Bende Diher Ng’eyo Muma Ahinya?

Ang’o Momiyo Dwarore Ni Isom Muma?

MUMA ok chal kod buge moko. Oting’o chike moa kuom Nyasaye majahera. (1 Jo Thessalonika 2:13) Ka ipuonjori Muma to iluwo puonjruokgo, ibiro yudo kony moloyo. Ibiro medo hero Nyasaye kendo ibiro bedo kode machiegni. En ema ochiwo ‘Mich mabeyo duto gi chiwo mabeyo duto.’ (Jakobo 1:17) Ibiro ng’eyo kaka onego ilame. E kinde mag chandruok, Nyasaye nyalo konyi. Ka idak kaluore gi chike mantie e Muma, Nyasaye biro miyi ngima mochwere.—Jo Rumi 6:23.

Muma ni kod adiera mapuonjo ji. Jogo mapuonjore Muma weyo puonjruok mag miriambo momako ngima ji gana gi gana. Kuom ranyisi, ng’eyo adiera mar gima timore ka watho miyo ok waluor ni jo motho nyalo hinyowa kata ni wedewa kod osiepewa motho chandore. (Eklesiastes 9:5, 10) Puonj mar Muma mar chier jiwo jogo ma joheragi otho. (Johana 11:25) Ng’eyo adiera kuom malaika maricho miyo watang’ kod yoregi kendo konyowa ng’eyo ni ang’o momiyo chandruok nge’ny e piny.

Chike mag Nyasaye mantie e Muma nyiso kaka wanyalo dak e yoo manyalo konyowa. Kuom ranyisi, bedo ng’at man gi timbe “moritore” konyowa dak ngima maber. (1 Timotheo 3:2) Ka ‘walwokre a e chido mar ringruok kendo mar roho,’ ok waketh dendwa. (2 Jo Korintho 7:1) Luwo puonj mantie ei Muma bende konyowa bedo jo mamor e kend kendo konyowa bedo jo malong’o.—1 Jo Korintho 6:18.

Ka iluwo wach Nyasaye, inibed ng’at mamor ahinya. Ng’eyo Muma konyowa bedo gi kwe kendo miyowa geno. Ng’eyo Muma bende konyowa bedo gi kido kaka hera, mor, kwe, ng’uono, to kod yie. (Jo Galatia 5:22, 23; Jo Efeso 4:24, 32) Kido mabeyo kaka mago konyowa bedo chwo, mon, wuoro, mine kata nyithindo mabeyo.

Bende seche moko isegaparo ndalo mabiro? Ng’eyo weche mokor e Muma nyisowa ndalo ma wadakie. Weche mokorgo nyisowa kaka piny chalo kindegi kendo ginyisowa kaka Nyasaye chiegni loko pinyni mondo obed paradis.—Fweny 21:3, 4.

Kaka Inyalo Konyi Ng’eyo Muma

Dipoka isetemo somo Muma to iyudo ni otek winjo. Nyalo bedo ni ok ing’eyo kaka inyalo yudo duoko mag penjo magi e Muma. Ok in kendi. Wan duto wadwaro kony mondo wang’e wach Nyasaye. Joneno mag Jehova yudore e pinje 235, kendo gichiwo puonj mag Muma ni ji gana gi gana ma onge chudo. Gimor konyi in bende.

Ber mondo ipuonjri Muma mos mos ka ichako kod puonj mag Muma mayot. (Jo Hibrania 6:1) Kaka imedo tiegori gi “chiemo motegno,” ibiro ng’eyo adiera matut mantiere e Muma. (Jo Hibrania 5:14) Weche duto mag puonjruok wuok e Muma. Kitepe mawuoyo kuom Muma kaka Nyasaye Dwaro ni Mondo Watim Ang’o? nyalo konyi yudo duoko mag Muma kuom penjo mopogore opogore.

Inyalo Kawo Thuolo Juma ka Juma Mondo Ipuonjri Muma?

Inyalo chan mondo ipuonjri Muma seche mihero kod kama ihero. Ji mang’eny puonjore Muma e utegi. Ma ok puonjruok mi riwo ji mang’eny dichiel. Itime kaka in iwuon idwaro kaluwore kod nyaloni mar winjo. Onge timo penj. Kendo onge gima nyalo kuodo wiyi. Ibiro ng’eyo weche Muma kendo ibiro bedo machiegni kod Nyasaye.

Onge chudo e puonjruokno. (Mathayo 10:8) Ichiwe nono ni ji duto mantie e dinde te kata ni jogo ma ok ni e din madwaro ng’eyo ahinya Wach Nyasaye.

Ng’at mane manyalo bedo e puonjruokni? Ji duto mantie e odi. Inyalo luongo osiepeni mondo gin bende giwinji wechegi. Bende kihero to inyalo bedo kendi iwuon.

Thothji kawo thuolo mar saa achiel e juma ka juma mondo gipuonjre Muma. Ka inyalo kawo thuolo mang’eny kata matin e juma ka juma, Joneno mag Jehova biro konyi.

Warwaki E Puonjruok

Mondo iyud puonjruok, dwar Joneno mag Jehova. Yoo achiel mar yudogi en ndiko kitiyo gi achiel kuom nonro mantie ka. Bang’e wabiro kelo ni ng’ato mabiro puonji Muma nono maonge chudo.

□ Orna uru kitabu Nyasaye Dwaro ni Mondo Watim Ang’o?

Nyis dhok midwaro.

□ Lima uru mondo ayud puonjruok mar Muma nono maonge chudo.

Ka ok onyisi e yo machielo, ndiko duto mokonyruokgo kani oa e The Bible in Luo, mar higa mar 1968