DWOKO PENJO MAG MUMA

Ang’o momiyo onego wapar tho mar Yesu?

Joma odak e piny ma en paradiso ka gimor — Gin ber mage ma tho mar Yesu biro kelo e kinde mabiro?—Isaiah 25:8; 33:24

Tho mar Yesu e gima duong’ie ahinya ma osetimore e piny, mano en nikech notho mondo dhano oyud ngima ma nyaka chieng’ kendo. Ne ok ochue dhano mondo otim gik maricho kata mondo obed ma tuwo kendo otho. (Chakruok 1:31) Adam e ma nokelo richo e piny. Yesu ne ochiwo ngimane mondo oreswa kuom richo kod tho.—Som Mathayo 20:28; Jo-Rumi 6:23.

Nyasaye ne onyisowa hera maduong’ ka ne ooro Wuode mondo othonwa. (1 Johana 4:9, 10) Yesu ne onyiso jolupne mondo opar thone kuom timo sawo ma ok olichore, ka gitiyo gi makate kod divai. Timo sawono higa ka higa nyiso ni wadwoko erokamano nikech hera ma Nyasaye kod Yesu nonyisowa.—Som Luka 22:19, 20.

Gin jomage monego ocham makate kendo madho divai e sawono?

Ka ne Yesu ohango nyiso jolupne mondo opar thone, ne owuoyo e wi singruok moro. (Mathayo 26:26-28) Singruogno ne oyawo thuolo ne joma nok kende mondo gibed ruodhi kod jodolo e polo. Kata obedo ni ji mathoth e ndalogi chokore e sawono mondo gipar tho mar Yesu, mana joma nie singruogno e ma chamo makate kendo madho divai.—Som Fweny 5:10.

Kuom higni 2,000 kama, Jehova osebedo ka yiero joma biro bedo ruodhi e polo. (Luka 12:32) Kwan mar jogo tin ahinya kopim gi mar joma biro dak e pinyka.—Som Fweny 7:4, 9, 17.

Mondo iyud weche momedore ne sula mar 5 e buk miluongo ni Ang’o ma Muma puonjo Kuom Adier?, mogo gi Joneno mag Jehova

Inyalo gole bende e www.jw.org/luo