Barua Moa e Ofis

Jolendo ma Wageno:

En gima jiwowa ni e kinde ma tungni mag siasa ne nitie e Kenya, owete ma a e oganda mopogore opogore nodhi nyime gi nyiso hera mar owete kendo kuonde mamoko owete ne orwaki gi owetegi mamoko moa e oganda mopogore gi margi. Ripode nyiso ni kata obedo ni owete moko ne ohinyore e ndalo tungnigo, onge owadwa ma ne owito ngimane. Chenro mag chiwo kony ne oriw lwedo e yo maber ahinya. Gie sani thoth owete ma ne ogol kuondegi mag dak osedok e miechgi. Wagoyo ne Jehova erokamano kuom konyowa mondo wadong’ ka ok wariwo lwedo konchiel weche mag siasa, tiyo tij lendo mapile kod dhi e chokruok mag kanyakla kod mag alwora.​​—⁠⁠Johana 15:19; Isaiah 48:⁠17, 18.

Burundi chiwo ripot maber ahinya mar tiyo tij Nyasaye kuom higa mokalo. Kuom dweche ochiko mokwongo mag higa mar tijwa ne wayudo medruok mar 9% e kwan mag jolendo. E April, pasent 22 kuom jolendo duto nobedo painia e yo moro. Od Romo mar adek gi mar ang’wen minyalo tigo kata e chokruok mar alwora ne oger Rushubi kod Kinyinya. Kata kamano, tich mathoth monego otim e tij Jehova pod nitie.

E piny Sudan, tij gero od jo misonari e dala mar Juba dhi nyime maber. Owete mathoth ma ne gin joma oringo pinygi osedok Sudan kendo kanyakla norwakogi maber. Wagoyo ne Jehova erokamano kuom thuolo mar lemo ma wan-go e piny Sudan.

Owete manie piny Tanzania ne omor ahinya kuom donjo e ofis manyien ma jaber e kinde mag dweche auchiel mogik e higa mar tij Nyasaye. Onge kiawa ni mae biro kelo medruok e pinyni.

E piny Uganda, gocho mar ji duto mar Ohinga mar Jarito mayudore ding’wen e higa e dho-Luganda ne ji orwako maber ahinya kendo ochiwo neno maber e tij lendo. Bedo gi ofise ariyo mitiyoe tij loko dhok mar Acholi kod Runyankore oko mar ofis mar pinyno bende osekonyo ahinya jolokogo kaachiel kod kanyakla matiyo gi dhokgo.

Wamor ahinya chiwonu wechegi. Waoronu mos mag hera Jokristo.

Wan oweteu,

Ofise mag Burundi, Kenya, Tanzania, kod Uganda