Sandug Penjo

◼ Ere kaka wanyalo ng’eyo joma owinjore wawenegi bugewa?

Gima duong’ moloyo en neno kabe ng’ato orwako wach. Ka en kamano, wanyalo weyone gasede ariyo, brosua, kata buk moro amora ma walendogo. Onego wamiye bugego kata kapo ni en gi chiwo matin kata ka ok ochiwo gimoro ne tij piny ngima. (Ayub 34:19; Fwe. 22:17) Kata kamano, ok wabi weyo bugewa ne joma ok dwar somogi.—Math. 7:6.

Gin yore mage ma wuon ot nyalo nyisogo ni orwako wach? Yo maber en koikore wuoyo kodwa. Mano nenore ayanga ka ochiko ite seche ma wawuoyo, kodwoko penjo, kata ka en bende ochiwo pache. Ka oluwore kodwa ka wasomo Muma, mano nyiso ni omiyo Wach Nyasaye luor. Seche moko, nyalo bedo maber ka wapenje kabe obiro somo buk ma wadwaro miye. Jolendo onego oti gi rieko e fwenyo joma orwako wach. Kuom ranyisi, seche ma walendo e wang’ yore, ok owinjore wathor miyo amiya ji gasede, brosua, kata bugewa. Ka onge gimoro amora manyiso ni ng’ato orwako wach, ber ka wamiye mana trakt kata kalatas mar gwelo ji e chokruogewa.

Kamano bende, jalendo onego okaw mana buge moromore gi dwaro mare e tije mar lendo to ok kaluwore gi nyalo mare mar golo chiwo e kanyakla. Chiwo ma wagolo konyo e siro tije duto motenore gi lendo e piny ngima, to ok chulo bugewa. Kata obedo ni wan gi yuto maromo nade, chuny mar erokamano biro miyo wasir tije mag Pinyruoth kokalo kuom chiwo mawuok e chunywa, to ok kuom gima odong’ bang’ chopo dwachwa wawegi. (Mari. 12:41-44; 2 Kor. 9:7) Chuny ma kamano bende biro miyo wakaw mana buge ma wadwaro tiyogo maok waketho mwanduwa moting’o weche Nyasaye.

[Weche manie ite mar 2]

Jolendo onego oti gi rieko e fwenyo joma orwako wach