Jehova Ohero Joma ‘Nyago Olemo Ka Ginano’

1, 2. (a) Ang’o momiyo owete gi nyimine ma lendo kuonde ma ji ok rwakie wach jiwowa ahinya? (Ne picha man malo.) (b) Ang’o ma Yesu nowacho e wi wach lendo e “gweng’gi”? (Ne weche moler piny.)

SERGIO GI OLINDA jaode gin jopainia ma johigni 80 gi wiye ma odak e piny Amerka. Sani ok ginyal wuotho ahinya nikech tiendegi lit. Kata kamano, kuom higni mang’eny gisebedo ka giwuotho ka gidhi e taon kama ji ng’enyie kendo gichopo kanyo sa achiel e wang’e. Gibetga machiegni gi kama mtokni chung’ee kendo gichako miyo joma kalo bugewa ma lero Muma. Kata obedo ni ji mang’eny kalogi akala, gin to gibetga mana kanyo kendo gibwonjo gi joma ng’iyogi. Kochopo sa auchiel, gichako wuoth mos ka gidok ot. Odiechieng’ ma luwe sa achiel e wang’e gidok mana kanyo. Gilandoga wach Pinyruoth okinyi ka okinyi kuom odiechienge auchiel e juma, higa ka higa.

² Mana kaka Sergio gi Olinda, owete gi nyimine mathoth e piny mangima osebedo ka lendo kuom higni mang’eny kuonde ma ji ok rwakie wach. Kapo ni mano e gima timoreni, wapwoyi ahinya kuom bedo gi chuny mar nano.a Tiyo ne Jehova ma ok iwe jiwo jotich Jehova mang’eny moriwo nyaka Jokristo ma nigi lony e tij lendo. Jorit-alwora moko nowacho kama: “Sama alendo gi owete gi nyimine ma kamago ranyisigi jiwa ahinya.” “Sinani margi jiwa mondo an bende anan kendo abed gi chir e tij lendo.” “Ranyisigi mora ahinya.”

3. Gin penjo mage adek ma wadwaro nono, to nikech ang’o?

³ Mondo wadhi nyime tiyo gi kinda mondo watiek tij lendo ma Yesu nomiyowa, wadwaro nono penjo adek ma luwogi: Ang’o momiyo seche moko chunywa nyalo nyosore? Ere kaka wanyalo nyago olemo? Ang’o ma nyalo konyowa dhi nyime nyago olemo ka wanano?

ANG’O MOMIYO CHUNYWA NYALO NYOSORE?

4. (a) Paulo nowinjo nade ka ne Jo-Yahudi otamore rwako wach? (b) Ang’o momiyo Paulo nowinjo kamano?

⁴ Ka dibed ni chunyi osenyosorega nikech ilendo e alwora ma ji ok rwakie wach ahinya, nyaka bed ni iwinjo kaka jaote Paulo ne winjo. Kuom higni ma dirom 30 ma ne olendogo, ne okonyo ji mang’eny mondo obed jopuonjre Kristo. (Tich 14:21; 2 Kor. 3:2, 3) Kata kamano, Jo-Yahudi mang’eny ma ne olendonegi to ne ok obedo Jokristo. Ng’enygi ne okwedo Paulo kendo moko kuomgi nosande. (Tich 14:19; 17:1, 4, 5, 13) Paulo nowinjo nade ka ne Jo-Yahudigo otamore rwako wach? Nowacho kama: “Awacho adier kuom Kristo . . . ni an-gi kuyo maduong’ kod lit ma ok rum e chunya.” (Rumi 9:1-3) Ang’o momiyo Paulo nowinjo kamano? Nohero tij lendo. Ne olendo ne Jo-Yahudi nikech ne odewogi ahinya. Omiyo Paulo nowinjo malit ka ne gitamore ng’wono mar Nyasaye.

5. (a) Ang’o ma jiwowa mondo walend ne jomoko? (b) Ang’o momiyo ok en gima kawowa gi wuoro ka seche moko chunywa nyosore?

