Sama Ngima Obedo Matek ma Kaka Itim Onge

Kuom ranyisi, ka ne apaka mager oyweyo alwora ma Sallya nodakie e piny Amerka, nolalo chiegni gimoro amora ma ne en-go. Owacho kama: “Naneno ni ne ok anyal dhi nyime nano. Lit ma ne an-go noroma.”

To nade ka watni kata osiepni otho? Janice modak Australia wacho kama: “Ka ne yawuota ariyo otho moluwore oluwore, nawinjo e chunya mana ka gima ngimana norumo. Ne aywak ne Nyasaye kama: ‘Kama koro ochopeni, aneno ka tek mohinga. Weya aweya atho. Ok adwar dhi nyime bedo mangima.’”

Daniel to nowinjo malit ahinya ka ne chiege odonjo e chode. Owacho niya: “Ka ne chiega onyisa ni ne osebedo ka ochodo, wachno nodonjona malit ahinya mana ka gima ng’ato nochuoya gi pala. Wachno ne miyo awinjo malit e chunya pile ka pile kuom dweche mang’eny.”

Gasedni olos mondo okonywa neno gimomiyo ok onego wajog gi ngima sama

• Masira oyudowa

• Watwa kata osiepwa otho

• Ng’at ma wakendorego ochodo

• Wan gi tuo ma nyalo negowa

• Weche richo ma wagombo mana tho

Mokwongo, we wane ane gima wanyalo timo ka chandruok moro oyudowa.