Inyalo Timo Ang’o Mondo Ibi Idag e Ngima Maberie Mogik?

KIT ngima ma wadakie sani ok e ngima ma Nyasaye ne dwaro ni wadagie. Pinyni nonego opong’ gi dhano mochiwo luor ne Jachuech, moyie mondo Jachuech otagi, moherore, kendo ma nyiso kido mamoko mabeyo kaka mag Nyasaye. Nonego bed ni gitiyo kanyachiel ka gimor sama gipidho joutegi, gifwenyo yore manyien mag timo gik moko, kendo giloso piny obed paradiso.

NYASAYE OSINGO NI OBIRO MIYO JI ODAG E PINYNI KAKA NODWARO CHAKRE CHON

• “Otieko lwenje e piny duto.”​—Zaburi 46:9, The Bible in Luo, 1976.

• “Kinde ma noseket nochopo . . . mar kelo kethruok ne joma ketho piny.”​—Fweny 11:18.

• ‘Japiny ok nowach ni, “Atuo.”’​—Isaiah 33:24.

• “Jogo mayiedho nomor gi tich luetegi ndalo mang’eny.”​—Isaiah 65:22.

Weche mokorgo biro timore e yo mane? Nyasaye oseyiero Yesu Kristo Wuode mondo obed Ruoth e sirkal ma jaber ma ni e polo ma biro locho e wi piny. Muma luongo sirkandno ni Pinyruodh Nyasaye. (Daniel 2:44) Muma wuoyo kuom Yesu kama: “Nyasaye biro miye kom-loch . . . , kendo obiro locho kaka Ruoth.”​—Luka 1:32, 33.

Ka ne Yesu ni e piny, notimo honni mang’eny konyisogo kaka lochne biro kelo ne dhano ngima maber moloyo ngima ma sani.

YESU NOTIMO GIK MA NE NYISO KAKA LOCHNE BIRO KONYO DHANO MA WINJO NYASAYE

• Nochango joma ne nigi tuoche mopogore opogore konyisogo kaka obiro tieko ne dhano tuoche kod ng’ol duto.​—Mathayo 9:35.

• Nokueyo apaka mager konyisogo kaka obiro geng’o ne dhano masiche ma dhano ok nyal geng’o kendgi.​—Mariko 4:36-39.

• Nopidho ji mang’eny konyisogo kaka obiro miyo dhano chiemo kod gik mamoko ma dwarore.​—Mariko 6:41-44.

• Noloko pi obedo divai e arus moro konyisogo kaka obiro miyo dhano odag gi mor.​—Johana 2:7-11.

Inyalo timo ang’o mondo ibi idag e ngima maber ma Nyasaye oiko ne joma ohere? Nitie yo moro ma dwarore ni iluw. Muma wacho ni yorno en yo ma “tero ji e ngima, to ji manok e ma nwang’e.”​—Mathayo 7:14.

KAKA INYALO YUDO YO MA DHI E NGIMA MABER

Yo ma dhi e ngima en yo mane? Nyasaye wacho kama: “An Jehova Nyasachi, mapuonji mondo iyud konyruok, mateloni e yo madidhie.” (Isaiah 48:17) Kiluwo yorno, ngimani biro bedo maber.

Yesu nowacho kama: “An e yo, kendo an e adiera, kendo an e ngima.” (Johana 14:6) Ka watimo gik ma Yesu nowacho kendo waluwo ranyisi mare, wabiro sudo machiegni gi Nyasaye kendo ngimawa biro bedo maber.

Ere kaka inyalo yudo yo ma dhi e ngima? Kata obedo ni nitie dinde mang’eny, Yesu nochiwo siemni: “Ok ji duto ma luonga ni, ‘Ruoth, Ruoth,’ [e ma] nodonj e Pinyruodh polo, to mana ng’atno ma timo dwaro mar Wuora manie polo e ma nodonj.” (Mathayo 7:21) Nowacho bende ni: “Olembgi e ma unung’egigo.” (Mathayo 7:16) Muma nyalo konyi fwenyo lamo madier kendo poge gi mar miriambo.​—Johana 17:17.

Ere kaka inyalo luwo yo ma dhi e ngima? Inyalo luwo yorno mana king’eyo Jal ma nochiwonwa ngima e yo maber. Kuom ranyisi, inyalo ng’eyo nyinge, kite, gima otimo sani, kod gima odwaro ni watim.a

Nyasaye ok dwar mana ni mondo wati, wachiem, watug, kendo wanyuol. Mopogore gi mago, Jachuechwa dwaro ni wang’eye e yo maber kendo wabed osiepene. Wanyalo nyiso ni wahere ka watimo dwache. Yesu nowacho niya: “Ma e ngima ma nyaka chieng’, ni ging’eyi in Nyasaye makende mar adier.”​—Johana 17:3.

OKANG’ MOKWONGO MONEGO IKAW MONDO IWUOTH E YO MA DHI E NGIMA

Ka wang’eyo gima Nyasaye dwaro ni watim, biro dwarore ni watim lokruok moko e ngimawa. Mano nyalo nenore ka gima tek. Kata kamano, adiera en ni ng’eyo Nyasaye e gima onego watim mokwongo ka wadwaro ni wawuoth e yo ma dhi e ngima maber. Ka diher yudo dwoko mag penjo ma in-go e wi Nyasaye, ng’e ni Joneno mag Jehova oikore puonji Muma nono e sa ma ber kodi kendo kama iyiero. Inyalo tudori kodwa e websaitwa mar www.jw.org/luo.