Un Rowere​—Chung’uru Motegno Mondo Ukwed Jachien

1, 2. (a) Ang’o momiyo rowere loyo lweny manie kindgi gi chuech maricho mag roho? (Ne picha man malo.) (b) Ang’o ma wadwa puonjore?

JAOTE Paulo nopimo ngima Jokristo gi ngima jolweny ma kedo. Lweny ma wagoyo ok en masie. Kata kamano, jowasigu ma wakedogo to gin joma nitie adier. Satan kod jochiende gin jolweny molony ahinya. Omiyo, nyalo nenore ka gima ok wanyal loyo lwenyno. Rowere e ma Satan nyalo monjo e yo mayot ahinya. Ang’o ma ginyalo timo mondo gilo lweny manie kindgi gi chuech maricho mag roho? Adiera en ni rowere nyalo loyo lwenyno kendo moko kuomgi osetimo kamano! Nikech ang’o? En nikech gidhi “nyime yudo teko kuom Ruodhwa.” Kata kamano, rowere timo gik mathoth mopogore gi geno teko mar Nyasaye. Girwakore maber ne lweny. Mana kaka jolweny ma osetieg maber, gin gi “gige lweny duto moa kuom Nyasaye.”​—Som Jo-Efeso 6:10-12.

² Sama Paulo ne wuoyo e wi ranyisino, nyaka bed ni noparo gige lweny ma Jo-Rumi ne rwako. (Tich 28:16) We wanon ane gimomiyo ranyisino owinjore. Sama watimo kamano, ne ane gima rowere moko wacho e wi pek ma giromogo kod ber ma giseyudo ka girwako gige lwenygo.

‘TUEYO ADIERA KAKA MSIP’

3, 4. Ere kaka adiera ma yudore e Muma chalgi msip ma jalweny ma Ja-Rumi ne tueyo e nungone?

³ Som Jo-Efeso 6:14. Jalweny ma Ja-Rumi ne nigi msip ma olos gi chuma ma ne rito nungone. Ne olose kamano mondo okony jalweny kik owinj ni gige lweny morwako e kore pek ahinya. Misibe moko ne nigi kuonde molos motegno ma ne isoye ligangla. Ka ne jalweny osetweyo msibno motegno maber, ne onyalo dhi e lweny ka en gi chir.

⁴ E yo ma kamano, adiera ma wapuonjore e Wach Nyasaye ritowa mondo puonj mag miriambo kik hinywa. (Joh. 8:31, 32; 1 Joh. 4:1) Kaka wamedo hero adiera ma wapuonjore, e kaka wabiro dak kaluwore gi chike makare mag Nyasaye ma ipimo gi “rageng’ mar akor.” (Zab. 111:7, 8; 1 Joh. 5:3) E wi mano, ka wa ng’eyo adiera ma yudore e Wach Nyasaye e yo makare, wabiro chung’ motegno mondo wasir adierago sama jowasigu kwedogi.​—1 Pet. 3:15.

5. Ang’o momiyo onego wawach adiera?

⁵ Ka warido adiera mag Muma e nungowa, mano biro miyo wadag ka luwore gi puonj mag Muma kendo wacho adiera kinde duto. Ang’o momiyo wabiro timo kinda mondo kik wawach miriambo? En nikech miriambo en achiel kuom yore ma Satan tiyogo e yo maber ahinya. Miriambo kelo hinyruok ne ng’at ma wache kod ng’at ma bende oyie gi miriambogo. (Joh. 8:44) Omiyo, onego watim duto ma wanyalo mondo kik wawach miriambo. (Efe. 4:25) En mana ni timo kamano ok yotga. Abigail ma en jahigni 18 wacho niya: “Wacho adiera bedoga matek to ahinya ahinya sama wacho miriambo nyalo resi mondo iwuog e chal moro matek.” To kare ang’o momiyo kinde duto otemo mondo owach adier? Owacho niya: “Sama awacho adier abedo gi chuny maler e nyim Jehova. Jonyuolna kod osiepena bende nyalo gena.” Victoria ma en jahigni 23 wacho kama: “Sama iwacho adiera kendo isiro puonj mag Muma ma iyiego, inyalo jari. Kata kamano, nitie ber mathoth ma iyudo kuom timo kamano: Ibedo gi chir, imedo sudo machiegni gi Jehova, kendo joma oheri biro dhi nyime miyi luor.” Kuom adier en gima ber ndi “ka utueyo adiera e nungou kaka msip” kinde duto.

