Timo Ikruok e Gima Konyo e Dok Limbe
1. Tij lendo mar Jokristo mokwongo ne idhi tim kama lach e yo mane?
1 Yesu ne oiko jopuonjrene chuth mondo obed jolendo molony mag “Wach Maber mar pinyruoth.” (Math. 4:23; 9:35) Yesu ne omiyogi tiegruokno kane olendo e alwora mar Palestina. Kata kamano, kapok odhi e polo, Yesu ne owacho ni tij lendo mar Jokristo ne idhi tim kama lach ahinya mondo omi ‘otim ogendini duto jopuonjre.’—Math. 28:19, 20.
2. Winjo chik Yesu mondo ‘watim jopuonjre’ oriwo timo ang’o?
2 Tijno ne dhi riwo dok limo ji ma ne orwako wach maber mar Pinyruodh Nyasaye, kendo puonjogi rito weche ma Kristo ne ochiko. Mondo omi watim limbe e yo molony, onego waikre maber.
3. Kata sama itimo limbe mokwongo, ere kaka inyalo keto thuolo mar dok?
3 Tim Ikruok Chon: Jolendo moko temo chiwo penjo e giko mar limbe mokwongo kae to gichiko duogo mondo giwuo kuom dwoko mar penjono. Gisenwang’o ni wuoyo kuom weche mayudore e bug Muma Puonjo sama gidok osekonyogi chako puonjruok Muma achiel kachiel.
4. Ang’o momiyo ok onego warit ni nyaka wayud gasede manyien eka wadog limo ng’ato?
4 Bedo mana gi chiwo achiel mar gasede dwe ka dwe ok nyis ni onego warit nyaka wayud gasede mag dwe mabiro eka wadog limo ji. Wanyalo miyo ng’ato odwar medo winjo ka wawuoyo kuom weche manie gaset ma jalo nigo.
5. Ang’o momiyo en gima konyo bedo gi wach midwaro chopo sama idok limbe?
5 Bed Gi Wach Midwaro Chopo: Kapok idok, kaw dakika matin mondo inon weche mindiko piny kendo ipar wach midwaro chopo. Kuom ranyisi, inyalo wuoyo kuom wach moro mayudore e buk ma ne iweyone. Kata inyalo mede buk mawuoyo kuom wach moro ma ne uwuoye ndalo mokalo. Kane ipenje penjo e limbe mosekalo, wang’ni onego ichan mar miye dwoko mar penjono. Sama ijiwo ndiko, tem isom achiel kachiel kuom Muma ndiko moro masiro wach miwuoye.
6. Gima wadwaro chopo sama wadok limo ji en ang’o?
6 Gima Wadwaro Chopo: Kuom adier, gima wadwaro chopo en chako puonjruok Muma. Owadwa moro ne onyiso wuon ot wach puonjruok Muma kane odok lime, kata kamano, wuon ot ne otamore. Owadwano ne odok gi gasede manyien kae to owacho ni, “E limbewa ma kawuono, wadwoko penjo achiel mar Muma ma ng’ato nyalo bedogo.” Bang’ winjo wuon ot, owadwano ne osomo ndiko achiel kod paragraf mowinjore gi wachno kuom buk ma itiyo godo e puonjruok Muma. Mano ne omiyo gichako puonjruok Muma mapile.
7. Bedo moikore maber ne dok limbe osekonyi nade e chako puonjruok Muma?
7 Kawo thuolo mar timo ikruok ne dok limo ji en gima konyo adier. Mor marwa biro medore kendo wanyalo bedo gi thuolo mar konyo ji “ma chunygi oikore” mondo oluw yo madhi e ngima.—Tich 13:48, NW.