Omiwa Mwandu Mondo Wati Godo

¹ Jaote Paulo ne okawo tij lendo ma ne Nyasaye omiye kaka ote maduong’, mi ne oluongo tijno ni ‘mwandu.’ (2 Kor. 4:7) Ne onano e bwo chandruok kod sand e chopo oteno. Ne olendo ma ok owe ne ng’ato ang’ata ma ne oyudo. Ne odhi kuonde mang’eny matek chopoe kendo koneno masiche ka otiyo gi yiedhi maringo e nam kendo ka otiyo gi nderini. Ere kaka wanyalo luwo ranyisi mar Paulo e nyiso ni wakawo tijwa mar lendo kaka ote maduong’? (Rumi 11:13) Ang’o mamiyo ote marwa mar lendo bedo mwandu maber maloyo duto?

² Mwandu Maber Maloyo Duto: Kinde mang’eny, mwandu mag piny kelo mana chuny ma chandore kendo kelo kony ma ok siki. Mopogore gi mano, ote marwa mar lendo kelo kony mosiko ne wan koda gi jomoko. (1 Timo. 4:​16) Okonyo joma chunygi dwaro ng’eyo adiera mondo ong’e Jehova, gitim lokruok madwarore e ngimagi kendo giyud geno madier mar ngima ma nyaka chieng’. (Rumi 10:13-​15) Kawo otewa mar lendo kaka gima duong’, konyowa tiyo gi ngimawa e yo maber, omiyowa mor kuom gima wasetimo e ngima, kod geno maber mar kinde mabiro.​—1 Kor. 15:58.

³ Nyis ni Ikawo Mwandu Momiyi Kaka Gima Duong’: Gima nyiso ni wakawo gimoro kaka gima duong’ kata kaka gima tin, luwore kod gima waikore chiwo mondo wayudgo gino. Mano kaka ote ma wan-go mar tiyo gi thuolowa koda tekrewa e pako Jehova en ote makende! (Efes. 5:​16, 17) Kaka watiyo gi thuolowa onego onyis ni, wakawo tiyo ne Nyasaye kaka gima duong’ e ngima moloyo manyo gik ringruok. Nikech wan kod gima ber ahinya monego wachiw ne jomoko, onego walend ka wan gi ilo kendo ka waikore seche duto mag lando wach maber e thuolo moro amora ma wayudo.

⁴ Mwandu ma nengone tek moloyo ok en gima ipando, to en gima iketo e lela mondo ji one. Ka wakawo ote marwa mar lendo kaka mwandu, mano biro nenore ahinya e kit ngimawa. (Math. 5:​14-​16) Ka wanyiso gi chunywa ni wagoyo erokamano, we waluw uru ranyisi ma Paulo ne oketo ka watiyo gi thuolo duto ma wayudo e nyiso ni wakawo tijwa mar lendo kaka ote maduong’, tiende ni kaka mwandu.