Chiw Gasede ma Chiwo Neno Kuom Adiera

1. Gasede mag Mnara wa Mlinzi kod Amkeni! tiyo tich mane?

¹ Mnara wa Mlinzi Unaotangaza Ufalme wa Yehova kod gaset machielo ma igoyo kaachiel kode ma en Amkeni!, podi itiyogo ahinya e tij lando Pinyruoth kod timo jopuonjre. (Math. 24:14; 28:19, 20) Wamor chiwo gasede ariyogo mawuok e kinde mowinjore sama watiyo tij Pinyruoth e yore mopogore opogore.

2. Lokruok mage mosetim e Mnara wa Mlinzi kod Amkeni!, kendo nikech ang’o?

² Kuom higini ma osekalo, waseneno lokruok e lach mar gasedego kod weche ma giting’o kaachiel gi yore ma watiyo godo e chiwogi. Lokruokgi osetim mondo omi gasedegi omed bedo mamoro ji kendo matiyo maber, mondo omi wach Pinyruoth ochop e chuny ‘ji duto mondo gikwo, kendo ging’e adiera chuth.’—1 Timo. 2:4.

3. Gasedego ibiro tigo nade e tij lendo?

³ Chakre Januar 2006, wasebedo molony e tiyo gi yore mopogore opogore mag chiwo gasede mag Amkeni! ma dwe ka dwe. Koro wabiro tiyo gi yo machal kamano e chiwo mana achiel kuom gasede ariyo mag Mnara wa Mlinzi Unaotangaza Ufalme wa Yehova ma dwe ka dwe e tijwa mar lendo. Yore mochiw kaka ranyisi mag chiwo gaset ka gaset nwang’ore e ite mogik mar Tijwa mar Pinyruoth. Ndalo mang’eny, yorego wuoyo e wi achiel kuom wi wach michakogo gasedno, kata kamano, seche moko weche moko ma ji mang’eny nyalo hero bende inyiso e yorego. Paro mogo e Tijwa mar Pinyruoth inyalo tigo maber ka wawinjo tiend wach ma paro mochiwgo wuoyoe kendo watiyo gi wechewa wawegi kaluwore gi chal mar alwora ma walendoe.

4. Ang’o momiyo diber kikonyori gi yore mamoko bende mopogore gi mochiw e Tijwa mar Pinyruoth?

⁴ Kata obedo ni Tijwa mar Pinyruoth chiwo yore ariyo mopogore opogore mag chiwo gaset ka gaset, bed thuolo mar tiyo gi yo machielo. Achiel kuom gimomiyo watimo kamano nyalo bedo ni nitie wach machielo kuom weche manie iye manyalo moro ji mathoth e alworau. Kata nyalo bedo ni ineno ni inyalo tiyo gi yo machielo maberie moloyo kiwuoyo kuom wach moro ma ineno kihero.

5. Kapok waiko yo ma wadwaro chiwogo gaset, onego itim ang’o?

⁵ Kaka Inyalo Iko Yore Michiwogo Gasede: Mokwongo, nyaka iwinj e yo matut wi wach miyiero chiwo mani ei gaset. Nyalo bedo ni kinde moko ok ibi winjo tiend wach ka wach maduong’ manie gaset kapok ichiwe e tij lendo. Kata kamano, nyaka inyis ilo kod chuny modimbore kaluwore gi weche miyiero losoe. Mano inyalo timo mana ka iwinjo tiend wach michiwono.

6. Ere kaka wanyalo iko yorewa wawegi mag chiwo gasede?

⁶ Bang’e, bed ng’ama nyalo loko paro sama iiko weche mibiro chakogo. Inyalo chako loso gi ng’ato kitiyo gi penjo motudore gi wach miwuoyoe manyalo miyo odwar winjo. Kinde duto ka ilendo we mondo teko mar Wach Nyasaye ema mondo omul chuny ji. (Hibr. 4:12) Yier ndiko mowinjore motudore gi wach ma ichako wuoyo kuomeno, kaber to obed ndiko moket kama iyiero wuoyoeno. Par kaka inyalo tudo ndikono kod wach ma iyierono.

7. Ere kaka wanyalo medo bero yore ma walendogo?

⁷ Tiyo Gi Thuolo Moro Amora: Mondo yo ma walendogo obed matiyo maber gadier, nyaka ti kode. Lend kanyachiel gi kanyakla kuchiwo gasede chieng’ Ngeso. Chiw gasede ne joma ne osebedo ka kawo bugewa mamoko. Kinde duto ichiw ni jopuonjreni mag Muma gasede kod joma moko manyalo bedoe ka idok timo limbe. Inyalo chiwo gasede ne ji ma iwuoyogo ka inyiepo, ka idhi e wuoth, kata ka irito laktar. Med bero yore ma ilendogo kaka imedo tiyo kodgi e dwe mangima.

8. Mnara wa Mlinzi kod Amkeni! gin gasede makende e yore mage?

⁸ Mnara wa Mlinzi kod Amkeni! gin gasede makende. Gimiyo Jehova duong’ kaka Jaloch e wi polo gi piny. (Tich 4:24) Gihoyo ji gi wach maber mar Pinyruodh Nyasaye kendo gijiwo yie kuom Yesu Kristo. (Math. 24:14; Tich 10:43) E wi mano, ging’iyo kaka gik matimore e piny chopo weche ma ne okor e Muma. (Math. 25:13) Kony joma odak e alworau mondo oyud konyruok kuom gasedegi ka iikori mar chiwogi e thuolo moro amora mowinjore!

9. Ere kaka wanyalo keto mise mar duogo?

⁹ Bang’ nwang’o thuolo maber mar weyo ne ng’ato gaset, kata ka iwuoyo mana gi ng’ato ma ok ichano e wach Nyasaye, ikri gi penjo kata wach moro ma chiewo paro manyalo miyo iduogi ilime kendo wuoyo kode kuom wach Nyasaye. Ka watimo kinda e pidho kodhi mag adier, wanyalo bedo gi adier ni Jehova biro yawo chuny joma gombo ng’eye kendo tiyone gadier.—1 Kor. 3:6.