Asebedo Gik Moko Duto ne Ji Duto

NOYUDO asechako bedo gi siso mar dwaro ng’eyo adiera ka baba pok nowewa. Mama ne nigi buge malero Muma kendo nahero ng’iyo bugego ahinya to moloyo pichni ma ne ni e igi. Baba ne ok dwar ni mama onyisa gik ma ne opuonjore e Muma. To nikech ne adwaro ng’eyo tiend weche mang’eny kendo ne apenjoga penjo, mama ne puonjorega koda sama baba ne ongega pacho. Mano nomiyo ang’ado mar chiwora ne Jehova. Ne obatisa ka ajahigni apar e higa mar 1943 e taon mar Blackpool e piny England.

ACHAKO TIYO NE JEHOVA

Ka ne osetisa, ne achako dhi e tij lendo gi mama ma ok wabare. Ne watiyoga gi fonograf ahinya e tij lendo. Fonografgo ne pek ahinya kendo achiel ne nyalo romo kilo ang’wen gi nus. Parie ka ating’o achiel kuomgi kendo aywara kode!

Ka ne achopo jahigni 14, ne agombo bedo painia. Mama ne onyisa ni akwong awuo gi jarit-alwora. Jarit-alwora ne onyisa ni akwong apuonjra tich moro ma ne nyalo konya e weche mag yuto ka abedo painia. Ne atimo kamano. Bang’ tiyo kuom higni ariyo, ne apenjo jarit-alwora machielo ka anyalo bedo painia. Ne onyisa niya, “Iromo!”

Omiyo e higa mar 1949 dwe mar ang’wen, ne wauso kombe kod gik ot mamoko kae to wadar mi wadhi e taon mar Middleton, man machiegni gi Manchester kama ne wachakoe bedo jopainia. Bang’ dweche ang’wen, ne ayiero owadwa moro mondo watigo kanyachiel ka wan jopainia. Ofis ne onyisowa ni wadhi e kanyakla moro ma ne ochak manyien e taon Irlam. Minwa ne omakore gi nyaminwa machielo ma bende ne en painia kendo ne gilendo e kanyakla machielo.

Kata obedo ni ne an mana jahigni 17, an kaachiel gi owadwa ma ne wan-gono ne omiwa migawo mar tayo chokruoge nikech owete ma ne owinjore ne nok. Bang’ kinde, ofis ne okwaya mondo adhi e kanyakla mar Buxton, ma ne nigi jolendo manok kendo ma ne dwaro kony ahinya. Migepe ma ne atimo ka ne pod an rawera ne otiega ne migepe ma ne adhi yudo bang’e.

E higa mar 1951, ne aoro kwayo mondo adhi e Skul mar Gilead. Kata kamano, ka nochopo Desemba 1952, ne oluonga mondo adhi e tij lweny. Ne akwayo mondo kik adhi e lweny ka awacho ni an ng’at ma tiyo tij lando wach maber kuom thuolona duto, kata kamano, kot ne otamore mi ging’ado mondo otweya e jela kuom dweche auchiel. Ne ayudo barua ma gwela e klas mar 22 mar Gilead ka ne an e jela. Omiyo, e higa mar 1953 e dwe mar Julai, ne aidho meli miluongo ni Georgic ka adhi New York.

Ka ne achopo, nayudo thuolo mar dhi e chokruok mar New World Society Assembly e higa mar 1953. Bang’ chokruok ne aidho gach reru nyaka e taon mar South Lansing, New York, kama ne itimee skundno. Nikech eka ne awuok e jela, ne an mana gi pesa matin. Ka ne alor e gach reru, ne aidho bas ma tera South Lansing, to nikech ne aonge gi pesa, ne akwayo jawuoth wadwa moro mondo ochulna.

AYUDO MIGAWO MAR DHI E PINY MACHIELO

Ka ne wan e Skul mar Gilead, ne wayudo tiegruok maber ma ne nyalo konyowa mondo wabed “gimoro amora ma dwarore ne ji mopogore opogore duto” e tij misonari. (1 Kor. 9:22) An kaachiel gi owadwa Paul Bruun kod Raymond Leach ne omiwa migawo mar dhi e piny Philippines. Ne ochuno ni warit kuom dweche moko kapok wayudo visa magwa, kae to ne waidho meli ka wang’ado Rotterdam, nam mar Mediterranean, Suez Canal, Indian Ocean, Malaysia, gi Hong Kong. Wuodhno nokawowa ndalo 47 ka wan e nam! Gikone ne wachopo e boma mar Manila chieng’ Novemba 19, 1954.

Bang’ chopo e pinyno, ne ochuna ni atim lokruok mondo ang’i gi jopinyno, alwora manyien, kendo puonjora dhok manyien. Kata kamano, waduto ji adek ne omiwa migawo e kanyakla moro ma ne ni Quezon City, kama thoth ji ne wachoe Kisungu. Bang’ dweche auchiel, noyudo wasepuonjore weche moko matin e dho Tagalog. Migapwa maluwo ne dhi konyowa mondo wapuonjre dhokno maber.

Chieng’ moro achiel e dwe mar Mei e higa mar 1955 ka ne wa a e lendo gi Owadwa Leach, ne wayudo barupe modhuro e odwa. Barupego nokonyowa ng’eyo ni oketwa jorit-alwora. Ne an mana jahigni 22 kende, kata kamano, migawono nomiya thuolo mar bedo gik moko duto ne ji duto.

