“Omiyo Jo Mool Teko”
1 Waduto waol kinde ka kinde. Wanyalo ol ok mana nikech tije ma jonyo del to bende nikech gik matimorenwa e ‘kindegi mag chandruok.’ (2 Timo. 3:1) Kaka jotich Jehova, ere kaka wanyalo yudo teko madwarore mondo kik chunywa ol mi wadog chien e tijwa mar lendo? Watimo kamano ka waketo genowa kuom jal ma “tekone” ng’eny, ma en Jehova. (Isa. 40:26) Ong’eyo dwachwa kendo odwaro konyowa gadier.—1 Pet. 5:7.
2 Kaka Jehova Konyo: Jehova miyowa teko kokalo kuom roho mare maler, ma e teko maduong’ ma ne otiyogo e chweyo gik moko duto. Roho mar Nyasaye miyo ‘tekowa duogo’ kapo ni waol. (Isa. 40:31) Penjri niya, ‘Ne en karang’o mogik ma ne alamo ka akwayo ni ayud roho maler mondo omiya teko mar chopo migawona kaka Jakristo?’—Luka 11:11-13.
3 Ka pile wasomo kendo waparo matut kuom Wach mondiki kuom much Nyasaye, kendo ka wagago kokalo kuom puonjruok bugewa mag Jokristo pile, wabiro bedo kaka “yath mopidh e dir aore mag pi, ma nyago olembe e ndalone, ma oboke bende ok tuwo.”—Zab. 1:2, 3.
4 Jehova bende tiyo gi Jokristo wetewa ‘e hoyo chunywa.’ (Kolo. 4:10, 11) Gimiyowa teko ka wan e chokruoge mag kanyakla kokalo kuom wuoyo kodgi, paro ma gichiwo koda twege ma gigolo. (Tich 15:32) To moloyo, Jokristo ma gin jodong-kanyakla chiwo kony e wach Nyasaye kendo jiwo chuny ji.—Isa. 32:1, 2.
5 Tij Lendo: Kiwinjo ka chunyi chako ol, kik iwe tij lendo! Mopogore gi tije mamoko mang’eny, tiyo tij lendo pile, en gima duogo chunywa. (Math. 11:28-30) Lando wach maber konyowa keto chunywa kuom Pinyruodh Nyasaye, kendo pachwa bedo kuom gweth mabeyo mag ngima mosiko.
6 Tich ng’eny ma onego watim ka podi ok oketh piny marachni. Dwarore ahinya mondo wachung’ motegno e tijwa, ka ‘watiyo gi teko ma Nyasaye chiwo.’ (1 Pet. 4:11) Kuom teko ma Jehova chiwo wabiro tieko tijwa nikech “omiyo jo mool teko.”—Isa. 40:29.