Puonjruok Muma Ng’ato Owuon kod mar Joot Dwarore!
1. Bura Maduong’ dwaro timo ang’o makonyowa e kindegi, kendo nikech ang’o?
1 Bura Maduong’ ma kindegi dwaro timo duto ma ginyalo mondo gichiw kony ni oganda Jehova mana kaka Bura Maduong’ e kinde Jokristo mokwongo. (Tich 15:6, 28) Kaka masira maduong’ medo kayo machiegni, en gima dwarore ahinya mondo jalendo ka jalendo mar Pinyruoth obed gi winjruok motegno gi Jehova. Ibiro tiyo nade gi seche ma yande itiyogo e Puonjruok-Buk mar Kanyakla? Ijiwo ji duto mondo oti kod sechego e bedo gi lamo mar joot. Ka watiyo gi sechego e yo mariek, wabiro yudo thuolo mar somo Wach Nyasaye e yo matut, kendo yudo kony kuom puonj manie iye.—Zab. 1:1-3; Rumi 11:33, 34.
2. Ere kaka wanyalo chano odhiambo mar timo lamo marwa mar joot?
2 Odhiambo mar Timo Lamo mar Joot: Wiye mag udi ijiwo mondo okaw ting’gi e nyim Jehova, mar neno ni giluwo chenro maber, kendo mapile mar puonjruok Muma gi joutegi. (Rapar 6:6, 7) Owete gi nyimine ma podi ok odonjo e ngima mar kend biro tiyo gi sechego e puonjruok Muma ng’ato owuon kod timo nonro. Dwarore ni waduto ‘kik waketh kinde ma wan go’ mondo wapuonjre kendo paro matut kuom weche ma wapuonjore mondo wasik e winjruok motegno gi Jehova ‘nikech ndalogi richo.’—Efe. 5:15, 16.
3, 4. Paro mane ma ochiw kuom gik minyalo tigo e puonjruok, kendo nikech ang’o?
3 Gima Ubiro Puonjoru: Bug Fahirisi ya Vichapo kata Watchtower Library e CD-ROM nyalo konyou yudo wach mabiro miyo kinde mag puonjruok obed mamor. Joot nyalo puonjore weche ei gasede mag Ohinga mar Jarito ma igoyo pile e Swahili kata Ingresa machalo kaka “Gigo Makelo Mor E Ngima Joot,” “Puonj Nyithindi,” to kod “Ne Rowerewa.” Kata mana Amkeni! ni gi sula mawacho ni “Rowere Penjo” to kod weche mabeyo mawuoyo kuom chwech.
4 Somo Muma kanyachiel ma ok urikni, nyalo konyo ng’ato ka ng’ato e kind joot mondo opar kendo oti gi puonj mag Nyasaye e ngimagi. (Hib. 4:12) Kinde moko bende, unyalo ng’iyo kendo wuoyo e wi achiel kuom vidio ma riwruok mar oganda Nyasaye osegolo. Ubiro bedo gi thuolo mang’eny mag yiero gima ipuonjruok to kod kaka ipuonjruokgo. Donge inyalo penjo joodi gima digiher puonjore?
5. Ang’o momiyo puonjruok Muma ng’ato owuon kod mar joot dwarore e ngimawa sani?
5 Gimomiyo Dwarore e Kindegi: Jiwo winjruokwa gi Jehova biro konyowa ‘chung’ mos, wane warruok mar Jehova.’ (Wuok 14:13) Jonyuol onego oyud rieko moa kuom Nyasaye matayogi e pidho nyithindo “e kind tieng’ mobam kendo mokethore.” (Fili. 2:15) Nyithindo dwaro kony mondo gikwed timbe maricho mantie e skunde kindegi. (Nge. 22:3, 6) Joma osekendore dwarore ojiw winjruokgi gi Jehova mondo obed kaka “tol mikado gi tonde adek.” (Ekl. 4:12) Kuom mano, waduto watiuru gi rieko e ndalo modong’gi mondo wagerre e ‘yiewa maler moloyo’!—Juda 20.