Luw Ranyisi ma Yesu ne Oketo
1. Yesu ne oketo ranyisi mane?
1 Sama watiyo tij timo jopuonjre, nyaka wang’e ni ranyisi ma waketo nyalo mulo ngima jogo ma nenowa. Yesu ne puonjo e wach koda e tim. Jogo ma ne ng’iye ne nyalo neno kinda ma ne en-go, hera ma ne onyiso ji, gombo ma ne en-go mar miyo nying’ Wuon mare obed maler, kod kaka ne oketo chunye mondo ochop dwach Wuon mare.—1 Pet. 2:21.
2. Ranyisi ma waketo nyalo jiwo jogo ma lendo kodwa e yore mage?
2 Sama Walendo Ot ka Ot: Mana kaka ne onenore kuom Yesu, ranyisi ma waketo mulo ngima jogo ma lendo kodwa. Jolendo manyien kod ma podi ok olony ahinya ma nenowa ka walendo gi kinda biro nono okang’ ma gitimogo tij lendo. Sama gineno mor ma wan-go kod kaka wadewo ji gi chuny madier, mano biro paronigi ber mar timo kamano sama gin bende gilendo. Ka gineno kinda marwa e tiyo gi Ndiko ka walendo, e dok limo jogo ma waselendoni, kod puonjo ji Muma, mano biro jiwogi timo kamano.
3. Ere kaka ranyisi ma waketo puonjo jopuonjre Muma kendo ang’o ma ginyalo puonjore timo?
3 Sama Wapuonjo Ji Muma: Jopuonjrewa mag Muma biro ng’iyo ahinya kaka watimo. Kuom ranyisi, kata obedo ni wanyalo leronigi kaka ginyalo timo ikruok ne puonjruok, elo ndiko, kod keto lain kuonde ma dwoko yudoree, gibiro neno kabe wan wawegi wasetimo ikruok. (Rumi 2:21) Ka warito sa mar puonjruok ma wawinjoree kodgi, ok gibi weyo mondo tije mamoko otamgi timo puonjruok. Bende onge kiawa ni gibiro neno chuny mar chiwruok ma wanyiso e tij lendo kaachiel gi yie marwa motegno. Ok en wach miwuoro ka jogo ma puonjore gi jolendo maluwo ranyisi mar Yesu, pile bedo gi kinda, kendo gitiyo tij lendo e yo makelo nyak.
4. Sama wan e chokruogewa mag kanyakla, ang’o ma ranyisi ma waketo puonjo?
4 Sama Wan e Chokruoge mag Kanyakla: Jokanyo duto mag kanyakla mar Jokristo nigi ting mar puonjo jomoko kokalo kuom ranyisi ma giketo e chokruoge mag kanyakla. Jogo morwako wach machako biro e chokruoge biro yudo kony kuom ranyisi mabeyo ma gineno e kanyakla. Gibiro neno hera mamor mar owete, winjruok mar Jokristo, kod rwakruok mobidhore. (Zab. 133:1) Ranyisi ma waketo kuom bedo e chokruoge pile ma ok wabare kod nyiso yie marwa e lela ka wan e chokruogego bende biro nenore. Wendo moro ma ne obiro e achiel kuom chokruogewa, ne oneno kaka nyako moro matin ne elo ndiko ma ne iwacho e Muma mare mapiyo kendo kaka ne oluwore gi jasomo machiegni. Ranyisi mar nyakono ne omiyo wendono okwayo mondo ng’ato opuonjre kode Muma.
5. Ang’o momiyo ok onego wacha ber mayudore kuom ranyisi ma waketo?
5 Ndiko jiwowa mondo waluw ranyisi maber mar ng’ato gi nyawadgi. (Fili. 3:17; Hibr. 13:7) Kuom mano, onego wang’e ni ka waluwo ranyisi ma Yesu ne oketo machiegni, jomoko biro neno mano kendo nyalo mulo ngimagi e yo maber. Ka waketo mano e pachwa, we uru mondo wapar wechegi mayudore e 1 Timotheo 4:16: ‘Ritori iwuon, kendo rit weche mipuonjo.’