Penjo Moa Kuom Josombwa
Jaote Paulo nondiko ni Jehova ‘ok obi weyo mondo otemwa mokalo ma wanyalo nanoe.’ (1 Kor. 10:13) Be mano koro nyiso ni Jehova yieroga motelo kit tembe mong’eyo ni wanyalo nanoe kae to oweyo mondo tembego oyudwa?
Ne ane gimomiyo paro ma kamano ok owinjore. Owadwa moro ma wuode nodere nopenjore niya: ‘Dibed ni Jehova nosenono motelo moyudo ni kata ka wuodwa odere to an kaachiel gi jaoda wabiro mana nyagore gi wachno?’ Be en adier ni Jehova e ma chiko gik moko duto ma timore e ngimawa?
Ka wanono matut weche ma Paulo nondiko e 1 Jo-Korintho 10:13, waneno ni onge kamoro amora e Muma ma wacho ni Jehova ng’eyoga motelo tembe ma wanyalo nanoe kae to oweyo mondo tembego oyudwa. We wanon ane weche moko ang’wen manyiso gimomiyo wawacho kamano.
Mokwongo, Jehova nomiyo dhano mich ma jaber, ma en thuolo mar timo yiero. Jehova dwaro ni watim yierowa wawegi. (Rap. 30:19, 20; Jos. 24:15) Ka watimo yiero makare, to obiro tayowa e ngima. (Nge. 16:9) To ka watimo yiero ma ok kare ngimawa biro bedo marach. (Gal. 6:7) Ka dine bed ni Jehova e ma yiero ni en tem ma ne monego oyudwa, donge mano nyiso ni dine oketho ratiro momiyowa mar timo yiero?
Mar ariyo, nikech gik ma timore apoya nyalo yudo ng’ato ang’ata, Jehova ok bi geng’owa mondo gigo kik yudwa. (Ekl. 9:11) Bedo kama ok owinjore e sa ma ok owinjore nyalo miyo ng’ato oyud chandruok. Yesu nowuoyo kuom ji 18 moko ma notho nikech ot moro maduong’ nolwar kuomgi. Nowacho bende ni tho mar jogo ne ok en dwaro mar Nyasaye. (Luka 13:1-5) Omiyo, ok en gima owinjore wacho ni Nyasaye ng’adoga motelo ni en ng’a ma dhi tho, to en ng’a ma dhi kwo sama masira moro otimore.
Mar adek, ng’ato ka ng’ato kuomwa ni gi ting’ mar nyiso ni Nyasaye e ma ni gi ratiro mar bedo jaloch. Par ni Satan pod hango ni ji lamo Jehova nikech gik ma Jehova miyogi kendo ni ka giromo gi tembe to gibiro weyo makore kode. (Ayub 1:9-11; 2:4; Fwe. 12:10) Kapo ni Jehova ogeng’owa mondo kik wayud tembe moko mana nikech oneno ni ok wanyal nano e tembego, donge mano nyalo nyiso ni kare Satan nowacho adier?
Mar ang’wen, ok ochuno ni Jehova ong’e gik moko duto ma biro timorenwa e kinde ma biro. Bedo gi paro ni Nyasaye e ma yiero tembe monego oyudwa chalre achala gi wacho ni Jehova ong’eyo gimoro amora ma biro timore e ngimawa. Kata kamano, mano ok en puonj manie Ndiko. En adier ni Nyasaye ni gi nyalo mar ng’eyo gik ma biro timore e kinde ma biro. (Isa. 46:10) Kata kamano, Muma nyisowa ni Jehova ni gi ratiro mar yiero gik modwaro ng’eyo e wi kinde ma biro. (Cha. 18:20, 21; 22:12) Omiyo, Jehova oherowa kendo ohero gik makare, omiyo, ok odwar ketho mich ma jaber ma osemiyowa ma en thuolo wan-go mar timo yiero.—Rap. 32:4; 2 Kor. 3:17.
