Tij Lendo Jiwowa e Winjruokwa gi Nyasaye
1. En ber mane ma tiyo tij lendo kelonwa?
1 Tiyo tij lendo gi kinda miyo wabedo motegno e winjruokwa gi Nyasaye kendo miyo wamedo bedo mamor. Gima duong’ mamiyo watiyo tij lendo en nikech wadwaro moro Jehova. Kata kamano, kuom luwo chik madwaro ni ‘wayal wach,’ wayudo gweth mag Jehova kendo wayudo ber e yore mamoko. (2 Tim. 4:2; Isa. 48:17, 18) Gin yore mage ma tij lendo jiwowago e winjruokwa gi Nyasaye kendo miyo wabedo mamor?
2. Tij lendo jiwowa e yore mage?
2 Ijiwowa Kendo Wayudo Gweth: Tij lendo konyowa keto pachwa e gweth mag Pinyruoth kar dewo chandruoge masani nie piny. (2 Kor. 4:18) Lero tiend puonj mag Muma jiwo yiewa kuom singo mag Jehova kendo miyo wamedo kawo adiera kaka gima duong’. (Isa. 65:13, 14) Sama wakonyo jomoko e winjruok gi Nyasaye mondo omi kik gibed “mag piny,” wajiwo chung’ marwa wawegi mar bedo ma ok mag pinyni.—Joh. 17:14, 16; Rumi 12:2.
3. Tijwa mar lendo konyowa nade bedo gi kido mag Jokristo?
3 Tiyo tij lendo miyo wanyago kido mag Jokristo. Kuom ranyisi, timo kinda mar bedo “ngeche duto ni ji duto” konyowa medo bedo gi bolruok. (1 Kor. 9:19-23) Sama wawuoyo kod jogo ‘machandore, kendo moke kaka rombe maonge jakwath,’ wapuonjore kecho jomoko. (Math. 9:36) Wapuonjore kido mar nano sama wadhi nyime gi lendo kata obedo ni ji ok dwar winjo wach mwalando kata wayudo akwede. Mor ma wan-go medore sama watiyo gi ngimawa e konyo jomoko.—Tich 20:35.
4. Ineno nade tiji mar lendo?
4 Mano kaka en gweth maduong’ bedo gi thuolo mar tiyo tij lendo mamiyo wapako Jal makende mowinjore walam! Tij lendo jiwowa. Okelo gweth mang’eny ne jogo ma ‘hulo wach maber,’ gi kinda.—Tich 20:24.