka pok ng’ato otimo richo moro, ong’eyo ni gima odwaro timono ber kata rach, kata kamano, le to onge gi nyalo mar timo kamano. Ngimagi chuok kendo gitimo gik moko ka itayogi gi rieko ma ne Nyasaye ochueyogigo. (2 Petro 2:12) Ka kinde ma gidakgo e piny orumo, githo kata obedo ni ne ok gitimo richo moro amora.

Be sando le en gima owinjore?

Ooyo. Nyasaye ne omiyo dhano ting’ mar bedo gi loch e wi le. Kata kamano ne ok omiyogi ratiro mar sandogi. (Chakruok 1:28; Zaburi 8:6-8) Nyasaye ogeno ahinya ngima mar le duto, moriwo nyaka winy matindo. (Jona 4:11; Mathayo 10:29) Nochiko joma ne lame ni girit le e yo maber.—Wuok 23:12; Rapar mar Chik 25:4; Ngeche 12:10.

Ndiko ma wuoyo e wi le

Chakruok 1:28: “Nyasaye noguedhogi [dhano ma nokwongo chueyo], kendo nowachonegi niya: ‘Nyuolreuru mondo upong’ piny, kendo ubed gi teko e wi piny. Urit rech manie nam, kod gik ma fuyo e kor polo, kaachiel gi gik mangima duto manie piny.’”

Tiend Ndikono: Nyasaye noketo dhano mondo obed gi loch e wi le.

Eklesiastes 3:19, 20: “Gima ochomo dhano e ma ochomo le; gimoro achiel e ma ochomogi giduto. Mana kaka dhano tho e kaka le bende tho; much ngima ma gin-go giduto chalre achala. Omiyo, dhano ok oloyo le gi gimoro. Gik moko duto gin kayiem nono. Le gi dhano dhi kamoro achiel. Giduto ne gia e lowo, kendo giduto gidok e lowo.”

Tiend Ndikono: Sama le kata dhano otho, giduto gidok e lowo.

Ngeche 12:10: “Ng’at makare rito jambe maber.”

Tiend Ndikono: Joma beyo rito le e yo maber.

Mathayo 10:29: “Donge oyundi ariyo ing’iewo mana gi pesa matin, koso? To e ma pod onge achiel kuomgi ma nyalo lwar piny ka Wuonu ok ong’eyo.”

Tiend Ndikono: Nyasaye dewo le kendo oritogi maber moriwo nyaka winy matindo.

a Mondo iyud weche momedore, som sula mar 6 mar bug Gima Muma Puonjo