To kare ere kaka wanyalo winjo tiend weche ma Paulo nowacho ni: ‘Nyasaye ok bi weyo mondo otemwa mokalo ma wanyalo nanoe’? Paulo ne lero gima Jehova timo sama wakalo e tem moro to ok gima otimo kapok tem oyudowa. Weche ma jaoteno notiyogo miyo wabedo gadier ni kata bed ni wakalo e tem mane, Jehova oikore konyowa ka waketo genowa kuome. (Zab. 55:22) We wanon ane weche moko ariyo momiyo Paulo nowacho kamano.
Mokwongo, tembe ma wakaloe bende “yudo ji duto.” Mano tiende ni tembe ma yudowa osegayudo jomamoko bende. Mano nyiso ni wanyalo nano e tembe ma kamago ka wageno kuom Nyasaye. (1 Pet. 5:8, 9) Weche molworo ndiko mar 1 Jo-Korintho 10:13, nyiso ni Paulo ne wuoyo kuom tembe ma Jo-Israel noyudo ka ne gin e thim. (1 Kor. 10:6-11) Tembe duto ma Jo-Israel noyudo ne gin mana ma pile kendo joma nogeno kuom Jehova nonano e tembego. Kata kamano gima lit en ni Jo-Israel moko notamore winjo Jehova nikech ne giweyo mondo gombo maricho ochikgi ma giketho chike Nyasaye
Mar ariyo, “Nyasaye en ng’at migeno.” Gik ma Nyasaye notimo ne joge e kinde mokalo nyiso maler ni ohero “jogo mohere kendo momako chikne.” (Rap. 7:9) Gik ma notimogo nyiso ni en Nyasaye ma chopo singoge. (Jos. 23:14) Kaluwore gi gik ma Jehova notimo ne joge e kinde mokalo, mano miyo wabedo gadier e wi weche ariyo maluwogi: (1) Nyasaye ok bi yie mondo tem moro amora ma yudowa obed matek machop kama koro ok wanyal nano, to (2) ‘obiro losonwa yo mar wuok’ e tem.
Jehova “hoyowa e masichewa duto”
Ere kaka Jehova loso ne joma ogeno kuome yo mar wuok e tem? En adier ni Jehova nyalo golonwa tem moro amora ma wakaloe. Kata kamano, Paulo nowacho ni Jehova ‘biro losonwa yo mar wuok mondo wabed gi nyalo mar nano.’ Omiyo, kinde mang’eny, Jehova “losonwa yo mar wuok” e tem kuom miyowa gik ma nyalo konyowa nano e yo maber. Ne ane yore moko ma Jehova tiyogo mondo olosnwa yo mar wuok e tem:
Jehova “hoyowa e masichewa duto.” (2 Kor. 1:3, 4) Jehova nyalo hoyo pachwa kod chunywa kotiyo gi Wachne, roho maler, kod chiemb chuny ma jatich mogen miyowa.—Mat. 24:45; Joh. 14:16; Rumi 15:4.
Onyalo tayowa kotiyo gi roho maler. (Joh. 14:26) Sama tem moro oyudowa, roho maler nyalo konyowa paro weche ma wasesomo e Muma to mano nyalo miyo wakaw okang’ mowinjore.
Onyalo konyowa kotiyo gi malaikene.—Hib. 1:14.
Onyalo konyowa kokalo kuom Jokristo wetewa ma biro hoyowa kokalo kuom wechegi mang’won kod gik mabeyo ma gibiro timonwa.—Kol. 4:11.
Weche ma Paulo nondiko e 1 Jo-Korintho 10:13 puonjowa ang’o? Jehova ok yier ni en tem mane monego oyudwa. Kata kamano, sama tem moro amora oyudowa, wach ma wanyalo bedogo gadier e ma: Ka wageno kuom Jehova gi chunywa duto, wanyalo bedo gadier ni onge tem moro amora ma yudowa ma biro tamowa nanoe. Obiro losonwa yo mar wuok mondo wanan e tem. To mago doko weche ma jiwowa!