⁵ Mana kaka Paulo, walendo ne ji nikech wadewogi. (Mat. 22:39; 1 Kor. 11:1) Nikech ang’o? Wang’eyo ni Jehova guedho joma oyiero tiyone mana kaka wan bende oseguedhowa. Ka waparo joma walendonegi e alworawa, wawacho e chunywa niya, ‘Mad abed ni ginyalo miyowa thuolo mar konyogi mondo ging’e ber ma bayogi!’ Omiyo, wadhi nyime jiwogi mondo gipuonjre adiera e wi Jehova kendo ging’e dwache ne dhano. Sama walendonegi, chalo mana ka gima wanyisogi kama: ‘Wakeloni mich maber ahinya. Yie ikawe.’ Sama ji otamore kawo michno, wawinjoga malit e chunywa. Winjo kamano ok nyis ni koro waonge yie, to nyiso ni wahero tij lendo. Omiyo kata bed ni seche moko chunywa nyalo nyosore, pod wadhi nyime nano. Elena, ma osebedo painia kuom higni 25 wacho kama e lo jolendo mang’eny: “Tij lendo ok yot. Kata kamano, onge tich ma daher timo moloyo tij lendo.”

ERE KAKA WANYALO NYAGO OLEMO?

6. En penjo mane ma wadwaro nono, to wabiro timo kamano e yo mane?

⁶ Ang’o momiyo wan gadier ni pod wanyalo bedo gi nyak e tij lendo kata bed ni walendo kanye? Mondo wayud dwoko mar penjono, we wanon ane ngero moko ariyo ma Yesu notiyogo ka nolero gimomiyo ‘nyago olemo’ dwarore. (Mat. 13:23) Ngero mokwongo en mar mzabibu.

7. (a) Japur, mzabibu, kod bedene ochung’ne ang’o? (b) Wadwaro yudo dwoko mar penjo mane?

⁷ Som Johana 15:1-5, 8. Yesu nonyiso jootene niya: “Wuora yudo duong’ nikech ma: ni udhi nyime nyago olemo mang’eny kendo unyiso ni un jopuonjrena.” Yesu nowacho e ngerono ni Jehova “e japur,” to en owuon “e yadh mzabibu madier,” to jopuonjrene “e bedene.”b Omiyo, olemo ma jolup Kristo onego onyag en ang’o? E ngerono Yesu ne ok owacho achiel ka achiel ni olemono en ang’o, to ne owacho gimoro maduong’ ma nyalo konyowa yudo dwoko.

8. (a) Ang’o momiyo olemo ok nyal chung’ne joma bedo jopuonjre Yesu? (b) Gik moko duto ma Jehova dwaro ni watim, gin machalo nade?

⁸ Yesu nowacho kama kowuoyo e wi Wuon-gi: “Bede duto man kuoma ma ok nyag olemo ogolo oko.” Mano tiende ni Jehova kwanowa kaka jotichne mana ka wanyago olemo. (Mat. 13:23; 21:43) Omiyo ngero ma Yesu nogoyono, olemo ma Jakristo ka Jakristo nyaka nyag ok ochung’ ne jopuonjre mag Muma ma ng’ato osekonyo mobedo Jokristo. (Mat. 28:19) Ka ok kamano, Joneno ma jokinda ma pok oyudo thuolo mar konyo ng’ato mobedo Jakristo nikech gilendo e alwora ma ji ok rwakie wach, biro chalo gi bede mzabibu ma ok nyag olemo e ngero ma Yesu nogoyono. Kata kamano, paro kaka mano ok owinjore! Nikech ang’o? Nikech ok wanyal chuno ji mondo obed jopuonjre Yesu. Jehova en Nyasaye ma jahera omiyo ok onyal jwang’o jotichne mana nikech ok gitimo gima gionge gi nyalo mar timo. Gik moko duto ma Jehova onyisowa ni watim, gin gik ma wanyalo timo.​—Rap. 30:11-14.

9. (a) Wanyago olemo ka watimo tich mane? (b) Wadwaro nono ngero mane, to nikech ang’o?

⁹ Kare, en olemo mane ma nyaka wanyag? Nenore maler ni olemono ochung’ ne tich moro ma ng’ato ka ng’ato kuomwa nyalo timo. En tich mane ma biro miyo ‘wanyag olemo’? En tij lando wach maber mar Pinyruodh Nyasaye.c (Mat. 24:14) Ngero ma Yesu nogoyo mar jachuoyo konyowa neno mano. We wanon ane ngerono.

10. (a) E ngero ma Yesu nogoyo, kodhi kod lowo ochung’ ne ang’o? (b) Ngano nyago ang’o?

