‘Ikreuru ne Tije Mabeyo Duto’
1 Kane Yesu ochako kampen manyien mar lendo, ne okawo kinde mar iko jopuonjrene. (Math. 10:5-14) Kata obedo ni waduto wadich, bedo ni wanyalo kawo kata dakika matin mondo waikre kapok wadhi e tij lendo mar ot ka ot konyowa mondo wayud nyak maber.—2 Kor. 9:6.
2 Kaka Wanyalo Ikre: Ikruok maber chakre gi ng’eyo gima buge mwachano tiyogo wuoyoe. Bende onego waparie kuom joma nie alwora mwalendoe. Chandruok mage ma ginwang’o? Puonj mage mag din ma wanyalo romogo? Wanyalo dhi e weche mochiw mayudore e Tijwa mar Pinyruoth kod bug Kutoa Sababu kwa Kutumia Maandiko mondo wayud paro.
3 Chiko it malong’o ne ranyisi mitimo e Chokruok mar Tijwa bende biro konyowa. Kaka wamedo lony e yo mwalendogo, e kaka wabiro dwaro kinde machwok mar ikruok. Kata kamano, kinde ka kinde kapok wadhi e tij lendo, kwaparoe matin kuom gima wabiro wacho kendo wasiko wamiyo yo mwalendogo omed bedo maber, wabiro lony moloyo. Bende onego wane ni ofukowa mar lendo oting’o buge duto mwanyalo dwaro.
4 Ang’o mabiro konyowa e paro yo mwaiko lendogo? Tiyo kode gi dwol maduong’ kapok wadhi e lendo en yo achiel ma biro miyo waket gima wadwaro wacho e paro. Jomoko nwang’o mor e timo kamano e seche ma gitimo puonjruok mar joot. Jomoko to nwang’o ni konyo ka gindiko yo ma gibiro lendogono e kad moro matin e yo machiek mondo ka gilendo to ginyalo ng’iye matin ka pok gichopo e dhood ng’ato.
5 Gimomiyo Mano Konyo: Ikruok maber medowa lony kod mor e tijwa mar lendo. Okonyowa mondo kik waluor. Omiyo waparo kuom wuon ot moloyo paro mana gima wadhi wacho. E wi mano, ng’eyo gima bugewa wacho biro konyowa bedo moil seche ma wachiwe.
6 Ndiko jiwowa mondo ‘waikre ne tije mabeyo duto.’ (Tito 3:1) Onge tich ma dibedie maber maloyo lando wach maber. Kwaikore maber, wanyiso luor ne wuon ot moyie winjo, kendo ne Jehova, Nyasaye mwatiyone.—Isa. 43:10.