Kaka Wanyalo Timo Ikruok mar Chiwo Gaset
1. Ang’o momiyo en gima ber ka waikore mar tiyo gi wechewa wawegi seche ma wachiwo gasede, kar nwoyo mana weche mondiknwa e Tijwa mar Pinyruoth?
1 Ng’ato nyalo penjore niya, ‘Ka Tijwa mar Pinyruoth mar dwe ka dwe nyiso gima onego wawach seche ma wachiwo gasedewa, be ochuno ni nyaka watim ikruok mar chiwo gasede?’ Kata obedo ni ji mang’eny oseyudo ni tiyo gi weche moketi e Tijwa mar Pinyruoth konyogi, podi dwarore mondo ng’ato ka ng’ato otim ikruok mare owuon. Yo mitiyogo e chiwo gaset e alwora moro nyalo pogore gi yo manyalo tiyo e alwora machielo. Kuom mano, ok onego wapar ni ochuno ni nyaka wati mana gi weche moketgo seche ma wachiwo gasede. Kata kapo ni wayiero tiyo gi weche moketnwa e Tijwa mar Pinyruoth, ber ka walero parono ka watiyo gi wechewa wawegi.
2. Ang’o monego iket e paro seche ma iyiero wi wach mibiro nyiso ng’ato?
2 Yier Wi Wach: Bang’ somo gasedno motelo, yier wach ma iparo ni owinjore gi joma odak e alworau, kendo ma ne omori somo ahinya in iwuon. Yie mari koda ilo ma inyiso seche ma iwuoyo e wi gima iyiero e gasedno, nyalo miyo wuon ot bende obed gi gombo mar somo wachno. Kata obedo ni ibiro nyiso gima ji mang’eny ohero winjo e alworau, dwarore bende mondo ing’e maber weche mamoko ma gasedno oting’o. Timo kamano biro konyi wilo kata timo lokruok e gima iwuoyoe ka iromo gi ng’ato ma ohero winjo wach machielo mopogore.
3. In iwuon ichako gi weche kaka mage mondo omi ji orwak wach?
3 Ti Gi Penjo: Bang’ timo mano, yier wecheni mibiro chakogo. Wecheni michakogo nyalo konyo ahinya. Ber mondo ipenj wuon ot penjo mamiyo oparo matut, mondo omi obed gi gombo mar somo gima iyiero nyise ei gaset. Penjo mamiyo wuon ot chiwo pache konyo ahinya. Kik ipenj penjo manyalo kuodo wi wuon ot kata miyo ochak mino wach.
4. Somo ne wuon ot ndiko ka thuolo nitie, konyo nade?
4 Som Ndiko: Mogik, yier ndiko mibiro somo ne wuon ot ka thuolo nitie, kendo onyalo bedo ndiko mayudore ei gaset e wi wach miyiero. Somo ne ndiko biro konye neno ni ote ma wakelone owuok e Wach Nyasaye. (1 Thes. 2:13) Ndikono bende biro chiwone neno kata yalone kapo ni ok oyie kawo gasede. Jolendo moko osemiyo weg udi obedo gi gombo mar somo gaset, ka gikwongo somo ndiko moro achiel kapok gipenjo wuon ot penjo. Sama idwaro somone ndiko, inyalo kwongo penje niya, “Ang’o minyalo wacho kuom gima ndiko manie Muma wacho kae?” Bang’ mano, nyise gima ni ei gasedno motudore gi ndikono, kendo inyalo wuoyo kode machuok ka ijiwe mondo osom gasedno ka pok ichiwonego.
5. Seche ma itimo ikruok mar chiwo gaset, gin gik mage ma onego iket e paro?
5 Ok oket chik ni nyaka wati mana gi weche mondiknwa ka wachiwo gasede. Kinde duto, ber tiyo gi weche ma winjore mayot kendo e yo machuok. Ti gi yo mineno ni yotni kendo mamiyo ji rwako wach. Jiw ahinya ber mogundho mayudore ei gasedewa kendo bed gi ilo seche ma ichiwo gaset. Ka itimo ikruok maber, ibiro medo lony e chiwo Mnara wa Mlinzi kod Amkeni! ne ji “ma noyier ni ngima mochwere.”—Tich 13:48.