Odiechieng’ Makende mar Chako Puonjruok mar Muma gi Ji
1 Chakre Januar, kanyakla ka kanyakla biro yango odiechieng’ achiel mar giko juma e dwe ka dwe, mondo obed mar tiyo tij chako puonjruok mar Muma gi ji, odiechieng’no nyalo bedo mar giko juma mokwongo e dwe. Mano nyalo bedo Ngeso kata Jumapil, kaluwore gi odiechieng’ manyalo tiyonu maber. E odiechieng’no ka weg udi ok oyie puonjruok mar Muma, jolendo podi nyalo chiwonegi bug Muma Puonjo kata miyogi gasede manyien. Jodongo duto kod jokony tich e kanyakla onego ochan mar tiyo tijni gi thuologi malach kaka nyalore, kendo gikony jolendo mamoko mondo ochak puonjruok mar Muma gi ji.
2 Komiti Matayo Tij Kanyakla biro nono odiechieng’ mar giko juma monego oyang kaka mar timo tij chako puonjruok mar Muma gi ji. Kinde ka kinde onego opar ne jolendo mondo otim ikruok, kendo timo kinda makende mar chako puonjruok mar Muma gi ji sama gilendo ot ka ot, kod sama gilimo jogo ma norwako wach.
3 Kaka Wanyalo Timo Ikruok: Paro makonyo kuom kaka wanyalo chako puonjruok mar Muma gi ji yudore e kalatas madiere mar Tijwa mar Pinyruoth ma Januar 2006 (Swahili), kod bug Kutoa Sababu e ite mar 12. Jolendo moko nyalo yiero tiyo gi trakt kaka mar Bende Diher Ng’eyo Adiera? Tijwa mar Pinyruoth ma Agost 2007, ite mar 3 bende chiwo paro mag chako puonjruok mar Muma gi ji sama ilimo jogo ma ne oyie kawo gasede. Jodong-kanyakla kod jokony tich, biro bedo gi chenro mar tayo romo machuok mar dhi lendo makawo dakika 10 nyaka 15, e romono ibiro non paro achiel kata ariyo ma inyalo tigo e chako puonjruok mar Muma gi ji, kata inyalo tim e yor ranyisi kaka inyalo ti gi parogo.
4 En adier ni ok ji duto mabiro yie chako puonjruok mar Muma kata dhi nyime timo kamano kuom kinde malach. Mano ok onego omonwa chako puonjruok mar Muma gi ji, nikech Jehova ema ywayo jogo ma nigi kido mag rombe obi e riwruok mare. (Joh. 6:44) Ting’ ma wan-go ok en mana mar chuoyo koth adiera kende, to oriwo koda olo pi e kodhi mosechako twi, mano oriwo puonjruok Muma gi jogo madwaro puonjore adiera mar Jehova. Ka watimo kamano, wanyiso ni watiyo maber gi thuolo ma wan-go mar bedo jotich kanyachiel gi Nyasaye.—1 Kor. 3:9.