Riw Loch mar Jehova Lwedo!

1, 2. Ng’ato ka ng’ato kuomwa nyaka bed gadiera e wi wach mane? (Ne picha man malo.)

MANA kaka ne wapuonjore e sula mokalo, Jachien oseramo ni yo ma Jehova lochogo ok ber kendo ni dhano nyalo dak maber ka gichikore kendgi. Be Satan nowacho adier? Temie paro ni dhano odak nyaka chieng’ ka gichikore giwegi. Be ginyalo dak maber ka Nyasaye ok otayogi? Be in iwuon inyalo bedo mamor ka idak nyaka chieng’ to Nyasaye ok tayi?

² Onge ng’ato ang’ata ma nyalo chiwoni dwoko mag penjogo. Ng’ato ka ng’ato nyaka par matut e wi penjogo. Sama watimo kamano, onego onere ayanga ni Jehova kende e ma nigi ratiro mar bedo jaloch. Lochne e ma ber kendo onego wariw lochneno lwedo gi chunywa duto. Muma nyisowa gimomiyo ber ka watimo kamano. Kuom ranyisi, ne ane gima Muma nyisowa e wi ratiro ma Jehova nigo mar bedo jaloch e polo gi piny.

JEHOVA E MA NIGI RATIRO MAR BEDO JALOCH

3. Ang’o momiyo Jehova kende e ma nigi ratiro mar bedo jaloch?

³ Jehova e ma nigi ratiro mar bedo jaloch e polo gi piny nikech en Nyasaye ma nyalo duto kendo en e Jachuech. (1 We. 29:11; Tich 4:24) Jaote Johana noneno e fweny ka Jokristo 144,000 ma biro locho gi Kristo e polo wacho niya: “In Jehova Nyasachwa, in e ma iwinjori yudo duong’, gi luor, kod teko nikech ne ichueyo gik moko duto, kendo gigo ne obetie kendo ne ochuegi nikech dwachi.” (Fwe. 4:11) Nikech Jehova e ma nochueyo gik moko duto, en gi ratiro mar locho e wi gik moko duto.

4. Ang’o momiyo kwedo loch mar Jehova en tiyo marach gi thuolo mar timo yiero ma omiyowa?

⁴ Onge gimoro amora ma Satan osechueyo. Omiyo, oonge gi ratiro moro amora mar bedo jaloch e polo gi piny. Satan, Adam, kod Hawa nonyiso ayanga ni tokgi ne tek ka ne ging’anyo ne loch mar Jehova. (Yer. 10:23) En adier ni ne gin gi thuolo mar timo yiero omiyo, ne ginyalo yiero mondo Nyasaye kik tagi. Be mano koro nonyiso ni ne gin gi ratiro mar ng’anyo ne Nyasaye? Ooyo. Thuolo mar timo yiero konyo ji mathoth mondo otim yiero ma beyo pile ka pile. Kata kamano, bedo gi thuolono ok migi ratiro mar ng’anyo ne Jachuech ma nomiyogi ngima. Nenore maler ni ng’anyo ne Jehova en tiyo marach gi thuolo mar timo yiero ma omiyowa. Jehova nochueyo dhano mondo obed e bwo lochne ma kare.

5. Ang’o momiyo wan gadier ni buche ma Jehova ng’ado ni kare?

⁵ Nitie gima chielo ma nyiso ni Jehova e ma nigi ratiro mar bedo jaloch. Olocho e yo maber kendo ong’ado bura e yo ma kare. Jehova wacho niya: “An Jehova man gi ng’wono, mang’ado bura kare, matimo tim makare e piny: ni mar gigi e mamorgo.” (Yer. 9:24) Ok oti gi chike ma dhano morem oloso mondo okonye ng’eyo gik ma kare kod ma ok kare. Nikech ong’ado bura e yo ma kare, nomiyo dhano chike ma tayogi. ‘Tim matir kod ng’ado bura gin mise mar kom ruodhe’ omiyo, wan gadier ni chikene, puonjge, kod buche mong’ado ni kare. (Zab. 89:14; 119:128) Kata obedo ni Satan nohango ni loch mar Jehova rach, en owuon lochne osebedo gi mibadhi kendo pok okonyo dhano e yo moro amora.

