Sandug Penjo
◼ Kapo ni nitie joma dwaro timo arus e Od Romo, gin weche mage ma onego ginon kanyachiel gi jodong-kanyakla?
Arus ma itimo kaluwore gi puonj mag Muma en gima kelo ne Jehova luor. To moloyo, mano timore e arus timo e Od Romo, nimar ji mang’eny modak e alwora, kawo gik moko duto mitimo e Od Romo kaka gik manyiso kit riwruok marwa. Mondo omi ‘weche duto otimre maber kendo makare,’ owinjore mondo jogo madwaro timo arus e Od Romo owuo kod jodong-kanyakla manie Od Romono.—1 Kor. 14:40.
Joma dwaro timo arus e Od Romo onego oor kwayogi ka gindiko barua ne komiti matayo tij kanyakla matiyo gi Od Romono. Onego gior baruano chon kendo onego ginyis tarik koda sa ma gidwaro tiyoe gi Od Romo. Nyaka ging’e ni jodong-kanyakla ok bi timo lokruok e chenro mar chokruoge mag kanyakla mondo omi gilos thuolo ne chenro mar arus. E wi mano, dhako gi dichwo madwaro timo arus e Od Romo, nyaka bed joma ochung’ maber e yie, kendo joma odak kaluwore gi puonj mag Muma, koda chike makare mag Jehova.
Mondo gibed gadier ni arusno biro kelo ne Nyasachwa luor, joma dwaro timo arus onego onon weche moko gi komiti matayo tij kanyakla kapok gitieko timo chenro margi mar arus. Kata obedo ni jodongo ok bi temo chuno joma dwaro kendore mondo otim gik moko kaka jodongogo ema dwaro, kapo ni nitie gimoro ma ok owinjore ma osechan, biro dwarore ni otim lokruok moko. Mana thum moyier e Kingdom Melodies kata wende mayudore e bugwa mar wer ema onego oti godo e Od Romo. Chano kaka Od Romono biro nenore e iye gi oko, kata kaka ibiro chan kombe nyaka pwodhi gi jodongo. Kapo ni ibiro go piche kata mako vidio, mano onego otimre e yo ma ok keth luor monego obedi e kar timo arus. Jodong-kanyakla nyalo chiwo thuolo mondo oti gi Od Romo e timo ranyisi mar gigo mibiro tim e sa arus, ka timo kamano ok donjre gi chenro mamoko mag kanyakla. Kad kata kalatas mar gwelo ji e arus ok onego oket e bod mar kanyakla. Kata kamano, jodongo nyalo timo lendo machuok e Chokruok mar Tijwa mondo ginyis kanyakla ni arus ibiro tim e Od Romo.
Kata obedo ni ok en gima ochuno ni jogo mabiro kowo chi arus sama odonjo e Od Romo ka nyasi dhi nyime obed jogo mosebatisi, nyalo bedo gima ok owinjore ka itiyo gi jogo ma odak e kit ngima ma ok winjre kata matin gi chike mag Muma, kata tiyo gi ng’at ma timbene ji ochich godo. Twak mar arus onego ogol gi jaduong’-kanyakla, ka jal ma kamano nitie. Jodong-kanyakla ema omi migawo mar bedo jopuonj mag Wach Nyasaye, omiyo gin ema giwinjore moloyo jiwo puonj mag Ndiko manyalo konyo e kinde makendeni. (1 Tim. 3:2) Kinde mang’eny, jal moseket kaka chik sirkal dwaro mondo obed jariw-kend, ema owinjore tayo singo mag kend.
To nikech wach arusno mulo nyaka jaduong’ mabiro golo twak mar arus, jaduong’no bende onego onyis chon chenro mag arus. Obiro romo gi joma dwaro kendore mondo openjgi kaka gisebedo ka giwuotho e kinde ma ne gitimo kisera; ber ka joma kendorego ok pand jaduong’no wach moro amora. Kapo ni ng’ato kuomgi ne osedonjo e kend chon, jalo onego onyis ratiro ni koro en thuolo mar donjo e kend machielo kaluwore gi Ndiko kod chik sirkal. (Math. 19:9) Mano nyalo riwo nyiso jaduong’no barua manyiso ni ne oseketho kendne machon kaluwore gi kaka chik sirkal dwaro.
Sama jogo madwaro kendore wuoyo ayanga gi jodong-kanyakla ma ok gipandgi wach moro amora, arus bedo kinde makelo mor ne ji duto.—Nge. 15:22; Hib. 13:17.