Sama Masira Oyudi

“Oula mager kod chuodho noketho mwanduwa duto. Ne wawinjo ka warumo.”—Andrew modak Sierra Leone.

“Bang’ yamo mager ma ne ogoyo alworawa, ne wadok e odwa ma wayudo ka onge gimoro amora ma nodong’. Dhowa nomoko mi nyara nopodho piny mochako mana ywak.”—David modak Virgin Islands.

KA PO ni gik ma kamago osetimoreni, inyalo winjo kaka jomamoko ma osegayudo masiche ma kamago winjoga. Dhogi nyalo moko, pachi nyalo lal, inyalo bedo gi parruok mang’eny, kod lek maricho, kata samoro ok inyal yie ni in e ma gima kamano otimoreni. Joma gik ma kamago osetimorenegi, chunygi nyosorega ahinya ma gigomb mana tho.

Ka po ni in bende iselalo gik moko nikech masiche kaka mago, inyalo bedo gi parruok mang’eny ma chop kama koro ok inyal dhi nyime nano. Mago e seche ma bende ngima nyalo bedoni matek ma igomb mana tho. Kata kamano, Muma wacho gimomiyo ok onego ijog gi ngima kendo olero weche ma nyalo miyo ibed gi geno ni ngima biro bedo maber e kinde ma biro.

ADIERA MA NI E MUMA KONYOWA BEDO GI GENO

Eklesiastes 7:8 wacho kama: ‘Giko mar gimoro oloyo chakruokne gi ber.’ Sama itemo mondo ichak ngima bang’ yudo masira, inyalo neno ni ngima en kayiem nono. Kata kamano, kitimo kinda mondo ngimani oduog e wang’e kendo ibedo gi horuok, mosmos weche biro chako bedo maber.

Muma nosekoro chon ni kinde biro ma onge joma biro ywak kata matin nikech chandruok. (Isaiah 65:19) Mano biro timore e kinde ma ibiro los piny obed paradiso ka koro Pinyruodh Nyasaye locho. (Zaburi 37:11, 29) E kindeno, masiche ok nobedie kendo. Lit moro amora ma ng’ato nyalo bedogo nikech masira ma noyude biro rumo nimar Nyasaye ma nyalo duto singonwa kama: “Wi ji nowil gi weche machon, ok ginipargi.”—Isaiah 65:17.

Par ane wachni: Jachuech ‘miyi gima inyalo igeno,’ tiende ni ngima mopong’ gi kue e bwo lochne. (Yeremia 29:11) Donge ng’eyo wachno nyalo miyo idhi adhiya nyime nano kata weche tek? Sally ma ne osewuo kuome e sula mokalo wacho niya: “Paro gik mabeyo ma Pinyruodh Nyasaye biro timonwa e kinde ma biro, nyalo konyo ng’ato mondo kik oket pache e gik maricho ma notimorene, to kar mano, odhi adhiya nyime nano.”

Donge inyalo puonjori gik mathoth ma Pinyruodh Nyasaye chiegni timo ne dhano? Timo kamano biro miyo kik ijog gi ngima kata bed ni iseyudo masiche ma chalo nade, kendo biro miyo irit ngima ma biro ka in gi siso. Gie sani, Muma oting’o puonj ma nyalo konyi nyagori gi pek ma in-go bang’ yudo masira. Ne ane moko kuom puonjgo.

Ndiko ma Nyalo Konyi Nyagori

Yue moromo.

“Yueyo matin ber moloyo tich matek.”—Eklesiastes 4:6, New World Translation.

Jotim nonro osefwenyo ni sama ng’ato oyudo masira marach ma miyo odong’ gi parruok, ‘ka ok onindo moromo, parruok ma en-go nyalo medore ma chop kama koro odong’ kong’eng’ ang’eng’a.’ Omiyo, en gima dwarore ahinya ni ng’ato oyue moromo.

Nyis ng’ato kaka iwinjo.

‘Weche mapek ma nie chuny dhano miyo dhano ol; to kotwag kode maber, obedo ma mor.’—Ngeche 12:25.

Nyis watni moro mihero kata osiepni migeno gik ma chandi. Ginyalo chikoni itgi maber, ginyalo jiwi, kendo ginyalo konyi maber.a

Par ngima maber moritowa nyime.

“Nitie polo manyien gi piny manyien ma warito ka luwore gi kaka [Nyasaye] nosesingo, kendo ma tim makare nobedie.”—2 Petro 3:13.

a Ka parruok obedo mang’eny mokalo tong’, ber dhi e osiptal bende.