Barua Mowuok Kuom Bura Matayo

Jaland Wach Maber Wadwa:

Mano kaka wan gi thuolo ma jaber mar riwore e lamo Jehova Nyasaye makende mar adier kanyachiel! Wan “jotich ma tiyo kanyachiel” kode kendo ma osemiyo migawo mar tiyo tich ma reso ngima ji. Tijno en yalo kendo puonjo ji wach maber mar Pinyruodhe ma koro osechako locho. (1 Kor. 3:9; Mat. 28:19, 20) Mondo wachop tijni e piny mangima ka wan e winjruok achiel kendo gi kue, nyaka wabed jo ma ochanore abidha.​—1 Kor. 14:40.

Bugni biro konyi ng’eyo kaka gik moko onego otimre e kanyakla mar Jokristo ndalogi. Owuoyo kuom migepe kod ting’ ma in-go kaka achiel kuom Joneno mag Jehova. Ka adier imor gi migepego kendo ikawo ting’ ma in-go e yo mapek, ibiro ‘gurori e yie.’​—Tich 16:4, 5; Gal. 6:5.

Kuom mano, wajiwi mondo isom bugni adimba. Many kaka inyalo tiyo gi weche man kaegi e ngimani. Kuom ranyisi, ka e ka nyocha ibedo jalendo ma pok obatis, gin okenge mage minyalo kawo mondo obatisi ibed achiel kuom Joneno mag Jehova? To ka po ni in jalendo mosebatis, ang’o minyalo timo mondo imed dongo e winjruokni gi Jehova kendo itine e okang’ malach? (1 Tim. 4:15) Ere kaka inyalo konyo mondo imi kue obed e kanyakla? (2 Kor. 13:11) Gen yudo dwoko mag penjogo e bugni.

Ka in ng’at ma dichwo mosebatis, en ang’o minyalo timo mondo iwinjri bedo jakony-tich kae to bang’e ibed jaduong’-kanyakla? Kaka ji tara gi tara medo biro e kueth mar oganda Nyasaye, e kaka owete mowinjore bende dwarore mondo gita kanyakla. Bugni biro konyi neno gik ma dwarore ni itim ma nyalo konyi “timo kinda” mondo ichop e migepe momedorego.​—1 Tim. 3:1.

Walemo gi kinda ka wan gi geno ni bugni biro konyi ng’eyo migapi e chenro ma Jehova oseketo e riwruok mar ogandane kendo ni ikaw migawono mapek. Waherou uduto ahinya kendo wamedo lamo ni un bende ubi ubed jogo ma biro dhi nyime tiyo ne Jehova Wuonwa me polo nyaka chieng’.​—Zab. 37:10, 11; Isa. 65:21-25.