Ang’o ma Wanyalo Timo Mondo Wamed Bedo Gadier ni Jehova Biro Kelo Piny Manyien Mosingo?

1-2. Ang’o ma dwarore ni watim sama warito piny manyien?

WAMOR ahinya ni Jehova osingo ni obiro kelo piny manyien kama tim makare nobedie. (2 Pet. 3:13) Kata obedo ni ok wang’eyo ni obiro timo kamano karang’o, gik ma timore e piny sani nyiso ni piny manyien okayo machiegni.​—Mat. 24:32-34, 36; Tich 1:7.

² Gie sani, bed ni wasebedo e adiera kuom kinde ma romo nade, dwarore ni waduto wamed tego yiewa kuom singono. Nikech ang’o? En nikech kata mana yie motegno nyaloga dok chien. Jaote Paulo nowacho ni bedo ma onge yie en “richo ma duodowa mayot.” (Hib. 12:1) Mondo kik yiewa dog chien, dwarore ni wasik ka wanono gik ma nyiso ni piny manyien okayo machiegni.​—Hib. 11:1.

3. Ang’o ma wadwaro nono e sulani?

³ E sulani, wabiro nono yore moko adek ma wanyalo tegogo yie ma wan-go ni Jehova biro kelo piny manyien. Yorego gin (1) paro matut e wi rawar, (2) paro e wi teko ma Jehova nigo, kod (3) bedo modich e timo gik ma konyowa sudo machiegni gi Jehova. Kae to, wabiro neno kaka ote ma Jehova nomiyo Habakuk tego yiewa e kindewagi. Mokwongo, we wanon ane moko kuom gik ma timorenwaga ma dwaro ni wabed gi yie motegno kuom singo mar piny manyien.

GIK MA TIMORENWAGA MA DWARO NI WABED GI YIE MOTEGNO

4. Gin yiero mage monego watim ma dwaro yie motegno?

⁴ Pile ka pile, dwarore ni watim yiero ma nyiso ni wan gi yie motegno. Kuom ranyisi, dwarore ni watim yiero e wi osiepe, yore mag manyo mor, somo, kend, nyithindo, kod tich. Onego wapenjre kama: ‘Be yiero ma atimo nyiso ni an gadier ni pinyni dhi ka rumo kendo ni piny manyien okayo machiegni? Koso yiero ma atimoga nyiso ni an gi paro ma chal gi mar joma wachoga ni, “Cham ngima kawuono nikech kiny initho”?’ (Mat. 6:19, 20; Luka 12:16-21) Wabiro timo yiero mabeyo mana ka wamedo bedo gadier ni piny manyien okayo machiegni.

5-6. Ang’o momiyo onego wabed gi yie motegno sama wakalo e tembe? Chiw ane ranyisi.

⁵ Waromoga bende gi tembe ma dwaro ni wabed gi yie motegno. Inyalo sandwa, tuo moro marach nyalo goyowa, kata wanyalo romo gi pek mamoko ma miyo chunywa nyosore. Mokwongo okwongo, wanyalo neno ni wan gi teko mar nano e bwo tem moro ma waromogo. Kata kamano, ka temno odhi adhiya nyime mana kaka timorega e kinde mang’eny, biro dwarore ni wabed gi yie motegno mondo wanan kendo wadhi nyime tiyo ne Jehova ka wamor.​—Rumi 12:12; 1 Pet. 1:6, 7.

⁶ Sama wakalo e tem, wanyalo paro ni piny manyien ok bi chopo. Be mano nyiso ni yiewa odok chien? Ooyo. Par ane ranyisini: Sama koyo ng’ich ahinya, wanyalo paro ni piny biro siko kamano. Kata kamano, kor lwasi lokorega ma piny chak bedo maliet. E yo ma kamano bende, sama chunywa onyosore ahinya, wanyalo paro ni piny manyien ok bi chopo. Kata kamano, ka yiewa otegno, wabedo gadier ni Nyasaye biro chopo singoge. (Zab. 94:3, 14, 15; Hib. 6:17-19) Mano biro konyowa dhi nyime keto lamo mar Jehova obed mokwongo e ngimawa.

7. En paro mane monego watang’go?

⁷ Yie motegno dwarore ahinya bende sama watimo tijwa mar lendo. Thoth joma walandonegiga “wach maber” e wi piny manyien mabiro, paroga ni mano ok en gima nyalo timore. (Mat. 24:14; Eze. 33:32) Onego wabed motang’ mondo kik wabed gi paro ma chalo kamano. Mondo mano kik timrenwa, nyaka wamed tego yiewa. We wane ane yore moko adek ma wanyalo timogo kamano.

PAR MATUT E WI RAWAR

8-9. Ere kaka paro matut e wi rawar nyalo tego yiewa?

