Ti Maber gi Gik Mamoko Mayudore e Bug Muma Puonjo

Kaka japuonjre Muma medo puonjore gima Muma puonjo, kendo tiyo gi puonjgo e ngimane, e kaka omedo dongo e winjruokne gi Nyasaye, kendo nyago olembe mabeyo. (Zab. 1:1-3) Wabiro konyo japuonjre mondo otim dongruok kwatiyo gi gik mamoko ma yudore e bug Muma Puonjo.

Penjo Manie Chak Sula: Nitie penjo ma yudore e chak sula ka sula ma dwokogi yudore e sulano. Inyalo penjo japuonjreni penjogo kapok uchako puonjore sulano mondo imiye siso mar gombo ng’eyo gima ubiro wuoyoe. Kata inyalo kwaye mondo ochiw pache kuom penjogo. Onge tiende rieye gi kanyo kapo ni ochiwo dwoko ma ok kare. Dwoko mochiwo biro konyi ng’eyo kuonde mibiro jiwo sama upuonjoru.—Nge. 16:23; 18:13.

Apendiks: Kapo ni japuonjre winjo maler tiend wach ma sula moro wuoyoe, inyalo kwaye mondo osom e thuolone owuon apendiks mowinjore gi sulano. E puonjruok ma luwo, inyalo kawo dakika moko matin mondo ine kapo ni nowinjo tiend apendiksno. Kata kamano, kapo ni ineno ni dwarore usom apendiks kanyachiel, inyalo timo kamano seche ma upuonjoru, kata inyalo weyo dakika moko matin mondo unon kode paragraf moko e apendiksno, kendo iti gi penjo ma ne iseiko chon.

Sanduk mar Nwoyo Puonj Madongo: Sandugni yudore e giko sula ka sula, kendo ochiwo dwoko mag penjo ma yudore e chak sulano. Inyalo tiyo gi sandugni e neno ka japuonjreni owinjo tiend gima upuonjoru, kata kapo ni onyalo lero tiend weche madongo musepuonjoru. Somuru wechego kaachiel gi ndiko duto man kanyo gi dwol. Kae to ikwa japuonjreni mondo oti gi ndikogo e lero gimomiyo wechego gin adier.—Tich 17:2, 3.