Wakawo Thuolo Makende Momiwa Kaka Gima Duong’ Ahinya!
1 Kinde duto ma dhano osebedoe, Jehova osemiyo jotichne thuolo mopogore opogore. Osetimo kamano ma ok ong’i ka gin chwo kata mon, hikgi, kata chal moro amora ma gin-go e ngima. (Luka 1:41, 42; Tich 7:46; Fili. 1:29) Gin thuolo mage ma osemiyowa kindegi?
2 Moko Kuom Thuolo ma Wan-go: Wan kod thuolo makende mar bedo jogo ma ipuonjo gi Jehova. (Math. 13:11, 15) Pako Jehova kokalo kuom paro ma wachiwo e chokruogewa mag kanyakla en thuolo machielo ma wan-go. (Zab. 35:18) Ka wayudo thuolo mar chiwo paro e chokruok, watimo kamano gi ilo. Kamano bende, ka wakawo migawo duto momiwa mag kanyakla kaka gima duong’, wabiro time gi nyalowa duto. Be pile watiyo tij lwoko kendo rito chal mar Od Romo, ma en thuolo makende?
3 Kata obedo ni tara gi tara mag ji penjore kabe Nyasaye winjo kwayo maggi e lamo, wan kod thuolo makende nikech Jalo Maduong’ ahinya e wi piny mangima winjo lamowa. (Nge. 15:29) Jehova owuon winjo lamo mag jotichne. (1 Pet. 3:12) Ok oketnwa kwan mag ndalo ma onego wakwaye e lamo. Mano mich maber manade ma wan-go mar lamo “kinde duto”!—Efes. 6:18.
4 “Jotich Kaachiel Kod Nyasaye”: Achiel kuom thuolo mabeyo ahinya ma wan-go en lando wach maber mar Pinyruodh Nyasaye kaka “jotich kaachiel kod Nyasaye.” (1 Kor. 3:9) Mani en tich makelo mor kendo ma duogo chuny. (Joha. 4:34) Ok ochuno ni nyaka Jehova ti gi dhano e miyo tichne mondo otire, to kata kamano, osemiyowa migawoni nikech oherowa. (Luka 19:39, 40) E timo kamano, Jehova ok osemiyo thuoloni makende ne ji duto ma ok oyierogi. Jogo matiyo tijni nyaka chop gigo ma idwaro kuomgi e wang’ Jehova. (Isa. 52:11) Be wanyiso ni wageno ahinya thuoloni kuom keto tij lendo obed kaka gima duong’ e chenro marwa mar juma?
5 Thuolo makende ma Jehova chiwo miyo ngimawa pong’ gi gik mabeyo. (Nge. 10:22) Kik ikaw thuologo ka gima tin! Ka wanyiso ni kuom adier wakawo thuolo mag tiyo ne Jehova ka gima duong’, wamiyo Wuonwa manie polo mor, ma en Jachiwo mar “mich mabeyo duto, gi chiwo malong’o duto.”—Jak. 1:17.