⁸ Yo mokwongo ma wanyalo tegogo yiewa en kuom paro matut e wi rawar. Mich mar rawar miyo wabedo gadier ni singo mag Nyasaye biro chopo kare. Sama waparo matut e wi gimomiyo Nyasaye nochiwo rawar kod kaka nochiwe, wamedo bedo gi yie motegno ni wabiro dak nyaka chieng’ e piny manyien ma Nyasaye osingo. Ang’o momiyo wawacho kamano?

⁹ Ere kaka Jehova nochiwo rawar? Jehova nooro Yesu Wuode makayo kendo ma miderma mondo obi onyuole e piny kae kaka dhano makare chuth. Ka ne Yesu nie piny kae, nonano e bwo tembe mang’eny. Kae to nosande, motho tho malit ahinya. To mano doko nengo maduong’ ahinya ma Jehova nochulo! Nyasachwa ma jahera ne ok nyal yie ni Wuode osandre kamano kendo otho mana ni mondo wadag machuok. (Joh. 3:16; 1 Pet. 1:18, 19) Nikech Jehova nochulo nengo maduong’ ahinya kamano, obiro neno ni wayudo ngima ma nyaka chieng’ e piny manyien.

PAR E WI TEKO MA JEHOVA NIGO

10. Ka luwore gi Jo-Efeso 3:20, ang’o ma Jehova nyalo timo?

¹⁰ Yo mar ariyo ma wanyalo tegogo yiewa en kuom paro e wi teko ma Jehova nigo. Jehova nigi teko mar timo gimoro amora mosingo. En adier ni dhano nyalo paro ni dak nyaka chieng’ e piny manyien en gima ok nyalre. Kata kamano, Jehova singoga gik ma dhano ok nyal timo. Donge en e Nyasaye Manyalo Duto. (Ayub 42:2; Mar. 10:27) Omiyo, ok kawwa gi wuoro ni osingonwa gik madongo.​—Som Jo-Efeso 3:20.

11. Moko kuom singo mag Jehova ma ne nenore ka gima ok nyal chopo gin mage? (Ne sanduk ma wiye wacho ni, “Singo Moko ma ne Nenore ni Ok Nyal Chopo.”)

¹¹ Ne ane moko kuom gik ma Jehova nosingo ne jotichne e kinde machon, ma gin gik ma ne nenore e wang’ dhano ni ne ok nyal chopo. Jehova nosingo ne Ibrahim gi Sara ni ne gidhi nyuolo nyathi ma wuoyi kata obedo ni ne giseti. (Cha. 17:15-17) Bende, nonyiso Ibrahim ni nyikwaye ne dhi dak e piny Kanaan. Kuom higni mang’eny ma Jo-Israel ma ne gin nyikwa Ibrahim obedoe wasumbni e piny Misri, ne nyalo nenore ka gima singono ne ok nyal chopo. Kata kamano, singono nochopo. Higni moko bang’e, Jehova nosingo ne Elizabeth ma noseti ni nodhi nyuolo nyathi. Bende, nonyiso Maria ma ne en nyako ma silili ni nodhi nyuolo wuoyi ma wachne nosesing higni alufe motelo e puodho mar Eden, kendo singono nochopo!​—Cha. 3:15.

12. Ang’o ma Joshua 23:14 kod Isaya 55:10, 11 nyisowa e wi teko ma Jehova nigo?

¹² Wanyalo tego yie ma wan-go kuom teko ma Jehova nigo mar kelo piny manyien ka waparo kuom singo mamoko ma nochopo. (Som Joshua 23:14; Isaya 55:10, 11.) Timo kamano konyowa mondo wabed moikore konyo jomamoko neno ni singo mar piny manyien ok en aena lek kata sigana moro mochuogi. Jehova owuon nowacho kama e wi polo manyien gi piny manyien: “Wechegi gin weche migeno kendo madier.”​—Fwe. 21:1, 5.

BED MODICH GI GIK MA BIRO KONYI SUDO MACHIEGNI GI JEHOVA

13. Ere kaka chokruogewa mag kanyakla nyalo tego yiewa? Ler ane.

¹³ Yo mar adek ma wanyalo tegogo yiewa en kuom tiyo gi thuolowa e timo gik ma nyalo konyowa sudo machiegni gi Jehova. Kuom ranyisi, ne ane ber ma wayudoga sama wadhi e chokruogewa mag kanyakla. Nyaminwa Annab mosetiyo ne Jehova kuom thuolone duto e yore mopogore opogore kuom higni mang’eny wacho kama: “Chokruoge osekonya siko ka an gi yie motegno. Kata ka jagol-twak ok opuonjo e yo molony ahinya kata ok owacho wach moro manyien, pod anyalo puonjora wach moro ma nyalo konya medo winjo tiend adiera manie Muma, kendo mano tego yiena.” Onge kiawa ni wan bende wamorga ahinya winjo paro ma jomamoko gologa sama wan e chokruogewa, kendo parogo tego yiewa.​—Rumi 1:11, 12; 10:17.