¹⁰ Som Luka 8:5-8, 11-15. E ngero mar jachuoyo, kodhi en “wach Nyasaye,” kata wach Pinyruoth. Lowo ochung’ ne chuny joma walendonegi. Kodhi ma ne olwar e lowo maber nochako dongo mogolo tiende mochako bedo ngano motegno. Kodhino ne onyago “olemo momedore nyadi 100.” Kata kamano, ngano nyago olemo machalo nade? Be onyago mana bede ngano matindo tindo mang’eny? Ooyo, ogolo kodhi manyien ma bang’e nyalo dongo ma bed ngano. E ngeroni kodhi achiel ne onyuolo kodhi mamoko mang’eny. Ere kaka wachno otudore gi tijwa mar lendo?

11. (a) Ere kaka ngero mar jachuoyo otudore gi tijwa mar lendo? (b) Ere kaka wanyago kodhi manyien mag Pinyruoth?

¹¹ Mondo wang’e kaka ngerono otudore gi tijwa mar lendo, wawach ni Joneno moko kata jonyuolwa ma Jokristo ne olandonwa wach Pinyruoth higni mang’eny mosekalo. Ne gi mor ka ne gifwenyo ni chunywa ne orwako wach Pinyruoth ma ipimo gi kodhi. Mana kaka kodhi nolwar e lowo maber e ngero ma Yesu nogoyo, chunywa ne orwako wach maber ma wayiego. Mano nomiyo wach Pinyruoth odongo e chunywa mobedo kaka ngano moikore nyago olemo. To mana kaka ngano golo kodhi manyien to ok mana it ngano moko, wan bende wanyago kodhi manyien mag Pinyruoth to ok jopuonjre manyien.d Ere kaka wanyago kodhi manyien mag Pinyruoth? Sa asaya ma walando wach Pinyruoth ka watiyo gi yo moro amora, wakeyo kodhi mag Pinyruoth ma ne osepidh e chunywa. (Luka 6:45; 8:1) Omiyo, ngeroni puonjowa ni sa asaya ma walando wach Pinyruoth, ‘wanyago olemo ka wanano.’

12. (a) En puonj mane ma wayudo e ngero ma Yesu nogoyo mar yadh mzabibu kod ngero mar jachuoyo? (b) Ng’eyo puonjno miyo iwinjo nade?

¹² En puonj mane wayudo e ngero ma Yesu nogoyo mar yadh mzabibu kod ngero mar jachuoyo? Gikonyowa ng’eyo ni nyalo ma wan-go mar nyago olemo ok otudore gi yo ma ji rwakogo wach e alworawa. Kar mano, otudore gi yo ma watimogo tij lendo ma ok wawe. Paulo bende nojiwo adiera makendeno ka nowacho niya: “Ng’ato ka ng’ato noyud pokne ka luwore gi tichne owuon.” (1 Kor. 3:8) Pok ma ng’ato yudo luwore gi tichne to ok nyak ma ng’atno yudo e tijno. Nyaminwa miluongo ni Matilda mosebedo painia kuom higni 20 wacho kama: “Amor ahinya ng’eyo ni Jehova guedho kindawa.”

ERE KAKA WANYALO DHI NYIME NYAGO OLEMO KA WANANO?

13, 14. Ka luwore gi Jo-Rumi 10:1, 2, ang’o momiyo Paulo ne ok ojok gi joma ne ok rwak wach Pinyruoth?

¹³ Ang’o ma nyalo konyowa dhi nyime nyago olemo ka wanano? Mana kaka ne waseneno, chuny Paulo nonyosore ka ne Jo-Yahudi otamore rwako wach Pinyruoth. Kata kamano, ne ok ojok kodgi. Ne ane gima ne owacho e wi Jo-Yahudigo ka ne ondiko ne Jokristo ma ne ni Rumi: “Gima chunya gombo kod kwayo ma akwayonegigo Nyasaye, en ni mondo giyud warruok. Nimar anyalo wacho gadier kuomgi ni gin gi kinda ne Nyasaye, to ok ka luwore gi ng’eyo malong’o.” (Rumi 10:1, 2) Gin ang’o ma Paulo nowacho ni ne konye mondo odhi nyime gi tij lendo?

