Kampen mar Gwelo Ji e Rapar Biro Chakore Mach 1

1. Kampen mar gwelo ji e Rapar biro chakore karang’o, to ang’o momiyo obiro kawo thuolo momedore higani?

¹ Chieng’ Tich Abich Mach 1, wabiro chako kampen ma wajotimo higa ka higa mar gwelo jomamoko e Rapar. Nikech ibiro tim Rapar Mach 26, mano nyiso ni kampen ma higani biro kawo thuolo malach moloyo higini mosekalo. Mani biro miyowa thuolo momedore mar gwelo ji mathoth, to ahinya e gwenge ma kanyakla nigi alwora malach.

2. En chenro mane mibiro luw e pogo kalatese mag gwelo ji kendo ere kaka wabiro yudo kalatesego?

² Chenro: Jodongo biro timo chenro kaka inyalo chiw kalatese mag gwelo ji e alworagi koda kabe owinjore weyo kalatesego kuonde ma ok wayudoe weg udi. Kapo ni kalatesego odong’ bang’ tieko udi duto e alwora, wanyalo tiyo kodgi sama walendo e lela. Jarit tij lendo biro neno ni kalatese moromo ma osendik chuth nwang’ore e kar kawo buge mondo jolendo okawgi. Kata kamano, ok bi golgi duto dichiel. Onego wakaw mana kalatese moromowa tiyogo juma ka juma.

3. En wach mane monego wapar kinde duto ma wabiro bedo ka wagwelo ji?

³ Gima Wanyalo Wacho: Ber ka wawuoyo machuok nikech mano biro miyo wagwel ji mang’eny kaka nyalore. Ite mar 4 oting’o paro ma wanyalo tiyogo kaluwore gi alworawa. Kata kamano, ok ochuno ni wawuog mapiyo ruok ka wuon ot orwakowa kata ka en gi penjo modwaro ni wadwoke. Kinde ma wapogo kalatesego e giko juma, wabiro chiwo gasede bende ka mano nyalore. Chieng’ Mach 2, wabiro mana gwelo ji e Rapar kar chako puonjruok mag Muma.

4. Ang’o momiyo onego watim kinda e kampen mar gwelo ji e Rapar?

⁴ Wageno ni ji mathoth biro riwore kodwa e Rapar. Twak mibiro gol chieng’no biro lero maber ni Yesu en ng’a kuom adier. (1 Kor. 11:26) Twagno bende biro lero kaka thone nyalo kelonwa ber. (Rumi 6:23) E wi mago, twagno biro leronwa gimomiyo owinjore wapar Yesu. (Joh. 17:3) Omiyo, watimuru kinda mondo wariw kampen mibiro timno lwedo!