14. Ere kaka tij lendo tego yiewa?

¹⁴ Watego yiewa bende sama wadhi e tij lendo. (Hib. 10:23) Nyaminwa Barbara mosebedo ka tiyo ne Jehova kuom higni 70 wacho kama: “Tij lendo osetego yiena ahinya. Kaka amedo wuoyo gi jomamoko e wi singo mabeyo mag Jehova, e kaka yiena medo bedo motegno.”

15. Ere kaka puonjruokwa wawegi tego yiewa? (Ne pichni bende.)

¹⁵ Ne ane gimachielo ma nyalo tego yiewa: Puonjruok ma marwa wawegi. Nyaminwa Susan wacho ni gima konyega en loso chenro mar puonjruokne owuon. Owacho kama: “Chieng’ Jumapil, aikoga sula mar Ohinga mar Jarito ma idhi tim e juma ma luwo. Wuok Tich gi Tich Ariyo, ajaikoga chokruok mar kor juma. E odiechienge modong’go, atimoga puonjruok e wi weche mamoko.” Nikech Susan omakore motegno gi chenro moketono, mano konyega dhi nyime tego yiene. Irene mosetiyo ne Jehova kuom higni mang’eny e ofiswa maduong’, osefwenyo ni puonjruok e wi weche ma nokor e Muma tego yiene. Owacho kama: “En-ga gima kawa gi wuoro neno kaka weche ma Jehova nokoro chopo kare, moriwo nyaka weche matindo tindo.”c

“OK OBI BARE”

16. Ang’o momiyo weche ma Jehova nonyiso Habakuk jiwowa ahinya e kindewagi? (Jo-Hibrania 10:36, 37)

¹⁶ Moko kuom jotich Jehova osebedo ka rito giko mar pinyni kuom kinde malach ahinya. E wang’ dhano, nyalo nenore ni Nyasaye deko e chopo singoge. Jehova nowuoyo e wi wachno ka nonyiso janabi Habakuk kama: “Fwenyno nigi kinde moketne, kendo otimo piyo mondo ochop gikone, ok obi riambo. Kata ka odeko, rite arita! Nimar ok obi bare. Obiro chopo mana e kindene!” (Hab. 2:3) Be Jehova nowacho wechego mana ni mondo ojiw Habakuk kende, koso wan be wechego nyalo jiwowa e kindewagi? Kitaye gi roho maler, jaote Paulo notiyo gi wechego kowuoyo kuom Jokristo ma rito piny manyien. (Som Jo-Hibrania 10:36, 37.) Ee, wanyalo bedo gadier ni kata ka nenore ni resruok mosingnwa deko, “ok obi bare. Obiro chopo mana e kindene!”

17. Ere kaka nyaminwa moro notiyo gi puonj ma ne Jehova omiyo Habakuk?

¹⁷ Jotich Jehova mang’eny osetimo mana kaka Jehova nyisogi ni ‘girit arita,’ kendo gisetimo kamano kuom higni mang’eny ahinya. Kuom ranyisi, Nyaminwa Louise nochako tiyo ne Jehova e higa mar 1939. Owacho kama: “Gie kindeno, naparoga ni Har–Magedon biro chopo ka pok atieko sekondari. Mano ne ok otimore. Kaka higni ne medo kalo, somo ranyisi mag joma nohore ka rito mondo Jehova ochopnegi wach moro ma nosingonegi, kaka Noa, Ibrahim, Josef, kod jomamoko, nokonya ahinya. Siko ka arito osekonya kaachiel gi jomamoko mondo wabed gadier ni piny manyien okayo machiegni.” Jotich Jehova mamoko mosetiyone kuom higni mang’eny bende oyie gi wachno.

18. Ere kaka nono chuech miyo wabedo gadier ni piny manyien biro chopo?

¹⁸ En adier ni piny manyien pok ochopo. Kata kamano, nitie gik ma waneno sani, kaka sulwe, yiende, le, kod dhano wetewa. Onge ng’at ma nyalo bedo gi kiawa ka be gigo nitie kata obedo ni nitie kinde ma ne gionge. Gintie nikech Jehova nochueyogi. (Cha. 1:1, 26, 27) Nyasachwa osechano ni obiro kelo piny manyien. Obiro chopo dwacheno. E piny manyien, ji biro dak nyaka chieng’ ka gimor kendo ka gin gi ngima makare chuth. E kinde ma Jehova oketo, obiro kelo piny manyien, kendo wabiro neno piny manyienno mana kaka sani waneno chuech molworowa.​—Isa. 65:17; Fwe. 21:3, 4.

19. Ere kaka inyalo tego yieni?

¹⁹ Gie sani, ti gi thuolo moro amora ma in-go mondo iteg yieni. Bed mamor gi mich mar rawar. Par e wi teko ma Jehova nigo. Bed modich gi gik ma nyalo konyi sudo machiegni gi Jehova. Kitimo kamano, ibiro bedo e kind joma biro yudo ‘gik ma ne osing nikech ne ginyiso yie kod horuok.’​—Hib. 6:11, 12; Rumi 5:5.