Bed Mamor Kuom Tichni Matek
1. Ang’o manyalo dwoko kindawa mar lendo chien?
1 Dhano nochwe gi nyalo mar “bedo mamor kuom tichne” matek. (Ekl. 2:24) Kata kamano, seche maok wayud nyak e tijwa mar lendo, chunywa nyalo nyosore mi mor ma wan-go lal kendo kindawa odog chien. Ang’o manyalo konyowa siko gi paro mowinjore?
2. Ang’o momiyo onego wabed gi paro mowinjore bed ni ji orwako wach kata ok girwako?
2 Bed gi Paro Mowinjore: Kata obedo ni ji manok ema noyie gi puonj mag Yesu, mano ok nyis ni ne ok otieko tich ma nomiye. (Joh. 17:4) E ngero ma Yesu nogoyo mar jachuoyo, nonyiso ni thoth ji ne ok dhi rwako wach Pinyruoth ma iporo gi kodhi. (Math. 13:3-8, 18-22) Kata kamano, kindawa pod chopo tich maduong’ ahinya.
3. Ere kaka wanyalo ‘nyago’ olemo kata obedo ni thoth ji ok rwak wach ma walando?
3 Kaka Wanyago Olemo: Kaluwore gi ngero ma Yesu nogoyono, joma orwako wach onego ‘onyag’ olemo. (Math. 13:23) Bang’ ka ngano osetwi mi otegno, gima onyago ok en ngano mamoko matindo, to ogolo kodhi manyien. Kamano bende, nyak ma Jokristo yudo ok en mana timo jopuonjre manyien kende, to gimaduong’ en medruok mar kodhi mag Pinyruoth kokalo kuom lando ne jomamoko wach maber. Mani kelonwa ‘mor’ mamiyo wabedo gi chuny mokuwe, bed ni ji orwako wach kata gitamore. Tijwa konyo e miyo nying Jehova obed maler. (Isa. 43:10-12; Math. 6:9) Wayudo mor kuom tiyo kanyachiel gi Nyasaye. (1 Kor. 3:9) Kendo ‘olemo mag dhok’ kaka mago moro Jehova.—Hib. 13:15, 16.
4. Tijwa mar lendo nyalo kelo nyak mage ma samoro ok wane?
4 E wi mago, samoro nyalo bedo ni tichwa matek kelo nyak moko ma ok wane. Nenore ni moko kuom joma Yesu nolendonegi ne ok obedo jopuonjrene mana nyaka bang’ thone. Kamano bende, kodhi ma wachwoyo mag Pinyruoth samoro ok bi dongo e chuny joma walendonegi nyaka bang’ kinde, to jogo nyalo rwako adiera bang’e ma gitim dongruok kata ka ok wang’eyo. Ee, tijwa mar lendo nigi nyak maber ahinya. Kuom mano, wadhiuru nyime ‘nyago olemo mang’eny’ mondo wanyis ni wan jopuonjre Yesu gadier.—Joh. 15:8.