“TIM MAKARE KAKA RAGENG’ MAR AKOR”

6, 7. Ang’o momiyo ipimo tim makare gi rageng’ mar akor?

⁶ Achiel kuom rageng’ mag akor ma ne jolwenj Jo-Rumi rwako ne iloso gi chumbe mag nyinyo. Chumbego ne ipango molwowore olwowore moro e bath nyawadgi kae to idologi mondo giromre gi dend jalweny ma ne dhi rwakogi. Chumbego ne itueyo e kor gi tonde mag pien. Kuonde ma ne odong’ e dend jalweny kadhi malo ne iumo gi chumbe mamoko mag nyinyo ma bende ne ipango moro ka moro e bath nyawadgi kae to itueyo gi tonde mag pien. Chuma mirwako e korni ne miyo jalweny ok nyal ringo kata wuotho koni gi koni ahinya kendo ne dwarore ni onon kinde ka kinde ka chumbego pod obet maber kargi. Rageng’no ne miyo aserni ok chwo adundo jalweny kata fuondene mamoko.

⁷ Mano doko ranyisi mowinjore ndi ma nyiso kaka chike makare mag Jehova nyalo rito chunywa! (Nge. 4:23) Mana kaka jalweny ok nyal wilo rageng’ mar akor ma olos gi nyinyo gi ma olos mayom yom, wan bende ok dwaher wilo chike makare mag Jehova gi chike ma wan wawegi waneno ni ber. Paro ma wang’ado orem ma ok nyal miyowa rit makare. (Nge. 3:5, 6) Mano e momiyo nyaka wang’i kinde ka kinde ka rageng’ mar akor ma Jehova omiyowa pod rito chunywa.

8. Ang’o momiyo en gima ber makore gi chike mag Jehova?

⁸ Be seche moko iwinjoga ka chike makare mag Jehova odiyi ma ok inyal yudo thuolo mar timo gik ma idwaro? Daniel ma jahigni 21 wacho niya: “Jopuonj kod joskul wetena ne jara nikech aluwo puonj mag Muma e ngimana. Nochopo kama koro ne aonge gi chir ma chunya nonyosore.” Ang’o ma ne okonye? Owacho kama: “Gikone, ne aneno ber mar luwo chike mag Jehova. Moko kuom osiepena ne ochako tiyo gi yedhe ma mero ji to moko noweyo skul. Ne litna ahinya neno kaka ngimagi ne obedo marach. Adier Jehova ritowa maber.” Madison ma en jahigni 15, wacho niya: “Atemo ahinya mondo amak chike mag Jehova kendo kik atim gik ma mbesena neno ni ber.” Ang’o ma osebedo ka konye? Owacho kama: “Ajaparo kinde duto ni iluonga gi nying Jehova to tem en yo ma Satan tiyogo mondo obwoga. Sa asaya ma aloyo tem moro, awinjo ka amor ahinya.”

‘RWAKO IKRUOK MAR YALO WACH MABER MAR KUWE E TIENDEU’

9-11. (a) Gin wuoche mage ma Jokristo rwako e yor ranyisi? (b) Ang’o ma nyalo konyowa mondo kik waluor sama walando wach maber?

⁹ Som Jo-Efeso 6:15. Jalweny Ja-Rumi ma ne ok orwako wuochene mag lweny ne nyiso ni ok oikore dhi e lweny. Wuochego ne olos gi pien moluwore nyadidek kendo motwang’ motegno mondo gimak tiende jalweny maber. Yo ma ne olosgigono ne miyo gidak aming’a kendo wuotho kodgi ne yot.

¹⁰ Kata obedo ni wuoche ma jolweny Jo-Rumi ne rwako ne konyogi e lweny, wuoche mar ranyisi ma Jokristo rwako to konyogi mondo gidhi giland weche mag kuwe. (Isa. 52:7; Rumi 10:15) Kata kamano, dwarore ni ng’ato obed gi chir sama thuolo oneno. Roberto ma en jahigni 20 wacho niya: “Ne aluor lendo ne joklas wetena. Wiya ne kuot. Kaparo chien ne ok onego abed maluor. Sani amor lendo ne mbesena.”

