Be Iikori ne Masira?
1. Ang’o momiyo ikruok ne masira manyalo timore en gima nyiso rieko?
1 Higa ka higa, ji tara gi tara e piny mangima moriwo nyaka owete gi nyiminewa hinyore kata tho nikech yiengini mag piny, kodh yamo, yamo mager, yamb kalausi, koda pi ohula. To nikech masichegi gin gik matimore apoya kendo ginyalo mako ng’ato ang’ata kuomwa, ikruok chon en gima nyiso rieko.—Nge. 21:5.
2. Ang’o momiyo onego wanyis jodongo kuonde ma wadakie gie sani kaachiel gi nembni magwa mag simo?
2 Ka Masira Podi: Seche moko sirkal nyalo chiwo siem kuom masiche machiegni timore. Chiko itwa ne siem ma kamago en gima dwarore ahinya. (Nge. 22:3) E kinde kaka mago, jodong-kanyakla biro temo mondo gitudre gi jokanyo duto mag kanyakla mondo gikonygi timo ikruok madwarore. Bang’ masira bende, jodongo biro temo mondo gitudre gi jo kanyakla duto mondo gine ni gin kare kendo fwenyo kony manyalo bedo ni dwarore. Kinde malach nyalo kethore ka jodongo ok ong’eyo kuonde ma owete gi nyimine odakie, kata ng’eyo nembni mag simo ma gitiyogo gie sani. Kuom mano, en gima dwarore ahinya ni mondo jolendo onyis jagoro kod jarit puonjruok-buk kuonde ma gidakie gie sani kod nembni maggi mag simo.
3. Ere kaka wanyalo riwo jodongo lwedo kapo ni wadak kama masira jabedoe?
3 Ka kanyakla ni kama masira jabedoe, jodongo nyalo kwayo jolendo mondo ochiw nying’ koda nembni mag simo mag wedegi kata osiepegi ma odak kuma chielo ma inyalo ti godo e manyogi kapo ni masira oneno. Timo kamano biro konyo jodongo ng’eyo ni to gin ng’a gini ma osewuok kar masirano. Jodongo bende nyalo bedo gi chenro manyiso gima kanyakla biro timo kapo ni masira oneno, kaka gik ma ng’ato ka ng’ato onego oikrego, chenro mag daro ji, koda mag konyo jogo monego omi kony makende. Riwo lwedo chenrogi manyiso hera, en gima dwarore ahinya.—Hibr. 13:17.
4. Ang’o monego watim ka kama wadakie onwang’o masira?
4 Bang’ Masira: Ang’o monego itim ka kama idakie onwang’o masira? Tem ahinya mondo irit dwaro mag ringruok mochuno ahinya mag joodi. Kaluwore gi nyalo mari, chiw kony madwarore ne jomoko ma masira oyudo. Tem mondo itudori gi jarit puonjruok-buk kata jaduong’ moro machielo mapiyo kaka nyalore. Mae en gima onego itim kata ka dabed ni in kare kendo ionge gi kony midwaro. Ka idwaro kony e kinde mag masira, bed gi adier ni oweteni temo kar ma diginyal mondo omi gikonyi. (1 Kor. 13:4, 7) Ng’e ni Jehova ong’eyo chal mari, kendo bed gi geno ni obiro riti. (Zab. 37:39; 62:8) Kaw thuolo mar hoyo jomoko ka ijiwogi e Wach Nyasaye. (2 Kor. 1:3, 4) Doguru e yoreu mapile mag tij Nyasaye mapiyo kaka nyalore.—Math. 6:33.
5. Wan kaka Jokristo, wakawo kendo neno nade wach masiche manyalo timore?
5 Kata obedo ni ng’eyo ni masira nyalo poyo sa asaya kelo parruok mang’eny e chuny ji, wan wanyalo bedo gi geno motegno mar kinde mabiro. E kinde mokayo machiegni, masiche duto biro bedo gik machon. (Fwe. 21:4) Gie sani ka masira pok otimore, wanyalo kawo okang’ madwarore mondo omi waikore ne kinde matek mag chandruok manyalo bironwa, ka wadhi nyime gi nyiso kinda e lando ne jomoko wach maber.