Ere Kaka Joneno mag Jehova Puonjoga Ji Muma?
Joneno mag Jehova nyalo konyi puonjori Muma. Chenrowa mar puonjruok Muma nyalo konyi:
Bedo mamor
Bedo osiep Nyasaye
Ng’eyo gik ma Muma singo ma biro timore e kinde mabiro
Sulani dwoko penjogi:
Be anyalo temo puonjruok matin komondi e ka ane ka be anyalo dhi nyime?
Ka ayie puonjora Muma, be ibiro chuna mondo abed Janeno mar Jehova?
To nade ka nasegapuonjora gi Joneno mag Jehova e kinde mokalo? Be anyalo puonjora kendo?
Ere kaka wapuonjoga ji Muma?
Janeno mar Jehova ma tayi biro konyi puonjori Muma e yo mochanore, kunono wach moro bang’ machielo. Ibiro puonjori weche manie Muma mosmos kod kaka wechego nyalo konyi, kitiyo gi buk miluongo ni Inyalo Dak gi Mor Nyaka Chieng’! Mondo ing’e mathoth, ne vidioni.
Be dwarore ni achul pesa e ka puonja Muma?
Ooyo. Joneno mag Jehova luwo puonj ma Yesu nomiyo jolupne niya: “Nuyudo nono, omiyo chiwuru nono.” (Mathayo 10:8) E wi mano, onge pesa moro amora mibiro chulo sama omiyi gige puonjruok, moriwo Muma kod bug Inyalo Dak gi Mor Nyaka Chieng’!
Puonjruok kawo kinde ma romo nade?
Bug puonjruok nigi sula 60. Thuolo mibiro kawo biro luwore gi chal mari, kata kamano, jopuonjre mang’eny tiekoga sula achiel juma ka juma, kata sula mokalo kanyo.
Ere kaka anyalo chako?
1. Pong’ fom ma yudore e websaitwa. Weche mindiko e fomno wabiro tiyogo mana e tudruok kodi mondo achiel kuom Joneno mag Jehova obi opuonji.
2. Ng’at ma biro puonji Muma biro tudore kodi. Japuonjni biro leroni kaka puonjruok chalo, kendo obiro dwoko penjo moro amora minyalo bedogo.
3. Ibiro timo chenro gi japuonjni. Unyalo puonjoru aching’ kata unyalo tiyo gi simu, yore mag tudruok e vidio, barupe, kata email. Puonjruok ka puonjruok nyalo kawo sa achiel kama, kata kamano, samoro unyalo puonjoru kuom dakika machuok kata momedore ka luwore gi chal mari.
Be anyalo temo puonjruok matin komondi e ka ane ka be anyalo dhi nyime?
Ee. Mondo itim kamano, pong’ fom ma yudore e websaitwa. Sama achiel kuom Joneno mag Jehova otudore kodi, nyise ni diher temo puonjruok matin komondi mondo ine ka be puonjruok biro mori kata ooyo. Obiro tiyo gi brosua mar Inyalo Dak gi Mor Nyaka Chieng’! ma nigi sula adek mag chako puonjruok Muma, mondo okonyi neno ka be puonjruok biro mori.
Ka ayie puonjora Muma, be ibiro chuna mondo abed Janeno mar Jehova?
Ooyo. Kata obedo ni Joneno mag Jehova ohero puonjo ji Muma, ok gichun ng’ato ang’ata mondo odonj e din-gi. Kar mano, wakonyo mana ji ng’eyo gima Muma wacho, kendo wang’eyo maber ni ng’ato ka ng’ato nigi ratiro mar yie gi gik mopuonjore kata ooyo.—1 Petro 3:15.
Be anyalo tiyo gi Mumba?
Ee. Oyieni tiyo gi Muma moro amora mihero. Kata obedo ni wahero tiyo gi Muma mar Loko mar Piny Manyien nikech owinjore maler kendo oloke e yo makare, wang’eyo bende ni ji mang’eny ohero tiyo gi loko mamoko ma gilonygo.
Be anyalo gwelo jomamoko e puonjruokna?
Ee. Inyalo gwelo joodu duto kata osiepeni.
To nade ka nasegapuonjora gi Joneno mag Jehova e kinde mokalo? Be anyalo puonjora kendo?
Ee. Yor puonjruok ma watiyogo sani biro mori moloyo machon, nikech wasetimo lokruoge moko mondo owinjre gi chal ma ji nitie e kindewagi. Buk ma sani watiyogo nigi vidio mang’eny kod pichni, kendo omiyo japuonj gi japuonjre thuolo mar goyo mbaka mang’eny kopim gi bugewa machon.
Be anyalo puonjora Muma kenda ma onge ng’ama taya?
Ee. Kata obedo ni jopuonjre mang’eny yudoga ber mathoth ka gin gi ng’ama tayogi e puonjruok, jomoko nyalo yiero ni gipuonjre kendgi komondi. Pej mar Gik Mipuonjruokgo Muma nigi gik mopogore opogore ma nyalo konyi sama ipuonjori. Ma luwogi gin moko kuom gik ma nyalo konyi:
Vidio mag Muma. Vidio machiekogi chiwo dwoko e wi penjo madongo mag Muma.
Dwoko Penjo ma Ji Nigo e Wi Muma. Sulagi dwoko penjo mopogore opogore ma ji nigo e wi Muma.
Lero Tiend Ndiko mag Muma. Ng’e tiend weche moko mong’ere motigo e Muma.