Gimomiyo Wadok Monwore
1. Gin penjo mage manyalo betie kaluwore kod tijwa mar lendo?
1 Kuonde mang’eny e alworawa, walendo monwore. Wasiko wadok monwore e udi ma waselendoe, kata obedo ni wuon ot ne osenyisowa ni ok odwar winjo. Ang’o momiyo wamedo limo jogo ma ok oserwako wach kinde mosekalo?
2. Gima duong’ mamiyo wanano e tij lendo en ang’o?
2 Hero Jehova kod Dhano: Gima duong’ momiyo wanano e tij lendo en hera mawan-go kuom Jehova. Chunywa jiwowa dhi nyime kod wuoyo gi jomoko kuom Nyasachwa maduong’. (Luka 6:45) Hera ma wan-go kuom Jehova miyo wamako chikene kendo konyo jomoko mondo otim kamano. (Nge. 27:11; 1 Joha. 5:3) Nano ka wachung’ motegno e tijni ok oluwore gi kaka ji rwako wach. Jokristo ma nokwongo betie ne dhi nyime gi lendo ma “ok giweyo” kata kane isandogi. (Tich 5:42) Ka ji tamore winjo, kar weyo mano mondo onyos chunywa, wadong’ ka wachung’ motegno, ka wanyiso okang’ mar herawa kod chiwruokwa ne Jehova.
3. Ere kaka hero ji biro konyowa dhi nyime gi lendo?
3 Bende wanano nikech wahero dhano wetewa. (Luka 10:27) Jehova ok dwar mondo ng’ato moro amora otho. (2 Pet. 3:9) Kata mana kuonde milendoe monwore, podi wayudo jogo madwaro tiyo ne Jehova. Kuom ranyisi, e piny Guadeloupe, kama ng’ato 1 e kind ji 56 en Janeno mar Jehova, ji 214 ne obatisi higa mokalo. Chiegni ji 20,000 ne obiro e Rapar, mano dirom kwan mar ng’ato 1 e kind ji 22 manie piny Guadeloupe!
4. Alwora mag lendo lokre e yore mage?
4 Lokruok Mabedoe Kuonde Lendo: Chal mar alworawa ma walendoe lokore kinde ka kinde. Chieng’ ma wadok limo kama ne ok orwakie wach e yo maber, ng’at machielo kuom jo odno, manyalo bedo ng’at ma pok nowinjo wach ma walando nyalo yawo dhoot ma owinj. Kata wanyalo yudo jodak manyien madwaro winjo. Nyithindo ma jonyuolgi kwedo wach nyalo dongo ma dhi dag kuonde mopogore. Joma kamago nyalo bedo moikore winjo wach Pinyruoth.
5. Ang’o manyalo miyo jomoko obed gi chuny mar winjo?
5 Dhano bende lokore. Jaote Paulo kinde moko ne en “jayenyo, jasand ji, kendo jakwinyo.” (1 Timo. 1:13) Kamano bende, ng’eny jogo ma sani tiyo ne Jehova chon ne ok ohero adiera. Moko nyalo kata bedo ni ne okwedo wach maber kinde moko. Kaka lokruok bedoe e piny, moko kuom jogo makwedo kata jogo ma ne ok odewo nyalo bedo gi chuny mar winjo. Moko nyalo bedo gi chuny mar winjo bang’ yudo chandruok moro e ngimagi, kaka tho mar ng’ato kuom joot, lalo tich, bedo gi chandruok mar pesa, kata tuwo.
6. Ang’o momiyo onego wadhi nyime lendo gi iilo?
6 Pinyni okayo gikone, tijwa mar lendo kod puonjo ji to dhi nyime mapiyo. (Isa. 60:22) Kuom mano, wadhi nyime gi lendo gi iilo kendo timo kinda mar bedo gi geno. Ng’at machielo ma wawuoyogo nyalo winjo. Onego wadhi nyime gi wuoyo! ‘Ka watimo kamano wanaresre wawegi kendo reso bende jogo mawinjo weche ma wapuonjo.’—1 Timo. 4:16.