¹⁴ Mokwongo, Paulo nowacho gimomiyo nodhi nyime lendo ne Jo-Yahudi. ‘Gima chunye ne gombo’ e ma ne chwale. Ne ogombo ni Jo-Yahudi moko oyud warruok. (Rumi 11:13, 14) Mar ariyo, Paulo nowacho ni ne ‘okwayonegi Nyasaye.’ Nosayo Nyasaye e lamo mondo okony ng’ato ka ng’ato kuom Jo-Yahudigo orwak wach Pinyruoth. Mar adek, Paulo nowacho niya: “Gin gi kinda ne Nyasaye.” Noneno gimoro maber kuomgi. Paulo nong’eyo ni ka ji obedo gi kinda kuom gima owinjore, to mano nyalo konyogi mondo gibed jolup Kristo ma jokinda.

15. Ere kaka wanyalo luwo ranyisi mar Paulo? Chiw ane ranyisi.

¹⁵ Wanyalo luwo nade ranyisi mar Paulo? Mokwongo, nyaka watem matek mondo wasik ka wan gi gombo mar manyo ng’ato ang’ata ma nyalo bedo ni ‘chunye ni kare ne ngima mochwere.’ Mar ariyo, wasayo Jehova e lamo mondo oyaw chuny joma gombo winjo wach. (Tich 13:48; 16:14) Silvana, ma osebedo painia kuom higni ma dirom 30 wacho niya: “Ka pok adonjo e ot monego alendee, akwayoga Jehova mondo okonya abed gi paro mowinjore.” Bende wakwayoga Nyasaye oor malaike otawa mondo wayud joma nigi riyo mar winjo wach maber. (Mat. 10:11-13; Fwe. 14:6) Robert, mosebedo painia kuom higni mokalo 30 wacho niya: “Tiyo kanyachiel gi malaike ma ong’eyo gik ma timore e ngima weg udi ma wadhi lendonegi en gima morowa ahinya.” Mar adek, watemo mondo wane gimoro maber kuom ji. Carl, ma en jaduong’-kanyakla ma ne obatis higni mokalo 50 wacho niya: “Ang’iyoga gik matindo tindo ma nyiso ni ng’ato oikore winjo wach, kaka buonjo, neno e yo mamuol, kata penjo moro mowuok e chunye.” Mana kaka Paulo, wan bende wanyalo dhi nyime nyago olemo ka wanano.

“KIK IGENG’ LUETI”

16, 17. (a) En puonj mane ma wayudo e weche ma inyisowa e Eklesiastes 11:6? (b) Ler ane kaka tijwa mar chuoyo kodhi nyalo konyo joma rangowaga.

¹⁶ Kata kapo ni nyalo nenore ni wach Pinyruoth ma walando ok chop e chuny ji, ok onego wapar ni tij chuoyo kodhi ma watimo en kayiem nono. (Som Eklesiastes 11:6.) Gima ber en ji mang’eny ok dwarga winjowa kata kamano, girangowaga. Gineno kaka warwakore maler, timbewa beyo kendo wahero bwonjo gi ji. Bang’ kinde, timbewa mabeyo nyalo konyo jomoko mondo one ni paro maricho ma gin-go kuomwa ok gin adier. Sergio gi Olinda, ma ne osewuo kuomgi ne oneno gima kamano.

¹⁷ Sergio wacho niya: “Nikech tuoche, nitie kinde ma ne wabudho ka ok wadhi e taon kama ne walendega. Ka ne wachako dhi, joma ne kalowaga nopenjowa ni, ‘Ang’o ma ne otimore? Uselalnwa ahinya.’” Olinda medo wacho kama ka bwonjo: “Derepe mag bas ne fwayonwaga kendo moko ne kokga matek ka ginyisowa niya, ‘Utiyo tich maber!’ Ne gikwayowaga gasede.” Gima nokawogi gi wuoro en ni ng’at moro nobiro e troli ma okelonegi mafua kae to ogoyonegi erokamano kuom tich maber ma gitimo.

18. Ang’o momiyo ing’ado mar ‘nyago olemo ka inano’?

¹⁸ Ka ok ‘wageng’o lwetwa’ sama wachuoyo kodhi mag Pinyruoth, wabedo gi migawo makende mar ‘chiwo neno ne ogendni duto.’ (Mat. 24:14) To moloyo mago duto, wabedo mamor kuom ng’eyo ni Jehova oyie kodwa nikech ohero jogo duto ma ‘nyago olemo ka ginano’!