Kuom ranyisi, twak mar ji duto ma ne akwongo golo, nagolo ka an jarit-alwora kendo owete gi nyimine ne ochokore e lela e nyim duka moro. Nafwenyo e kindego ni e piny Philippines, twak mar ji duto ne igolo e lela kuonde ma ji ochokoree mang’eny! Ka ne alimo kanyakla mopogore opogore, ne agologa twege mag ji duto kuonde ma ji yueyoe, e chirni, e nyim ute madongo ma ji ne chokoree, pewe ma ituoge opira, kod e nderni mag taonde mopogore opogore. Chieng’ moro ka ne wan San Pablo City, koth ne ochue matek ma omona golo twak mar ji duto e chiro, omiyo ne akwayo owete ma ne tayo weche ka be nanyalo golo twagno e Od Romo. Bang’e, owetego nopenja ka ne wanyalo chiwo ripot ka be mano ne en chokruok motim e lela nikech ne ok otime kama ji ng’enyie!

Ne anindoga e ute owete gi nyimine. Kata obedo ni utegigo ne tindo, ne oritgi maber. Ne anindo e par e dier ot mar bao. Nikech baf ne onge, ne aluokoraga e laro. Ne aidhoga mtokni matindo tindo kata bas, to seche moko ne aidhoga yie ka adhi e chulni mamoko. Kuom higni te ma asetiyogo ne Jehova, pok ne abedo gi mtoka.

Tij lendo kendo limo kanyakla mopogore opogore ne okonya mondo ang’e dho Tagalog. Ne ok adhi e skul moro amora mar dho Tagalog, to ne apuonjora kuom winjo kaka owete ne wacho dhokno e tij lendo kod e chokruoge. Owete ne oikore puonja dhokno, omiyo ne gihore koda kendo ne gikonya seche ma ne awacho gimoro e yo marach.

Kaka kinde ne medo kalo, migepe ma ne amedo yudo nomiyo atimo lokruoge momedore. E higa mar 1956, ka ne Owadwa Nathan Knorr olimowa, ne omiya migawo mar rito weche tudruok gi ji e chokruok maduong’. Ne aonge gi lony moro amora e migawono, omiyo jomamoko ne okonya. Ne wabedo gi chokruok machielo maduong’ ka higano pok orumo kendo Owadwa Frederick Franz ma wuok e ofis maduong’ nobiro e chokruogno. E kinde ma ne an jarit-program e chokruok maduong’, yo ma Owadwa Franz ne timogo lokruok kaluwore gi chal mar owete ne okonya mondo an bende atim kamano. Owete ne mor ahinya ka ne gineno Owadwa Franz korwako law Jo-Filipino miluongo ni barong Tagalog sama ne ogolo twak mar ji duto.

Ne ochuna ni atim lokruok momedore ka ne oketa jarit-distrikt. E kindeno, ne wanyisoga ji sinema mar The Happiness of the New World Society, ka ne walendo e lela. Seche moko kute ma fuyo ne chandowa ahinya. Ler ma ne wuok e projekta e ma ne ywayogi kae to ne gimoko kanyo. Yweyo projekta bang’e ne ok en tich mayot! Timo chenro mar nyiso sinemano ne ok yot ruok, kata kamano, ne wawinjo maber ahinya neno kaka ji ne mor ng’eyo riwruok mar oganda Jehova ma yudore e piny mangima.

Bisobe mag Jo-Katholik ne temo chuno joloch mag sirkal mondo kik miwa pamit mar timo chokruok. Samoro ne gitemo chochowa kuom goyo olang’ mar kanisagi ka ne wagolo twak machiegni gi kanisagi. Kata kamano, tij lendo ne odhi nyime kendo thoth joma odak e alworago sani gin jotich Jehova.

MIGEPE MA NOMIYO ATIMO LOKRUOK MOMEDORE

E higa mar 1959, ne ayudo barua ma ne igwelago mondo adhi e Bethel. Mano nomiyo amedo puonjora gik mathoth. Bang’ kinde, ne omiya migawo mar bedo jarit malimo ofise Joneno e pinje mamoko. Ka ne adhi limbe piny moro, ne aromo gi nyaminwa moro miluongo ni Janet Dumond ma ne en misonari e piny Thailand. Ne wabedo osiepe kuom kinde kae to bang’e ne wakendore. An gi jaoda wasetiyo ne Nyasaye gi thuolowa duto kuom higni 51.

Asebedo gi thuolo ma jaber mar limo jotich Jehova e pinje 33. Amor ahinya ni migepe ma ne akwongo yudogo ne okonya ng’eyo kaka anyalo tudora gi ji mopogore opogore! Pinje ma ne adhiyego nokonya neno kaka Jehova ohero ji mawuok e ogendini duto.—Tich 10:34, 35.

POD ADHI NYIME TIMO LOKRUOK

Mano kaka amor tiyo ne Jehova kanyachiel gi owete e piny Philippines! Kwan mar jolendo osemedore nyadi par kopim gi kinde ma ne achako tiyo ne Jehova e pinyni. An gi Janet pod wadhi nyime tiyo ne Jehova e Bethel ma Philippines man Quezon City. Kata obedo ni asetiyo ne Jehova kuom higni mokalo 60 e pinje maoko, pod aikora timo lokruok mondo atim gima Jehova dwaro. Lokruoge mosebedo ka timore machiegnini nyiso ni nyaka waikre lokore mondo eka wati ne Jehova kod owetewa.

Wasebedo ka watimo gima Jehova dwaro ni watim to mano osemiyo ngimawa obedo maber. Wasetimo lokruoge ma dwarore mondo eka wakony owete e yo maber moloyo. Pod wadhi nyime timo kar nyalowa mondo wabed gik moko duto ne ji duto.