6. En wach mane machielo ma miyo Jehova bedo gi ratiro mar locho e wi piny?

⁶ E wi mano, Jehova e ma owinjore obed jaloch nikech en gi rieko ma onyalo tayogo chuech manie polo kod manie piny. Kuom ranyisi, nomiyo wuode teko mar chango tuoche ma notamo lakteche thiedho. (Mat. 4:23, 24; Mar. 5:25-29) Ka luwore gi Jehova, gima Yesu notimo ne ok en hono. Jehova ong’eyo kaka dendwa chalo kendo onyalo loso gimoro amora ma okethore e dendwa. Jehova bende nigi teko mar chiero jomotho kendo geng’o masiche ma yudo ji apoya.

7. Ere kaka rieko mar Jehova oloyo mabor rieko mar joma Satan chiko?

⁷ Sama joma ni e piny Satan manyo kaka ginyalo kelo kuwe e piny, Jehova to nigi rieko duto mar kelo kuwe e piny ma ngima. (Isa. 2:3, 4; 54:13) Sama wapuonjore e wi rieko mar Jehova, wan bende wabedo gi paro kaka mar jaote Paulo ma nondiko kama kitaye gi roho maler: “Yaye, mano kaka gueth mag Nyasaye ogundho, gi riekone, kendo ng’eyone tut miwuoro! To mano kaka buchene mong’ado fwenyo tek, kendo yorene tek nono chuth!”—Rumi 11:33.

LOCH MAR JEHOVA E MA BER

8. En ang’o ma mori ahinya e yo ma Jehova lochogo?

⁸ Nitie gik mathoth ma Muma wacho e wi loch mar Jehova mopogore gi ratiro mare mar locho. Muma wacho ni loch mar Jehova e ma ber moloyo loje mamoko. Achiel kuom gik momiyo loch mar Jehova e ma ber en ni en jaloch ma jahera. Yo ma Jehova lochogo miyo wasudo machiegni kode. En “Nyasaye man gi kech kod ng’wono, ma ok tim mirima piyo, mogundho gi hera gadieri.” (Wuok 34:6) Nyasaye odhialo jotichne kendo omiyogi luor. Odewowa moloyo kata kaka wadewore wawegi. Mopogore gi gima Jachien nowacho, Jehova ok tuon jotichne mohere gimoro amora maber. Parie ni Nyasaye ne oyie kata chiwo wuode ma miderma mondo wabed gi geno mar yudo ngima ma nyaka chieng’!—Som Zaburi 84:11; Jo-Rumi 8:32.

9. Wang’eyo nade ni Jehova ohero kendo odewo ng’ato ka ng’ato?

⁹ Jehova ohero jotichne duto ka gin kaka ogandane. Kata kamano, ohero kendo odewo ng’ato ka ng’ato. Kuom ranyisi, kuom higni ma dirom mia adek, Jehova notiyo gi jong’ad bura mondo ota Jo-Israel kendo ogolgi e lwet joma ne sandogi. E kindego, Jehova noneno kaka Ruth ne nigi yie motegno kata obedo ni ne ok en nyar Israel. Noweyo gik mathoth mondo obed jatich Jehova. Jehova noguedho Ruth ka ne omiye dichwo kod nyathi ma wuoyi. To ok mano kende. Ka Ruth ochier, obiro bedo mamor ahinya ng’eyo ni wuode ne en achiel kuom joma nobedo e anyuola mar Mesia. Parie kaka obiro bedo mamor ng’eyo ni sigande ne ondik e achiel kuom buge manie Muma miluongo gi nyinge!—Ruth 4:13; Mat. 1:5, 16.

10. Ang’o momiyo loch mar Jehova ok ridnee ji ngima?

¹⁰ Jehova ok loch gi agoko kendo ok orid ne ji ngima. Oketo ji bedo thuolo kendo otimonegi gik ma miyo gibedo ma mor. (2 Kor. 3:17) Daudi nowacho niya: “Pak gi duong’ ni e nyime: teko gi mor ni e kare.” (1 We. 16:7, 27) Jandik zaburi moro miluongo ni Ethan bende nondiko niya: “Jo mong’eyo dwol mamorni gin johawi: giwuotho, A Jehova, e ler mar wang’i. Giyil ahinya kuom nyingi pile: kendo oting’gi malo kuom timni matir.”—Zab. 89:15, 16.