¹¹ Rowere mang’eny osefwenyo ni ka giikore maber ne lando wach maber, mano miyo ok gibed maluor sama gilendo. Inyalo timo ang’o mondo iikri maber? Julia ma jahigni 16 wacho kama: “Ajaketoga bugewa malero Muma e bagna mar skul kendo achikoga ita e wi gik ma joklas wetena oyiego e wi Muma. Kae to aparo kaka anyalo konyogi. Sama aikora maber anyalo wuoyo kodgi achiel ka achiel e wi wach ma dhi konyogi.” Makenzie ma jahigni 23 wacho kama: “Ka in ng’at ma ng’won kendo ma chiko ite maber, ibiro ng’eyo gik ma chando mbeseni. Atemoga matek mondo asom weche duto ma ondik ne rowere. Timo kamano miyo anyalo nyiso mbesena puonj moro ma nyalo konyogi ma yudore e Muma kata e jw.org.” Mana kaka rowerego owacho, ka iikori maber ne lendo biro chalo ka gima irwako wuoche ma oromi maber.

“OKUMBA MALACH MAR YIE”

12, 13. Moko kuom ‘aserni ma kakni ka mach’ ma Satan tiyogo gin mage?

¹² Som Jo-Efeso 6:16. “Okumba malach” ma ne iting’o gi jalwenj Rumi ne duong’ kendo ne geng’e chakre e gokene nyaka e chongene. Okumbano ne geng’e mondo ligengni kod tong’ kik hinye sama lweny ne dhi nyime.

¹³ Moko kuom ‘aserni ma kakni ka mach’ ma Satan tiyogo en wacho miriambo ni Jehova ok dewi kendo ok oheri. Ida ma jahigni 19 osebedo ka neno ni en ng’at manono. Owacho kama: “Kinde mang’eny anenoga ni Jehova ok ni machiegni koda kendo ok odwar bedo osiepna.” Ere kaka osebedo ka onyagore gi wachno? Owacho niya: “Dhi e chokruoge osejiwo yie mara ahinya. Chon nabedoga abeda e chokruok ma ok achiw paro nikech naneno ni onge ng’ato ang’ata ma ne dwa winjo gima awacho. Sani aiko chokruok maber kendo atemo chiwo paro diriyo kata didek. Timo kamano ok yot, kata kamano awinjoga maber sama asechiwo paro. Owete gi nyimine bende osebedo ka jiwa ahinya. Tinde awuok e chokruok ka ang’eyo ni Jehova ohera.”

14. Gima notimore e ngima Ida puonjowa ang’o?

¹⁴ Gima notimore e ngima Ida nyiso adiera moro maduong’: Okumba mar jalweny ne olos e yo ma ok nyal mede mondo obed maduong’ kata duoke obed matin, okumbawa mar yie to nyalo dok chien kata nyalo bedo motegno. Wan e ma nyaka watim yiero. (Mat. 14:31; 2 The. 1:3) To mano kaka en gima dwarore ni wager yie marwa!

“OGUDU MAR WARRUOK”

15, 16. Geno chalo gi ogudu e yo mane?

¹⁵ Som Jo-Efeso 6:17. Ogudu ma jalwenj Rumi ne rwako ne konye mondo jasigu kik hiny wiye, ng’ute, kata wang’e. Ogute moko ne nigi bedegi ma jolweny ne nyalo lierogigo.

¹⁶ Mana kaka ogudu rito obwongo mar jalweny, e kaka “geno mar warruok” bende rito pachwa. (1 The. 5:8; Nge. 3:21) Bedo gi geno miyo waketo pachwa kuom gik ma Nyasaye osingo kendo konyowa bedo gi paro mowinjore sama wayudo chandruoge. (Zab. 27:1, 14; Tich 24:15) Kata kamano, ka wadwaro ni “ogudu” okonywa maber, nyaka warwake e wiwa to ok ting’e e lwetwa.

17, 18. (a) Ere kaka Satan nyalo wuondowa ma walony ogudu? (b) Wanyalo nyiso nade ni pok wadonjo e obadho mar Satan?

