Wan gi Wach Mwalando Machalo Kaka Mwandu
1 Wach Nyasaye opong’ gi puonj mabeyo ahinya ma wageno e chunywa. (Zab. 12:6; 119:11, 14) E kinde moro, Yesu notiyo gi ngero moko konyisogo weche mopogore opogore kuom Pinyruoth, kae to openjo jopuonjrene kama: “Wechegi duto osedonjonu koso?” Bang’ jopuonjre wacho ni wechego osedonjonigi, nokonigi niya: “E momiyo jandiko mosedoko japuonjre mar Pinyruodh polo ochalogi ng’at ma jaduong’ ot, ma golo kuom mwandune gik manyien gi gik machon.”—Math. 13:1-52.
2 Adiera mag Muma ma ne wakwongo puonjore inyalo ne kaka mwandu machon. Kuom siko ka watimo puonjruokwa wawegi e weche matut mag Wach Nyasaye, wayudo adiera mamoko mag Muma, machalonwa kaka mwandu manyien. (1 Kor. 2:7) E wi mano, kokalo kuom “jatichno mogen, kendo mariek,” wawinjo tiend weche manyien.—Math. 24:45.
3 Wakawo wechegi mag Nyasaye kaka gik madongo ahinya, tiende ni, adiera machon kod manyien. Mano miyo watimo matek mondo omi wayud tiegruok kod lony ka wan jopuonj mag Wach Nyasaye, kendo puonjo jomoko gi kinda adiera ma wan wawegi wasepuonjore.
4 Puonjri Kuom Ranyisi mar Yesu: Konyiso kaka nokawo adierago kaka mwandu, Yesu notimo kinda ahinya e lando adierago ni jomoko. Kata kinde ma ne ool, ok ne oweyo ma ok ogolo gik mabeyo kuom “mwandune.”—Joh. 4:6-14.
5 Hera ma Yesu ne nigo kuom jogo ma ne ok ong’eyo adiera mar Nyasaye, nomiyo olandonegi mwandu mag adiera Nyasaye. (Zab. 72:13) Nokecho jogo ma ne dwaro puonjore wach Nyasaye kaachiel gi dwarone, kendo “nochako puonjogi weche mang’eny.”—Mari. 6:34.
6 Luw Ranyisi mar Yesu: Ka wakawo mapek mwandu ma wan-go, kaka Yesu notimo, wabiro bedo gi gombo mar nyiso ji adiera ka wasomonegi Muma. (Nge. 2:1-5) Kata obedo ni seche moko wanyalo bedo mool, wabiro wuoyo kuom adiera mag Ndiko gi ilo. (Mari. 6:34) Kawo mwandu mag adiera kaka gima duong’ ahinya, biro jiwowa mondo watim duto mwanyalo e tij lendo, ka wasiko wamanyo thuolo mar timo kamano e okang’ mamalo.