Dog Ilim Jogo Duto Manyiso Kata Mana Matin Ni Ginyalo Winjo

¹ Thothwa ni e adiera nikech ng’at moro ne oneno chuny maber ma ne wawinjogo wach Pinyruoth, mi notimo kinda moduogo​​—⁠dibed kata ni ne oduogo nyading’eny​​—⁠mondo omed pidho gombono e chunywa. Wan bende onego watim sinani mar dok limo jogo duto manyiso kata mana matin ni ginyalo winjo. Kuom adier, migawo momiwa mar ‘timo jopuonjre’ oriwo kata dok limogi.​​—⁠Math. 28:⁠19, 20.

² Fweny Jogo Manyalo Winjo: Kata ka ng’ato ok oyie kawo buk, wang’e, dwonde, kata mana weche motiyo godo nyalo nyiso ni en gi chuny mar winjo wach Pinyruoth kata obed mana e yo matin. Nikech mano, wanyalo dok lime kendo. Owadwa moro ne otimo limbe ne ng’at moro kuom jumbe abich maluwore ka ng’atno ok kaw buk moro amora. Kane odhi mar auchiel, ng’atno ne oyie kawo buk, mi gikone ne gichako puonjore Muma.

³ Ka ifwenyo ni ng’ato nyalo winjo, dog mapiyo, kata mana odiechienge manok bang’e. Kik imi “Ng’a Marachno” thuolo mar mayo ng’atno gima osechwo e chunye. (Math. 13:19) Ne ni irito singruokni kapo ni ne itimo chenro mar dok e odiechieng’ kata e sa ma ne uwinjore kode.​​—⁠Math. 5:​37.

⁴ E Lela kod Wang’ Yore: Be itemo mondo iyud thuolo mar pidho gombo e chuny jogo ma iselendonegi e lela koda e wang’ yore kata jogo ma nyalo bedo ni ilendoni to nende ok ichano? Seche ma itieko wuoyo kode, inyalo wachone kama: “Asemor ahinya wuoyo kodi. Wanyalo romo nade mondo omi wachak wawuo kendo? ” Ka owinjore, jolendo moko nyalo yiero miyo jalno nambagi mar simo kata penjo ka en bende onyalo miyogi mare. Ka ji neni e lela kata e wang’a yo kamoro achiel nyading’eny, ok gibi bedo gi chich moro e miyi nembni maggi mag simo, posta kata nyisi kama gidakie. To kata ka ok gidwar nyisi kaka inyalo tudori kodgi, podi inyalo medo pidho gombono e chunygi chieng’ ma uchako uromo e lela kata e wang’a yo kanyo.

⁵ Seche ma waneno yath ma wapidho ma waolone pi kadongo maber, mano kelonwa ilo. Kamano bende, wanyalo bedo gi ilo mogundho ka wadok timo limbe kendo ka wakonyo ji mondo omed timo dongruok e Wach Nyasaye. (1 Kor. 3:6) Pidh ei chunyi dwaro mar dok timo limbe ne jogo duto manyiso kata mana matin ni ginyalo winjo wach.