Kampen mar Gwelo Ji e Rapar Biro Chakore Mach 17
1. En kampen mane mabiro chakore Mach 17?
1 Rapar mitimo higa ka higa en mar lando tho mar Yesu. (1 Kor. 11:26) Omiyo, wadwaro ni jomamoko ochokre kodwa mondo ging’e hera ma ne Jehova onyiso kuom chiwo rawar. (Joh. 3:16) Higani, kampen marwa mar gwelo ji e Rapar biro chakore Ngeso, Mach 17. Be iikori gi siso timo duto minyalo e kampenno?
2. Ang’o ma wanyalo wacho seche ma wachiwo kalatese mag gwelo ji?
2 Gima Wanyalo Wacho: Ber wuoyo machuok. Wanyalo wacho kama: “Amosi. Wagwelo joodi e nyasi maduong’ mitimo higa ka higa e piny ngima, ma higani nobed April 5. Ibiro gol twak mawuok e Muma malero gima tho mar Yesu nochopo kod gima Yesu timo gie sani. Kalatasni nyiso kama ibiro time kod sa.” E kinde ma wapogo kalatesego e giko juma, onego wachiw bende gasede ka mano owinjore.
3. Ere kaka wanyalo gwelo ji mang’eny kaka nyalore?
3 Gwel Ji Mang’eny Kaka Nyalore: Dwaro marwa maduong’ en gwelo ji mang’eny kaka nyalore. Omiyo ne ni igwelo jogo mipuonjorigo Muma, joma idok timonegi limbe, wedeni, joma itiyogo, joskul weteni, joma idakgo machiegni, kod mamoko ming’eyo. Jodong-kanyaklau biro nyisou kaka ubiro chiwo kalatesego e alworau duto. Kampen marwa mar gwelo ji e Rapar higa ka higa kelo nyak maber. Ka dhako moro nodhi kama itimoe Rapar higa mokalo, achiel kuom jorwak welo ne dwaro konye mondo oyud jalendo ma nogwele. Kata kamano, dhakono nowacho ni ne ok ong’eyo ng’ato kanyo kendo ni ne ogwele gi ng’at moro ma ne pogo kalatesego ot ka ot seche mag okinyi e odiechiengno.
4. Ang’o momiyo dwarore ni watim kinda e kampenni?
4 Samoro ng’ato nyalo biro e Rapar nikech ne igwele. Bed ni ng’ato obiro kata ok obiro, kinda mitimo pod biro chiwo neno. Kalatese mag gwelo ji ma ibiro chiwo nokony e lando ni Yesu sani en Ruoth ma nigi teko. Kinda mitimo biro nyiso ji duto—joma nie alwora, jolendo weteni, to moloyo Jehova, ni ikawo mapek mich mar rawar.—Kol. 3:15.