Kampen Makende mar Gwelo Ji e Rapar!
1. Jolendo mag Pinyruoth biro timo ang’o e piny mangima chakre Mach 21, 2009, to nikech ang’o?
1 Tich Ang’wen, April 9, 2009, jotich Jehova Nyasaye e piny mangima biro chokore mondo gipar hera maduong’ ma Jehova ne onyiso oganda dhano. (Rumi 5:6-8) Wageno ahinya ni tara gi tara mag ji biro chokore kodwa e paro tho mar Yesu. Kalatese makende mag gwelo ji e Rapar ibiro pogi e piny mangima chakore Mach 21.
2. Gin weche mage ma onego ipar seche ma ipogo kalatese mag gwelo ji e Rapar?
2 Weche ma Onego Wapar: Ti maber chuth gi piche, penjo, kod ndiko moketi e kalatasno. Kuom ranyisi, inyalo nyiso ng’ato picha manie ite mokwongo kae to iwachone kama: “Ne adwaro ni agweli mondo ibi ibed kodwa e paro tho mar Yesu, ma ibiro tim Tich Ang’wen, April 9, 2009.” Kae to nyise wi wach manie kalatasno kod penjo maluwo. Jiw ne wuon ot ni warwake ahinya kendo ni en bende onyalo gwelo joode kaachiel gi joma moko ma diher biro kode.
3. Ang’o ma inyalo timo bang’ miyo ng’ato kalatas mar gwelo ji e Rapar?
3 Kapo ni kanyaklau nigi kar lendo malach, jodong-kanyakla nyalo nyisou mondo uwe kalatese mag gwelo ji e udi ma weggi onge. E odiechienge mag giko juma, chiw gasede kanyachiel gi kalatese mag gwelo ji. Ket chenro mari obed gwelo jogo ma idok limo e tij lendo, jopuonjre mag Muma, wedeni, joskul weteni, jotich weteni, joma odak e alworau, kod joma moko ma ing’eyo. Higa mokalo nyaminwa moro nogwelo wedene 30, kae to kinde ka kinde ne oparonegi gimomiyo Rapar en gima duong’ ahinya. Mano kaka ne omor ka ji 25 kuomgi nobiro, kendo 4 kuomgi noyie chako puonjruok mar Muma!
4. Gin chenro mage manyaka watim gie sani, to nikech ang’o?
4 Tim Ikruok Sani: Jolendo mathoth nyalo timo tij lendo e okang’ momedore e dweche mag Mach kod April. Ka in gi nyithindo kata jopuonjre mag Muma matimo dongruok maber, mani nyalo bedo thuolo maber ahinya mondo gibed jolendo mapok obatisi. Sani e kinde mar chako ikruok mar timo duto minyalo e kampenni mar gwelo ji e paro yore ariyo madongo chuth ma Jehova kod Yesu nonyisogo hera.—Joh. 3:16; 15:13.