Kaw gi Pek Thuolo Momiyi mar Tiyo ne Nyasaye
1. Thoth ji e piny neno nade tijwa mar lendo?
1 Ji mang’eny e piny Satanni neno tijwa mar lendo ka “fuwo.” (1 Kor. 1:18-21) Ka ok watang’, paro maok owinjoreni nyalo nyoso chunywa kendo duoko kinda ma wan-go chien. (Nge. 24:10; Isa. 5:20) Ang’o momiyo onego wakaw gi pek thuolo makende ma wan-go mar bedo Joneno mag Jehova?—Isa. 43:10.
2. Ang’o momiyo inyalo wach ni tij lendo en “tich maler”?
2 “Tich Maler”: Jaote Paulo nowuoyo kuom tij lendo kaka “tich maler.” (Rumi 15:15, 16, NW) Tij lendo en “tich maler” e yo mane? Tiyo tijni miyo wabedo “jotich kaachiel” gi ‘Jal maler’ ma en Jehova, kendo konyo e pwodho nyinge. (1 Kor. 3:9; 1 Pet. 1:15) Jehova neno tijwa mar lendo kaka “misango ma en pak,” omiyo, tij lendo en gima duong’ ahinya e lamo marwa.—Hib. 13:15.
3. Ang’o momiyo en luor makende tiyo tij lando wach maber?
3 Lando wach maber en luor makende ma omi mana joma nok. Malaike ne nyalo mor ahinya tiyo tijno kendo ne ginyalo tiye e yo maber ahinya. (1 Pet. 1:12) Kata kamano, Jehova oseyierowa wan dhano morem, “agulini mag lowo” mondo wati tich makendeni!—2 Kor. 4:7.
4. Wanyalo nyiso nade ni wakawo gi pek tijwa mar lendo?
4 Tich Mwamiyo Thuolo Mokwongo: Nikech kuom adier wakawo gi pek tijwa mar lendo, wanene kaka achiel kuom gik “madwarore moloyo” e ngimawa. (Fili. 1:10, NW) Kuom mano, waketo tenge thuolo moro juma ka juma mondo wariw lwedo tij lendo. Jathum mokawo gi pek thuolo makende ma en-go mar tugo thum e band moro mong’ere e piny ngima, biro ikore pile mondo omed tiego lony mare. Kamano bende, wabiro ikore maber kapok wadhi e tij lendo mondo ‘wapuonj kare wachno mar adiera,’ kaachiel gi timo kinda mondo wamed lony marwa e ‘puonjo.’—2 Tim. 2:15; 4:2.
5. Ng’ano mamor ahinya gi tijwa mar lendo?
5 Kik iwe mondo paro maok owinjore mar jomoko onyos chunyi. Ket e paro ni podi nitie ji mang’eny e alworawa marwako wach seche mwalimogi. Kata kamano, ok watim kinda mondo wamor dhano. Gima duong’ ahinya en kaka Jehova nenowa, kendo omor gi kinda mwatimo kowuok e chunywa.—Isa. 52:7.