WACH MADUONG’ MA GASET WUOYOE | BE DIHER PUONJORI MUMA?

Chenro mar Puonjruok Muma Mowinjore gi Ji Duto

Ji ong’eyo ni Joneno mag Jehova landoga wach maber. To be ing’eyo ni Joneno mag Jehova puonjorega Muma gi ji e piny mangima?

E higa mar 2014, Joneno mag Jehova mokalo 8,000,000 e pinje 240 nopuonjore Muma gi ji ma dirom 9,500,000 dwe ka dwe.a Parie ni kwan mar joma wapuonjorego Muma ohingo kwan mar ji manie moro ka moro kuom pinje ma dirom 140!

Mondo Joneno mag Jehova opuonjre Muma gi ji, gigoyo Muma, buge, gasede, kod buge mamoko ma lero Muma ma dirom bilion achiel gi nus, kendo gigoyo bugego e dhok 700 kama higa ka higa! Kinda ma gitimo mar goyo buge e dhok mang’eny kamano miyo ji thuolo mar yiero dhok ma digiher puonjorego.

DWOKO MAG PENJO MA JI PENJOGA E WI CHENRO MAR PUONJRUOK MUMA

Puonjruok Muma itimo e yo mane?

E puonjruok mar Muma, wayiero wach moro achiel, kae to wanono gima Muma wacho kuom wachno. Kuom ranyisi, Muma dwoko penjo kaka ma luwogi: Nyasaye en ng’a? En ng’at ma chalo nade? To be en gi nyinge? Odak kanye? Be wanyalo sudo machiegni kode? Gima otamoga ji mang’eny en ng’eyo kama wanyalo yudoe dwoko mag penjogo ei Muma.

Mondo wakony ji yudo dwoko mag penjo ma gin-go, watiyoga gi buk miluongo ni Ang’o ma Muma Puonjo Kuom Adier? ma nigi ite 224.b Ne olos bugni mondo okony ji winjo tiend puonj manie Muma. Bugno wuoyo e wi Nyasaye, Yesu Kristo, gimomiyo dhano chandore, wach chier, wach lamo, kod weche mamoko.

Puonjruogno itimo kanye, kendo itime tich adi?

Puonjruok inyalo tim kamoro amora kendo e odiechieng’ kod sa moro amora ma ber kodi.

Puonjruok Muma kawo seche ma romo nade?

Ji mang’eny puonjorega Muma kuom sa achiel kama juma ka juma. Kata kamano, ng’ato nyalo puonjore kuom seche mowinjore kode. Omiyo, wanyalo loso chenro mowinjore gi ng’ato ang’ata. Jomoko puonjore kuom dakika 10 kata 15 juma ka juma.

Ng’ato chulo pesa adi mondo opuonjre Muma?

Onge chudo moro amora ma ng’ato golo mondo opuonjre Muma, kendo buge mitiyogo ichiwo nono. Mano owinjore gi gima Yesu nonyiso jopuonjrene niya: “Nuyudo nono, omiyo chiwuru nono.”—Mathayo 10:8.

Puonjruogno duto kawo ndalo ma romo nade?

Inyalo puonjori Muma kuom ndalo ma owinjore kodi. Buk mar Ang’o ma Muma Puonjo Kuom Adier? nigi sula 19 e iye. Inyalo puonjori sula moro amora kuom mago kata sulago duto kuom kinde ma in e ma ihero.

Be ochuno ni abed Janeno mar Jehova bang’ puonjruok?

Ooyo. Wang’eyo ni ng’ato ka ng’ato nigi ratiro mar yiero gima oyiego. Kata kamano, joma puonjore Muma biro timo yiero makare.

Anyalo yudo weche momedore kanye?

Websaitwa mar jw.org/luo chiwo weche makare e wi gik ma Joneno mag Jehova oyiego kod gik ma gitimo.

Ere kaka anyalo kwayo puonjruok mar Muma?

Ji kwayo puonjruok mar Muma e Intanet, kuom ndiko barua, kata ka gitiyo gi buk manyiso nembni mag simo mag joma odak e alworagi

Inyalo pong’o fom manie Websaitwa mar jw.org/luo.
Inyalo oro kwayo mari kitiyo gi adres mowinjore kodi manie ite mar ariyo e gasedni.
Inyalo goyo ne Joneno mag Jehova man machiegni kodi simo, kitiyo gi buk manyiso nembni mag simo mag joma odak e alworau.

a Joneno mag Jehova puonjorega Muma gi ji achiel achiel, kata gi grup.

b Ogoye gi Joneno mag Jehova. Kwan mosego mar bugni okalo milion 230 e dhok mokalo 260.

KAKA PUONJRUOK MUMA OSEKONYO JOOT

“Kane chiega ochako puonjore Muma, ne aneno lokruoge madongo ma ne otimo. Ngimawa nochako bedo maber. Siso ma ne an-go mar ng’eyo gik ma ne opuonjore ne omiyo an bende achako puonjora. Gik ma ne apuonjora nokonya bedo ng’at maber. Puonjruok Muma ne okonyowa bedo gi winjruok maber e kindwa.” —Eziquiel.

“Kane achako puonjora Muma, ne aweyo tiyo gi yedhe ma mero ji, ne aweyo kong’o, kendo Muma ne okonya weyo bedo ja mirima. Tinde oda ok oyuothore. Ahero jooda ahinya kendo atimonegi gik ma miyo gibedo mamor. Sani an ng’at mamor ahinya.” —Karen.

“Ji mang’eny ne jara ka ne apuonjora Muma. Kata kamano, chwora to ne oriwa lwedo, ne onyisa kama: ‘Ok adew gima ji wacho. Amor ka aneno kaka puonjruok Muma osemiyo ibedo ng’at maber. Dhi nyime timo gima itimono.’ Ngimawa koro ber moloyo!” —Viniana.