11. Ere kaka wanyalo bedo gadier ni loch mar Jehova e ma ber?

¹¹ Paro matut kaka Jehova ber biro miyo wamed bedo gadier ni lochne ber. Timo kamano bende biro miyo wabed gi paro kaka mar jandik zaburi ma nowacho niya: “Bet e laru magi kuom odiechieng’ achiel ber moloyo bet kama chielo kuom higni alufu achiel.” (Zab. 84:10, Luo New Testament, 2003) Mano en adier. Nikech Jehova e Jachuechwa, ong’eyo gik ma miyo wabedo mamor kendo omiyowa gigo e yo mogundho. Gimoro amora monyisowa ni watim konyowa kendo ka watimogi to wabedo ma mor. Mano en adier kata obedo ni seche moko nyalo dwarore ni watuonre gik moko mondo watim kaka odwaro.—Som Isaiah 48:17.

12. Gima duong’ momiyo wariwo loch mar Jehova lwedo en mane?

¹² Muma wacho ni bang’ Higni Aluf Achiel mar loch Kristo, nitie joma biro ng’anyo ne loch mar Nyasaye. (Fwe. 20:7, 8) Ang’o ma biro miyo jogo okaw okang’ marach kamano? Nikech biro yudo ka osegony Jachien, obiro temo wuondo dhano kotiyo gi gik ma morogi. Osebedo kotimo kamano. Samoro obiro temo wuondo dhano ni ginyalo mana dak nyaka chieng’ kata ka ok giluwo chike Jehova. Wang’eyo ni mano ok en adier. Kata kamano, penjo maduong’ e ma: Be en adier ni miriambo mag Satan biro ywayowa? Ka wahero Jehova gadier nikech gik ma beyo motimonwa kendo wayie ni en e ma en gi ratiro mar bedo jaloch e polo gi piny, miriambo mag Satan ok bi wuondowa. Dak e bwo loch mar Jehova nobed maber ma ok wabi gombo ngima moro machielo.

MAKRI CHUTH GI LOCH MAR JEHOVA

13. Wanyiso nade ni wariwo loch mar Jehova lwedo?

¹³ Kiwacho awacha adier, loch mar Jehova e ma owinjore wariw lwedo gi chunywa duto. Mana kaka waseneno, en gi ratiro mar bedo jaloch kendo loch mare e ma berie mogik. Wanyalo nyiso ni wariwo loch mar Jehova lwedo ka wadhi nyime tiyone ma ok wawe. En yo mane machielo ma wanyalo nyisogo ni wariwo loch mar Jehova lwedo? Wanyalo timo kamano mana ka watimo gik moko kaka Jehova dwaro. Ka watimo gik moko kaka Jehova diher ni otimgi, mano nyiso ni wahere kendo wahero yo ma olochogo.—Som Jo-Efeso 5:1, 2.

14. Jodong-kanyakla kaachiel gi wiye udi nyalo luwo nade ranyisi mar Jehova?

¹⁴ Wasepuonjore e Muma ni Jehova locho e yor hera. Wiye udi kod jodong-kanyakla ma ohero loch mar Jehova ok bi chuno ji mondo otim gik moko mana kaka gin e ma gidwaro. Kar mano, gibiro luwo ranyisi mar Jehova. Paulo noluwo ranyisi mar Nyasaye kod Wuode. (1 Kor. 11:1) Paulo ne ok kuod wi jomoko kata chunogi mondo gitim gik moko kaka en e ma odwaro. Ne owuoyo kodgi e yo mang’won. (Rumi 12:1; Efe. 4:1; File. 8-10) Mano e kaka Jehova dwaro ni watim gik moko. Omiyo, jogo duto mohero loch mar Jehova onego otim mana kamano.

15. Sama waluwo kaka joma Jehova oketo tayowa, mano nyiso ang’o?

¹⁵ Waneno nade joma Jehova oketo mondo ota joge? Ka waluwo kaka joma Jehova oketo chikowa, mano nyiso ni wariwo loch mar Jehova lwedo. Kata obedo ni samoro yo ma ong’adgo wach moro ok donjnwa maber kata ok wayiego, pod wabiro mana riwo lwedo chenro ma Jehova oketo mar tayowa. Mano opogore ahinya gi kaka jopiny timo gik moko. Kata kamano, mano e kaka onego obed e bwo loch mar Jehova. (Efe. 5:22, 23; 6:1-3; Hib. 13:17) Timo kamano konyowa nikech Nyasaye ok nyal nyisowa ni watim gik ma hinyowa.

