“Ng’a Moguedhi En Jalo ma Nano Kiteme”
1 Jokristo duto nyaka yud tembe. (2 Timo. 3:12) Tembe nyalo biro e yor tuoche, chandruok mag yuto, sand, kata e yore mamoko mang’eny. Tembe ma Satan kelo gin mag duokowa chien, mag miyo wawe tijwa mar lendo kaka Jokristo, kata miyo wawe tiyo ne Nyasaye. (Ayub 1:9-11) Ere kaka nano e bwo tembe kelo mor?—2 Pet. 2:9.
2 Ikri Ne Tembe: Jehova osechiwonwa Wachne moting’o adiera, moriwo nyaka weche mawuoyo kuom ngima Yesu koda gik ma ne opuonjo. Ka wawinjo gik ma Yesu wacho kendo timogi, waguro mise motegno mamiyo wabedo moikore ne tembe. (Luka 6:47-49) Bende wayudo teko kokalo kuom chenro mamoko kaka, owetewa ma Jokristo, chokruoge mag kanyakla, koda buge malero Muma mondiki gi jatichno mogen kendo mariek. Wabedo thuolo tiyo gi lamo, ma en mich moa kuom Nyasaye.—Math. 6:13.
3 Jehova bende osemiyowa geno. Ka waketo geno motegno e singo mag Jehova, geno ma wan-go bedo “loch mogur ni chunywa; en loch ma ok gingni, ma omoko matek.” (Hibr. 6:19) E kinde ma ne Muma indiko, yiedhi ne ok wuog e dho wath ma onge rachung kata loch, kata kinde ma kit yamo ne ber. Ka yamo mager ne nyalo chakore apoya, wito rachung e nam ne nyalo siro yie mondo kik yamo tere e wath motimo lwendini. Kamano bende, ka wagero yie marwa sani kuom singo mag Nyasaye, mano biro miyo wachung’ motegno ka yembe mager mag chandruok ochopo. Chandruok nyalo chopo apoya. Kata obedo ni mokwongo ji e Lustra ne orwako wach ma Paulo kod Barnaba ne lando, mano ne olokore apoya kane jo akwede ma Jo-Yahudi ochopo.—Tich 14:8-19.
4 Nano Kelo Mor: Ka wachung’ motegno e tij lendo kata obedo ni waromo gi akwede, mano miyowa kuwe e chunywa. Wabedo mamor seche ma ikwanowa ni waromo nwang’o achaye nikech Kristo. (Tich 5:40, 41) Nano e bwo chandruok konyowa nyago kido mabeyo kaka bolruok, winjo wach, kod nano e yo makare chuth. (Rapar 8:16; Hibr. 5:8; Jak. 1:2, 3) Tim mar nano puonjowa keto geno kuom Jehova, kuom singo mage, kendo ringo ire.—Nge. 18:10.
5 Wang’eyo ni tembe gin gik makalo. (2 Kor. 4:17, 18) Tembe miyowa thuolo mar nyiso okang’ ma waherogo Jehova. Ka wanano e bwo tembe, wanyalo chiwo dwoko ne akwede mag Satan. Kuom mano, ok wajogi! “Ng’a moguedhi en jalo ma nano kiteme; nikech koseloyo temruok, noyud osimbo mar ngima.”—Jak. 1:12.
[Weche manie ite mar 1]
(Odhi nyime e ite mar 2, dire koracham)
[Weche manie ite mar 2]
Nano e Bwo Tem (Odhi nyime)