Weche 12 Momiyo Walendo

Ang’o momiyo walendo kendo puonjo ji wach maber? Dibed ni gima duong’ en konyo joma chunygi ni kare donjo e yo madhi e ngima? (Math. 7:14) Mano e wach mondik mokwongo e weche 12 moket piny kaegi, to kata kamano, ok en e gima duong’ momiyo walendo. Kuom weche 12 momiyo walendogi, iparo ni mane e maduong’ moloyo?

1. Tijwa mar lendo reso ngima ji.—Joh. 17:3.

2. Tijno chiwo siem ne jomaricho. —Eze. 3:18, 19.

3. Lando wach maber en achiel kuom weche ma nokor ei Muma masani chopo. —Math. 24:14.

4. Tijno nyiso ni Nyasaye en jang’ad bura makare. Onge ng’at ma chieng’ moro nyalo wacho ni Jehova notieko jomaricho maok omiyogi thuolo mar loko chunygi. —Tich 17:30, 31; 1 Tim. 2:3, 4.

5. Okonyowa chulo gowi ma wan-go mar konyo joma Nyasaye nong’iewo gi remb Yesu mondo obed gi winjruok maber kode. —Rumi 1:14, 15.

6. Lendo miyo ok wabed gi buch remo. —Tich 20:26, 27.

7. Mondo wayud resruok, nyaka walendi.—Eze. 3:19; Rumi 10:9, 10.

8. Sama walendo, wanyiso ni wahero jowetewa.—Math. 22:39.

9. Sama walendo wanyiso ni wayie mondo Jehova gi Wuode ochikwa.—Math. 28:19, 20.

10. Tij lendo en achiel kuom yore mwalamogo Nyasaye.—Hib. 13:15.

11. Lendo en yo mwanyisogo ni wahero Nyasaye.—1 Joh. 5:3.

12. Tijwa mar lendo konyo e miyo nying Jehova obed maler.—Isa. 43:10-12; Math. 6:9.

En adier ni magi kende ok e gik momiyo walendo. Kuom ranyisi, lendo tego yiewa kendo miyowa thuolo makende mar tiyo kanyachiel gi Nyasaye. (1 Kor. 3:9) Kata kamano, gima duong’ moloyo momiyo walendo en moket e namba 12. Bed ni ji winjowa kata gitamore, tijwa mar lendo konyo e miyo nying Nyasaye obed maler kendo omiyo Jehova dwoko ma dochiw ne jal ma kwede. (Nge. 27:11) Kuom adier, wan gi gik mang’eny ma jiwowa mondo wadhi nyime gi ‘puonjo kendo yalo’ wach maber ‘maok waweyo.’—Tich 5:42.