Ang’o Momiyo Onego Ipuonjri Muma?

Be isegapenjori penjo kaka mago? Kapo ni isepenjori penjogo, ng’e ni nitie ji mang’eny ma bende penjogo osechando. Ji mang’eny e piny paro matut ahinya kuom penjogo. To be wanyalo yudo dwoko mag penjogo?

Ji mang’eny nyalo dwoko ni, “Ee!” Nikech ang’o? Nikech Muma e ma osemiyogi dwoko mag penjo madongogo. Be diher ng’eyo dwoko ma Muma chiwo e wi penjogo? Ka en kamano, to inyalo kwayo mondo Joneno mag Jehova opuonjre kodi Muma ma onge chudo.a

En adier ni kodok korka wach puonjruok Muma, jomoko wachoga niya: “Adich ahinya,” “winjo weche manie Muma tek,” kata “ok anyal singoni ni abiro yudo thuolo mar puonjore Muma.” Kata kamano, jomoko to oyie puonjore Muma. Wawinj ane gima moko kuomgi wacho.

• Miyo moro miluongo ni Gill, ma a e piny England wacho kama: “Ne asedhi e kanise mag Jo-Katholik, Protestant, Jo-Sikh, kod mar Jo-Budha, kendo ne apuonjora weche din e yunivasiti. Kata kamano, pod ne ok ayudo dwoko mag penjo ma ne an-go. Kae to bang’e, Janeno mar Jehova moro ne obiro lima e oda. Dwoko ma ne omiya kotiyo gi Muma ne omora ahinya, kendo mano nomiyo ayie puonjora Muma.”

• Dichwo moro miluongo ni Koffi, ma a e piny Benin wacho kama: “Ne an gi penjo mang’eny e ngimana, to pastawa ne ok omiya dwoko makare. Kata kamano, nitie Janeno mar Jehova moro ma ne odwoko penjoga duto kotiyo gi Muma. Kane openja kabe daher puonjora weche momedore, ne ayie.”

• Dichwo moro miluongo ni José, ma a e piny Brazil wacho niya: “Ne agombo ahinya ng’eyo chal mar jomotho. Ne aparoga ni jomotho nyalo hinyo joma ngima, kendo ne adwaro ng’eyo gima Muma puonjo e wi wachno. Omiyo, ne achako puonjora Muma gi osiepna moro ma ne en Janeno mar Jehova.”

• Ng’at moro miluongo ni Dennize, ma a e piny Mexico wacho kama: “Ne asomoga Muma to winjo tiende ne otama. Kae to Joneno mag Jehova moko nolima ma gilerona weche mogwaro ma ne okor e Muma. Ne adwaro ng’eyo weche mamoko ma ne anyalo puonjora e Muma.”

• Dhako moro miluongo ni Anju, ma a e piny Nepal wacho niya: “Chunya ne jachandore kabe Nyasaye dewa. Omiyo, ne ang’ado mar wuoyo gi Nyasaye ma Muma wuoyoe. Kinyne Joneno mag Jehova ne obiro e oda kendo ne ayie puonjora Muma kodgi.”

Weche ma jogo wacho paronwa gima Yesu nowacho: “Joma mor gin joma nigi riyo mar ng’eyo Nyasaye.” (Mathayo 5:3) Kuom adier, dhano nigi riyo mar ng’eyo Nyasaye. Nyasaye kende e ma nyalo tieko ne ng’ato riyono, kendo otimo kamano kotiyo gi Wachne ma en Muma.

Kuom mano, puonjruok mar Muma oriwo ang’o gini? To ere kaka onyalo konyi? Mago e penjo ma wadwaro nono e sula ma luwo mae.