Lamo Jehova Kanyachiel Kaka Joot
1 Jogo ma ne odak e kinde ma ne indiko Muma, ne timo gik mang’eny kanyachiel kaka joot. Ne gitiyo tije mapile mag ngima, to maduong’ moloyo, ne gilamo Jehova kanyachiel kaka joot. (Lawi 10:12-14; Rapar 31:12) Kuonde mang’eny ndalogi, joot timo gik manok ahinya kanyachiel. Kata kamano, Jokristo neno ber mar timo gik moko kanyachiel kaka joot, to moloyo korka wach lamo. Mano kaka en gima moro Jehova ma en Wuon ngima mar joot, neno joot ka lame kanyachiel!
2 Tiuru Tij Lendo Kanyachiel: Tiyo tij lando wach maber kanyachiel, miyo joot bedo gi winjruok maber. Kuom mano, e wi dhi lendo kanyachiel gi jomamoko ei kanyakla, jaduong’-kanyakla bende kinde ka kinde biro lendo gi chiege kaachiel gi nyithinde. (1 Timo. 3:4, 5) Kata obedo ni gidich ahinya, jorit malworo bende keto thuolo mar lendo kanyachiel gi mondegi.
3 Jonyuol malendo kanyachiel gi nyithindgi nyalo konyogi timo dongruok kaka jolendo. Nyithindo ok bi neno mana mor ma jonyuolgi yudo kuom tij lendo, to bende gibiro neno ka jonyuolgi nyiso heragi kuom Jehova koda ne dhano. (Rapar 6:5-7) Ber mar timo kamano ok dog chien kaka nyithindo medo dongo. Dichwo moro gi chiege kaachiel gi yawuotgi adek ma hikgi nie kind 15 nyaka 21, medo dhi nyime lendo kanyachiel kuom kinde ka kinde. Wuon-gi ne owacho kama: “Wapuonjogi gimoro kinde duto ma walendo. Kendo nyaka wane ni mano bedo kinde mamiyogi mor kendo majiwogi.”
4 Timuru Ikruok Kanyachiel: Ng’eny joot osenwang’o ni en gima ber timo ikruok ne tij lendo kanyachiel. Kinde mang’eny nyithindo ohero kinde mag timo ikruok e yor ranyisi ka joot wilore e bedo jalendo kata wuon ot. Joot moko kawo dakika matin e timo kamano e giko mar puonjruokgi kaka joot.
5 Mor marwa medore sama watimo gik mabeyo ahinya kendo makelo mor kanyachiel gi jogo ma wahero. Mano kaka en gima ber ahinya ka joot lendo kanyachiel e ot ka ot, kaachiel gi dok limo jogo ma gisewuoyogo kod puonjo ji Muma! Lamo Jehova e yo ma kamano kanyachiel gi joodi nyalo miyo iwach gi mor kama: “To an kod jooda, wanati ni Jehova.”—Josh. 24:15.