¹⁷ Ere kaka Satan nyalo wuondowa ma walony ogudu? Ne ane gima Satan notimo ne Yesu. Satan nong’eyo maler ni Yesu ne nigi geno mar bedo jaloch e wi dhano. Kata kamano, Yesu ne nyaka rit ma chop kinde ma Jehova oyiero mar kete ruoth. Kapok kindeno ochopo, nyaka ne sand Yesu ma nege. Omiyo, Satan nomiyo Yesu thuolo mar yudo gima ne ogenono mapiyo piyo. Satan nowacho ni ka Yesu ne nyalo lame ne odhi miye gima nogeno yudo mana kanyo gi kanyo. (Luka 4:5-7) E yo machalo kamano, Satan ong’eyo ni Jehova osingonwa gik mabeyo e piny manyien. To nyaka warit kuom kinde kendo seche moko wanyalo romo gi chandruoge sama warito. Omiyo, Satan temowa ka omiyowa thuolo mar yudo gik ma wagenogo sani. Odwaro ni wamany gik ringruok mokwongo kendo wayudgi te mana kanyo gi kanyo. Satan jiwowa ni waket Pinyruoth obed mar ariyo.​—Mat. 6:31-33.

¹⁸ Rowere mang’eny ma Jokristo moriwo nyaka Kiana ma jahigni 20 ok osedonjo e obadhono. Kiana wacho niya: “Ang’eyo ni Pinyruodh Nyasaye kende e ma nyalo tiekonwa chandruoge duto.” Bedo gi geno ma kamano osekonye e yo mane? Omedo wacho niya: “Geno mar dak e Paradiso osemiyo abedo gi paro mowinjore e wi gik ma daher timo e ngimana. Ok ati gi nyalo ma an-go e manyo gik ma nyalo kelona pesa mang’eny kata manyo tije madongo. Kar mano, atiyo gi thuolona kod tekona e tiyo ne Nyasaye.”

“LIGANGLA MAR ROHO MALER, MA EN WACH NYASAYE”

19, 20. Ere kaka wanyalo medo lony e tiyo gi Wach Nyasaye?

¹⁹ Ligangla ma ne jolwenj Rumi tiyogo ma Paulo ne wuoyoe borne ne romo sentimeta 50 to ne giting’ogi e lwetgi sama gikedo. Achiel kuom gimomiyo jolwenj Rumi ne olony ahinya e tiyo gi ligangla en ni ne gitiegore ka gitiyo kodgi pile ka pile.

²⁰ Paulo nopimo Wach Nyasaye gi ligangla ma Jehova omiyowa. Kata kamano, nyaka wabed molony e tiyo kode sama wakedo ne yiewa kata sama dwarore ni walok pachwa e wach moro. (2 Kor. 10:4, 5; 2 Tim. 2:15) Ere kaka inyalo medo lony e tiyo gi Muma? Sebastian ma jahigni 21 wacho niya: “Bang’ somo sula moro e Muma, andikoga ndiko moro ma omora. Atemo mondo abed gi ndiko mang’eny ma ahero. Timo kamano miyo ang’eyo paro ma Jehova nigo.” Daniel ma ne osewuo kuome motelo wacho niya: “Sama asomo Muma, ayieroga ndiko moko ma anyalo konyogo ji sama an e tij lendo. Asefwenyo ni ji chiko itgi sama gineno ni ihero weche manie Muma, kendo itimo duto ma inyalo mondo ikonygi.”

21. Ang’o momiyo ok onego waluor Satan gi jochiendene?

²¹ Mana kaka rowere ma osewuo kuomgi e sulani owacho, onge tiende mondo iluor Satan kod jochiendene. Gintie, to wanyalo loyogi. To bende gibiro tho. Machiegnini e kinde Loch Yesu mar higni Alufu Achiel, ibiro twegi kendo ok gibi hinyo ng’ato ang’ata kae to bang’e ibiro tiekgi chuth. (Fwe. 20:1-3, 7-10) Wang’eyo jasikwa, wang’eyo yore motiyogo, kendo wang’eyo gima odwaro. Kata kamano, kokalo kuom teko mar Jehova wanyalo kwede!