16. Joma riwo loch mar Jehova lwedo timo yiero e yo mane?

¹⁶ Yo machielo ma wanyalo nyisogo ni wariwo loch mar Jehova lwedo en yiero ma watimo. Jehova ok en Nyasaye ma ohero chiwo chike ma achiel kachiel e gik moko duto ma watimo. Kar mano, okonyowa ng’eyo paro ma en-go sama otayowa. Kuom ranyisi, Jehova ok chiw chike ma achiel kachiel ma nyiso kaka Jokristo onego orwakre. Mopogore gi mano, odwaro ni rwakruokwa kod yo ma wabidhorego kik kal tong’, kendo onyis ni wan Jokristo. (1 Tim. 2:9, 10) Jehova bende ok dwar ni yiero ma watimo obed ma chwanyo jomamoko. (1 Kor. 10:31-33) Sama watimo gik moko ka luwore gi pach Jehova to ok kaka wan e ma wadwaro, wanyiso ni wahero lochne kendo wariwe lwedo.

17, 18. Gin yore mage ma Jokristo mokendore nyalo nyisogo ni giriwo loch mar Jehova lwedo?

¹⁷ Ne ane kaka Jokristo manie kend nyalo nyiso ni giriwo loch mar Jehova lwedo. Samoro weche nyalo bedo matek e kend mopogore gi kaka ng’ato ne paro kapok odonjo e kend. Samoro ng’ato romo gi chandruoge ma dongo e kend mare. Ka en kamano, to paro kaka Jehova notimo ne oganda mar Jo-Israel nyalo konyo. Jehova nowacho ni ne en kaka chwor ogandano. (Isa. 54:5; 62:4) To mano kaka ne en kend mopong’ gi chandruok. Kata kamano, Jehova ne ok orikni jwang’ogi. Ne osiko ong’wononegi kendo ne omakore gi singruok ma ne otimo kodgi. (Som Zaburi 106:43-45.) Donge yo ma Jehova noherogo Jo-Israelgo miyo wahere?

¹⁸ E yo ma kamano, Jokristo mokendore ma ohero puonj mag Jehova biro luwo ranyisine gi chunygi duto. Ok gibi manyo yore moko ma ndiko ok oyiego mondo giketh kendgi sama weche tek. Ging’eyo ni Jehova e ma noriwogi kanyachiel, kendo ok onego giwere. Gimoro achiel kende ma Ndiko wacho ni nyalo miyo ng’ato oketh kend mare, mi obed thuolo mar kendore gi ng’at machielo en ka nyawadgi oterore. (Mat. 19:5, 6, 9) Ka gitimo duto ma ginyalo mondo gilos kend margi kendo loso gik ma miyo dakgi bedo matek, ginyiso ni giriwo loch mar Jehova lwedo.

19. Kapo ni watimo richo moro, ang’o monego watim?

¹⁹ Nikech wan dhano morem, kinde ka kinde wabiro timo gik ma chwanyo Jehova. Jehova ong’eyo mano maler, kendo mano e momiyo noyie mondo Kristo ochiw ngimane obednwa rawar. Omiyo, kapo ni waboth e yo moro amora, onego wakwa Jehova ng’wono. (1 Joh. 2:1, 2) Kar mondo wasik ka wachare nikech richo ma ne watimo, onego watem matek mondo kik wanwo richono. Ka wamakore gi Jehova, obiro ng’wononwa, obiro konyowa mondo kik wawinj malit e chunywa, kendo obiro konyowa mondo wadhi nyime tiyone ka wamor.—Zab. 103:3.

20. Ang’o momiyo onego wariw loch mar Jehova lwedo e kindegi?

²⁰ E piny manyien, ji duto biro bedo e bwo loch mar Jehova kendo gibiro puonjore yorene ma kare. (Isa. 11:9) Kata kamano, Jehova osechako puonjowa yorenego kata mana e kindegi. Jehova chiegni kawo okang’ mondo onyis maler ni en e ma en gi ratiro mar bedo jaloch. Magi e kinde monego wanyisie ni wariwo loch mar Jehova lwedo kuom makore gi tim ma kare, tiyone, kendo luwo ranyisine e gimoro amora ma watimo.