Luw Ranyisi mar Japuonj Maduong’ Kitiyo gi Buk mar Muma Puonjo
1. Yesu ne puonjo e yo mane?
1 Japuonj Maduong’ ma en Yesu Kristo, ne lero e yo mayot kendo mawinjore maler gik ma ne opuonjo. Mondo omi joma winje oti gi pachgi, ne okwongo penjogi paro ma gin-go kuom wachno. (Math. 17:24-27) Ne owuoyo ka onyiso ji mana gima Wach Nyasaye wacho. (Math. 26:31; Mari. 7:6) Ne otemo ahinya mondo kik opuonj jopuonjrene gik mang’eny dichiel, ka ong’eyo ni podi ne gidhi medo puonjre. (Joha. 16:12) Yesu be ne dwaro ng’eyo kabe jopuonjrene ne keto yie margi kuom gigo ma ne opuonjogi kendo kabe ne giwinjo tiend puonjgo. (Math. 13:51) Buk mar Muma Puonjo olosi mondo okonywa puonjo ji e yo ma kamano.
2. Wanyalo tiyo kod penjo manie chak sula ka sula e yo mane?
2 Penjo Michakogo: Seche ma ichako sula, ber mondo ichak gi penjo manie chak sulano e bwo wiye maduong’. Som penjogo, ok mar yudo dwoko, to mana mar miyo japuonjre obed gi gombo mar ng’eyo. Kata inyalo kwaye mondo ochiw dwoko machuok kuom penjogo. Onge tiende wuoyo aming’a e sechego kuom dwoko ma ochiwogo, kata rieyo gik ma ok ni kare duto ma owacho sano. Inyalo mana goyone erokamano kuom paro ma ochiwono, kae to uchak puonjru sulano. Dwoko mochiwo kuom penjo manie chak sula biro konyi ng’eyo kuonde ma nyalo dwarore mondo ijiw moloyo e sulano.
3. Ere kaka wanyalo keto puonjruok obed mayot?
3 Ndiko: Nono Ndiko onego obed gima duong’ e puonjruok ma utimono. (Hibr. 4:12) Kata kamano, ok ochuno ni nyaka usom Ndiko duto moketi. Jiw Ndiko ma siro yie marwa. Ndiko mawuoyo mana kuom weche moko malero gima timore ok ochuno ni nyaka som. Buk mar Muma Puonjo lero adiera e yo ma ok tek winjo. Ket puonjruok obed mayot. Jiw mana thuond weche, kik iwuo ahinya kuom weche matindo tindo kata rwako weche ma ok otudore gi puonj ma iwuoye ma onge gimomiyo.
4. Ang’o manyalo miyo wakaw thuolo e seche mag puonjruok mondo wawuo kata kik wawuo kuom weche manie apendiks?
4 Apendiks: Weche manie apendiks oting’o puonj 14 malero weche manie sula ma gitudore godo. Inyalo yiero mondo iwuo kata kik iwuo kuom apendiksgo e seche mag puonjruok. Nitie sula moko ma bang’ puonjruok, inyalo jiwo japuonjre mondo osom weche manie apendiks motudore kod sulano ka en kende, to moloyo ka owinjo tiend puonj manie sulano kendo oyiego. Kuom ranyisi ka iyudo ni japuonjre nigi yie ni Yesu e Mesia, nyalo bedo ni ok ochuno mondo ipuonjri kode apendiks mawacho ni “Yesu Kristo—Mesia ma ne Okor Wach Kuome,” seche ma upuonjru sula mar 4 ma wacho ni, “Yesu Kristo En Ng’a?” E kinde moko, ber ka ukawo thuolo matin e seche ma upuonjru mondo uwuo kuom weche moko e apendiks, kata apendiks mangima.
5. Ka wayiero wuoyo kuom weche manie apendiks, wanyalo timo kamano nade?
5 Ka iyiero wuoyo kuom weche manie apendiks, inyalo kwongo iko penjo kendo usom paragraf ka paragraf gi japuonjre mana kaka utimo gi sula mag buk. Kata kaluwore gi dwaro mag japuonjre, inyalo kawo dakika matin e seche ma upuonjru mondo unon weche manie apendiks kode. Mano biro konyi ng’eyo kabe owinjo tiend gima ne osomo ka en kende.
6. Ere kaka inyalo ti gi sanduk minwoyogo puonj e giko mar sula ka sula?
6 Sanduk Minwoyogo Puonj: Sanduk mayudore e giko mar sula ka sula nigi weche machiwo dwoko kuom penjo manie chak sula. Inyalo tiyo gi wechegi mondo uwuo kuom thuond weche manie sula. Jolendo moko osenwang’o ni en gima konyo somo gi japuonjre weche manie sandugno kod ndiko moket kanyo. Bang’ mano to ginyiso japuonjre mondo oler e yo machuok kaka ndikogo siro wechego. Mano konyo japuonj ng’eyo kabe japuonjre owinjo maler tiend thuond weche mag sulano, kod kaka wechego isiro kod Muma kendo kabe oyie kod puonjgo. Bende timo kamano tiego japuonjre mondo oti gi Muma ka olero adiera ne jomoko.
7. Wanyalo tiyo nade gi buk mar Muma Puonjo e chopo ote marwa mar lendo?
7 Yo maber ahinya mar chopo ote marwa mar puonjo ji kod timo jopuonjre en luwo ranyisi ma Yesu ne oketo e yorene mag puonjo. (Math. 28:19, 20) Buk mar Muma Puonjo nyalo konyowa timo kamano. Ti kode maber e puonjo jomoko adiera e yo mawinjore maler, mayot kendo mamit.